5 NagaiꞋma hu-na-tegeꞋna emainoa kanolega menia eteꞋna ugahuanagitama nago vekamoga nagaifena ‘Hanatega neꞋvane?’ huka nahavi-nokane. 6 Nahavi-nokayanagi nagayama tamaha-pai-mainoa kehe tamakesa havitama tamahau nehae.

7 Tamahau nehayanagi tamage-lafa huꞋna tamaha-nepauve nagayama oꞋvisuana tamaya hisia kanoa omegahigi nagayake uteꞋna tamaya hisia kanoa hu-tesugeno tamakaitegama esiana kanale kanaꞋa falote hu-lama-tegahie. 8 EfaloteꞋma hisiana tamaya hisia kanomoꞋa mukiꞋa ma mopale veaꞋmogami kefo yama nehaya aepaꞋamiene kanale kavaꞋma nehaya aepaꞋamiene Anumaya KotiꞋa kaiyekema hu-ma-tesia yamo aepaꞋaene hu-falote hisigeꞋya haviteꞋya agegahae. 9 Kefo yamo aepamofena tamaya hisia kanomoꞋa mage huno hugahie ‘Yisasifena havitama tamakupi maletama tamametiti nohaya yafe kefo yatamia hane.’ huno hugahie. 10 Nagaya Nenafa mainelega eteꞋna ugahuanagitama nagoꞋene nagaila onagesayafe tamaya hisia vekamoꞋa kanale kavaꞋma hisaya yamo aepaꞋa hu-falote hinagetama havitetama agegahae. 11 Anumaya KotiꞋa ma mopale kava kanoa, Satanina, ago kaiyekea hu-tenea yafe tamaya hisia vekaꞋa Anumaya KotiꞋma kaiyekema hu-ma-tesia yamo aepamoꞋa hu-falote hinagetama havitetama agegahae.

12 Nagaya kasagoꞋya kea tamaha-paigahe nehuanagi kanaꞋage hu-mainea yafe tamakaya havilama hutama ohavigahae. 13 Ohavigahayanagi Anumaya Kotina tamageꞋage nehia AvamuꞋamoꞋma esiana agaiꞋalegati mukiꞋa Anumaya Koti tamageꞋage kea tamaha-paigahie. Agesafiti kea tamaha-opaigahianagino nehavia keꞋageꞋene haenagama esia kanafima falote hisia yamo kene tamaha-paigahie. 14 Tamaha-painageno ani kanomoꞋa nagayama hu-mainoa kea tamakaila tamaha-paisia yafe nagai nagia tusiya huno ali-saga hugahie. 15 Hugahianagi mukiꞋa NenafaꞋma malenea yana nagaiꞋniꞋa yamaꞋage fatago huno hanea yafe mage hu-mainoe ‘Alu Aotage AvamuꞋmoꞋa amisua kea alino tamakaila me lamaha-paigahie.’ huꞋna hu-mainoe.”

16 “Osi kana kanoꞋa nagoꞋene onagegahagi osi kana kanoꞋa maitetama etetama nagegahae.” huno hie. 17 HigeꞋya nagoꞋa agaiꞋaenema tokaeꞋya nemaiya anagaꞋamoꞋya amakaiꞋamifina mage hae “Osi kana kanoꞋa onagegahae huno nehuno etetama osi kana kanoꞋa nagegahae huno nehunoꞋma nehia kemona aepaꞋamoꞋa hanaꞋa hu-maine? ‘Nenafatega visua yafe nehue.’ huno nehia kemona aepaꞋa nohavune. 18 Osi kanaꞋaema hia kemona aepaꞋa naꞋane huno nehie? Tagaya agayama hia kea nohavune.” huꞋya nehae. 19 NehuꞋya havigegahema haya kea YisasiꞋa ago aguꞋafinaga haviteno mage huno hie “Hua kemoꞋa ‘Osi kana kanoꞋa nagaila onagegahagi etetama osi kanaꞋa maitetama nagegahaema.’ hua kehena tamakaya lamakaya tamakaitamifina mani kemona aepaꞋahe huge havige nehao? 20 Tamage-lafa huꞋna lamaha-pauve tamakaya tamataleꞋnama visua yafena avia ategahayanagi ma mopale veaꞋmoꞋya muse hugahae. Tamakaila hagoteno tamahau hu-tesigetama haenagaꞋa ai-yahae hutama muse hugahae. 21 AꞋmoꞋma nafaꞋnema ategahema nehuno agatama aisia kana falote hisia yafe hauna hianagi nafaꞋnema ago atetenoꞋa ‘NafaꞋnea ago atoe.’ huno muse nehuno agatama ai-mainea yafena age-kani-maine. 22 Ani kanamoꞋa tamakaipina hane. Menia tamakaya tamahau nehayanagi eteꞋna tamakesugenoꞋa tamakupina muse yamoꞋa hiya hinageno nago kanomoꞋa ani muse yana tamaha-ofalegahie. 23 Ani kanama evaꞋyima hisiana tamakaya nagaila nago yafena nahavi-okegahae. Tamage-lafa huꞋna tamaha-pauve nagaifema hutama nagai nagima ayetama nago yafema Nenafama havigesayana mukiꞋa havigesaya yana afaꞋa tamamigahie. 24 NayoꞋene meniene nagaifena nehutama nagia ayetama nagoke yafena Nenafana haviokenayane. Nagi menia muse yatamimoꞋma tamakupina hiya huno hanesia yafena nahavigegeꞋna tamamino.”

25 “Mani kea tamakaila avame kefi hu-maleꞋna tamaha-nepauvanagi haenagaꞋa mani avame kea nagoꞋene ohugahuanagiꞋna hu-falote huꞋna Nenafafena tamaha-paigahue. 26-27 Hu-falote hisugetama ani kanafina nagai nagile havigegahagi nagaya ‘Tamakaifena Nenafana havigegahue.’ huꞋna ohunogi tamakaya nagaifena tamahau tamayamopafi nelamahaiya yafe NenafaꞋa tamakaifena hau ayamopafi nehainageno havigesaya yana agaiꞋa tamamigahie. Nagayama Anumaya Kotitegati emainoa kema tamakupi malenaya yafe NenafaꞋa tamakaifena hau ayamopafi nehaiye. 28 Nagaya NenafaꞋene mainoleti ma mopafina emainoe. Menia nagaya mani mopa ataleꞋna Nenafatega ugahue.” huno hie.

29 HigeꞋya agaiꞋaenema tokaeꞋya nemaiya anagaꞋmoꞋya mage hae “E, avame kefiti menia nohanagi hu-falote huka nehane. 30 Menia tagaya havunana kagaya mukiꞋa yana havimalenane. MukiꞋa veaꞋmoꞋya amakupima haviya yana ago havimainana yafe nago kanomoꞋa nago yafena kahavi-okesie. MukiꞋa yana havimainana yafe tagaya kagaifena Anumaya Kotitegati emainane huta tagupi malenone.” huꞋya hae. 31 YisasiꞋa kenonaꞋamilela mage huno hie “Meni tamakaya havitama tamakupina nemaletama tamametiti nehafio? 32 Haviho nago kanamoꞋa aupaꞋa egahema hia kanamoꞋa ago efalote hu-maine. Ani kanafina nagoke nagokeꞋmogatama nataletama kumatamile ute ete hugahae. Nataletama visageꞋna nagaiꞋnige maigahuanagi NenafaꞋa nagaiꞋenena maine. 33 TamakuꞋa namitetama tamaipa falu hutama hilato hutama maisaya yafe mani kea tamaha-pai-mainoe. Ma mopale mainesageno nago kanaꞋage yamoꞋa falote hugahianagi kolia ohiho. Nagaya ma mopafi auꞋava yana ago agaseꞋna kava yagai-mainoe.” huno hu-maine.

<- Yoni 15Yoni 17 ->