1 YisasiꞋa mani kea huteno ikapinaga age-saga hu-maineno Anumayamotega mage huno hie “Nenafagae falisua kanaꞋnia ago efalote hie. NekamoꞋna kagi ali-saga hisua yafe faliteꞋna he-tiꞋna kagaitega haisua yafe lokiya hale yania nekamonina namio. 2 Nekamonia mukiꞋama naminana veaꞋmogamina agola maige maige hisaya hamaimuꞋamima amamisua yafe mukiꞋa veaꞋmote kava yagaisua tokiyaꞋnia ago naminane. 3 Anumaya Kotiga kagaikage ala tokiya kanoa tamagemona tamaꞋa nagokeꞋage Anumaya mainanagi veaꞋmoꞋya kagaifema havilama huꞋya maisayana hu-tenana kanoa ‘YisasiꞋa veaꞋmogami amaku amamemaꞋa ali-gatisia kanoa ikapinagati emainea kano maine.’ huꞋya havilama hisayana maige maige hisaya hamaimula aligahae. 4-5 Naminana tokiya hale yatetiꞋa ma mopalela kagia alisaga hu-mainoe. Naminana aliꞋyana ago aliꞋna avaya aye-mainoa yafe Nenafagae meni kanafina kagai kavate mainesugeka tokiya hale yaniꞋa namio. Ma mopama talo ohunana kanafina kagaiꞋene mainoanagiꞋna tokiya hale yania haneanagi menia eteka ani yana namio. 6 Ma mopafi veapitiꞋma naminana veaꞋmogamina ago aepakaꞋa hu-falote huꞋna hama-pai-mainoe. Ani veala kagaikaꞋa veaꞋnegika nagaila ago naminane. NaminanageꞋya ani veaꞋmoꞋya kagai kea atafa hu-linae. 7 Atafa hu-lineꞋya mukiꞋa naminana yana kagaikaꞋalegati emaine huꞋya menia ago havilinae. 8 Naminana kea ago amamugeꞋya ago atafa huꞋya havilama hulineꞋya nagayama kagaitegatiꞋma emainoa yafena tamage nehie huꞋya havilama hu-lineꞋya kagayama hu-na-tanageꞋna emainoa yafena amakupi maleꞋya amametiti nehae.

9 Amakaifena Nenafagale ke huꞋna kahavi-negoe. Ma mopale yafema amaugafa aliꞋya nehaiya veafe Nenafagale menia kahavi-nokogi kagaikaꞋama naminana veaꞋnea kagai veaꞋne mainaya yafe naminana veafe kahavi-negoe. 10 Nagai veala kagai veale. Kagai veala nagai vea mainageꞋya ani veaꞋnimoꞋyama nagai tokiyaleti haya kavala nehageꞋya mopale veaꞋmoꞋya ageteꞋya nagai nagia alisaga nehae. 11 Ali-saga nehageꞋna menia ma mopaletila ataleꞋna kagaitega ugahuanagi nagaifema amakupi nemalaya veala ma mopafi maigahagi alu aotage Nenafaga kagaika kagileti naminana nagileꞋma hanea tokiyaleti auꞋvai-ma-tesanana taꞋagaya nagoke kanolatama mainoꞋa ya huꞋya amakaya nagoke kate maleꞋya nagoke veaꞋne maisae. 12 Nagaya amakaiꞋene maineꞋna kagayama naminana nagileꞋma hanea tokiyaleti auꞋvai-ma-togeno nagoꞋmoꞋa hani-ki-mainea yapima tegelege nehia atafina oꞋugahagi Anumaya Koti kema kae-malenaya kemoꞋma efalote huno tamagema hisia yafe anima hani-ki-mainea yapima tegelege nehia atafima visia kanoa YutasiꞋa agaiꞋage ugahie.

13 Menia eteꞋna kagaitega egahugi nagayama nehua muse yaniꞋamoꞋa amakai amakupina hava-tesia yafe ma mopale maineꞋna mani kea hama-nepauve. 14 Hama-nepaiꞋna kagai kea ago amaminogi nagaya ma mopafi kanoa omaiꞋnoe. Alu nagu nameꞋene kano mainogeꞋya amakaya nagayama hua kava huꞋya ma mopale veaꞋne kana vea omainae. Alu amaku amameꞋene veaꞋne mainaya yafe ma mopale veaꞋmoꞋya amakaife amaipa kafa he-ma-teꞋya kamea hu-neꞋama-tae. 15 Kamea hu-neꞋama-tayanagi nagaya veaꞋnimogamifena ‘Ma mopaleti amavalesaga huo.’ huꞋna kahavi-nokogi ‘SataniꞋma aye-mavataga hu yafe auꞋvai-mateka amaugafa ali-gatisanageꞋya kaꞋyeꞋya maisae.’ huꞋna kaha-vi-negoe. 16 Nagaya ma mopale kanoa omaiꞋnoe. Alu nagu nameꞋene kano mainogeꞋya amakaya nagai kana huꞋya ma mopale veaꞋnea omainae. Alu amaku amameꞋene veane mainae. 17 Mainayafe kagaika ke-lamage kekaleti alu aotage veaꞋne maisaya amaku amakesa amamio. Kagayama hu-mainana kemoꞋa tamageꞋage nehie. 18 Kagaya ma mopafima nagaiꞋma hu-natanageꞋna emainoa kava huꞋna naminana veaꞋnea nagaya mopale veaꞋmogami amuꞋnopi ago hu-ma-tenoe. 19 Nagi tamage huꞋya amaku amamemaꞋamona kagaila kamisaya yafe nagaya nagu namemaꞋamona kagaila negamue.

20 NagaiꞋenema mainaya veaꞋneꞋagefena kahavi-nokogi amakayama hisaya keleti nagaifema haviꞋya amakupi maleꞋya amametitima hisaya veafeꞋene kahavi-negoe. 21 Nenafagae mage huꞋna kahavi-negoe kagaya nagaiꞋenema mainageꞋna nagaya kagaiꞋenema maugetaꞋama huꞋa kava huꞋya nagaifema amakupi malenaya veala nagoke vea kanoꞋa taꞋagaiꞋene maisageꞋya mukiꞋa mopale veaꞋmoꞋya kagayama hu-na-tanageꞋnama emainoa yafema haviꞋya amakupi maleꞋya amametiti hisae. 22 TaꞋagayama nagoke taꞋaipaleꞋma mauꞋa kava huꞋya nagoke amaipale maisaya yafe naminana tokiya hale yaniꞋa ago amaminoe. 23 Amakaya nagoke vea kanoꞋa mai-lama huꞋya maisaya yafe nagaya amakaiꞋenena maugeka kagaya nagaiꞋenena mainane. Kagaya hu-na-tanageꞋna emainoa yafema mukiꞋa mopale veaꞋmoꞋya havisaya yafeꞋene nagaifena kahau kayamopafi negahaigeka aniꞋa huka ma mopale veafeꞋene kahau kayamopafi kahau-mainea yama havisaya yafe kagai kema havimalenaya veaꞋmoꞋya nagoke vea kanoꞋa maisae.

24 Nenafagae ma mopama taloma ohunana kanafina nagaifena kahau kayamopafi kahaigekama naminana tokiya hale yaniꞋa nagaiꞋma naminana veaꞋmoꞋya agesaya yafe nagaya maisua kumate maisae huꞋna nehue. 25 KanaleꞋya huka fatago hu-mainana Nenafagae ma mopale yafema amaugafa aliꞋya nehaiya veaꞋmoꞋya kagaila okagenagi nagaya ago kagaila kage-mainoafe ma ma mainaya veaꞋmoꞋya nagaiꞋma hu-na-tanageꞋna emainoa yafena ago haviꞋya ageꞋya hu-mainae. 26 Nagaifema kahau kayamopafi kahau-mainea yana amakai amakupi malesana yafe aepakaꞋa hu-falote huꞋna hama-pai-mainoanagi nagoꞋene hama-paigahue. Nagaya amakupi maisua yafe aepakaꞋa ago hama-pai-mainoe.” huno hu-maine.

<- Yoni 16Yoni 18 ->