Aposolo 22

1 PoloꞋa ati vayaꞋmogami tokiya nomo fiate heti-maineno mage huno hamapaiye “NafuꞋnaganagatamaene nenafagatamaene haviho nagaya havi kavala ohunoa ke lamahapaigahe hugi haviho.” huno hie. 2 HigeꞋya Yuta vayaꞋmoꞋya amakaiꞋami kea Hipalu kefiti hia kea haviteꞋya ke ohuꞋya mainageno hamapaiye.

3 Nagaya Yuta kano mainoe. ItaꞋnimoꞋa natenea kumala ala kola Silisiae osi kumaꞋnia Tasusie nateneanagiꞋna manima mainona kumate Yelusalemu emaineꞋna ala huꞋna KamalieliꞋa mukiꞋa taginago-vanagomogami kahegi kemo aepaꞋa hu-naveligeꞋna havimainoanagitama tamakaya meni kanafima Anumaya Koti kema akave malaya kava huꞋna tusiya huꞋna nagula amitafa humainoane. 4 Nagaya nayona Yisasi akave nehaya veala tusiya huꞋna ali haviya humateteꞋna hamaeꞋna fali-mategahe veneꞋnene aꞋnene amatafa huꞋna nofiteti kisalu kimateteꞋna nofipi amavaleꞋna amatenoane. 5 Ani kavaꞋma humainoa kea ala mono nopi uhagote mainea kava kanoene Kanisole vayaꞋene age-mainayanagiꞋya tamahapaigahae. Ani vayaꞋmoꞋya nago autaꞋma kaeꞋya namiteꞋya “Tamasigusi mainaya tafu-taganagamitega alika vuo.” huꞋya hageꞋna aliꞋna mage huꞋna hue “Yisasi akave neꞋvaya vayala Tamasigusi momatafa huꞋna nofiteti kisalu kimateteꞋna amakata aisia ya alisaya yafe Yelusalemu amavaleꞋna egahue.” huꞋna humainoane.

PoloꞋa agaiꞋama Yisasina aguꞋa aminea yamo aepaꞋa hamapai-maine.

6 YagemoꞋa amuꞋnokaꞋno higeꞋna Tamasigusi uvaꞋyi hugahe hugeno aupaꞋa ikapinagatila tusiꞋa hale yamo nagaitela meyevasa humaine. 7 Meyevasa higeꞋna mopafi asaga hu-laviteꞋna havugeno nagola ala kefiti mage huno hie “Sologae Sologae naꞋa higeka nagaila ali haviya hunenatane?” huno humaine. 8 HigeꞋna kenonaꞋa mage huꞋna hue “Alamogae kagaya tagae?” huꞋna hugeno nagaifena mage hie “Nagaya Nasaleti YisasiꞋnae. Nagaila maika ali haviya hunenatane.” huno humaine. 9 HigeꞋya nagaiꞋenema mainaya vayaꞋmoꞋya hale yamaꞋa agayanagi nagaila kema nahapaiya agea ohavinae.

10 Ohavinagi nagaya mage hue “Alamogae naꞋa hisue?” huꞋna havigogeno mage huno hie “Hetika Tamasigusi ugenoꞋo. VisanagenoꞋa mukiꞋa aliꞋyama alisana kea nago kanomoꞋa kahapaigahie.” huno nahapaiye. 11 NahapaigeꞋna nehavugeno hale yamaꞋamoꞋa tusiya huno aye vasa higenoꞋagino naulaga oꞋagogeꞋya nagaiꞋenema umainona vayaꞋmoꞋya nayate aligeta Tamasigusia umainone. 12 Unana nago kanomo agia AnanaiyasiꞋe anile nemaiyanagino tusiya huno Anumaya Koti kahegi kea akave nemalea kanogiꞋya mukiꞋa ani kumateꞋma mainaya Yuta veaꞋmoꞋya “Kanale kano maine.” huꞋya agia alisaga nehaiya kanoe. 13 Ani kanoa AnanaiyasiꞋe nagaila navate me heti-maineno mage huno humaine “Pologa nenafugae kaulagamoꞋa eteno aigali hisie.” huno higeno naulagamoꞋa aigali higeꞋna anile aupaꞋa ani kanoa age-mainoe. 14 NeꞋagogeno AnanaiyasiꞋa nagaifena mage huno nahapaiye “TaginagomoꞋya agima alisaga humainaya Anumaya KotiꞋa agaiꞋa haiya yafema havisana yafeꞋene Fatagoma Humainea Kanomoma ageteka agai avayafiti kema havisanafene huno kagaila hapali-maine. 15 Hapali-maineanagika agaifena huhaleka hamanepaika age-mainana yafeꞋene havimainana yafeꞋene mukiꞋa vayaꞋmogamina hamapaigane. 16 NaꞋa higeka agava mainane? Hetika ugeꞋya Yisasi agile tina falegatesageno Anumaya KotiꞋa kefo yakaꞋa aye haꞋmi-taleno.” huno humaine.

AnumayamoꞋa Polona Yuta vea omainaya veapi mono kea mo huhalesiafene huno hutene.

17 HigeꞋna nagaya eteꞋna Yelusalemu emaineꞋna ala mono nopi haiꞋna Anumayamotega havinegeꞋna nagola himona kana yana age-mainoe. 18 Agoana Yisasina agogeno nagaifena mage huno humaine “Male mainaya veaꞋmoꞋya nagaifema hisana kehena ‘Tamage nehane.’ huꞋya ohavigahagi Yelusalemua neꞋataleka kaiyayeka alu kumate vuo.” huno humaine. 19 HigeꞋna nagaya mage hue “Anumayanimogae nagaya mukiꞋa Yuta veaꞋmogami mono nopi falege falege huꞋna kagaifema haviꞋya amakupi malenaya veala amavaleꞋna kina nopi mo humateteꞋna kaꞋyona neꞋamamiꞋna humainoa kea mani vayaꞋmoꞋya ago havilinae. 20 Havilinagi SitiveniꞋa kagaifema hamanepaiya kanoma hayagenoꞋma faligeꞋna nagaya avate heti-maineꞋna ‘Kanale kava nehae.’ huꞋna hayaya vayaꞋmogamina kenaꞋamile yagaiꞋna mainogeꞋya hayageno fali-maine.” huno hamapaiye. 21 HigeꞋya AnumayamoꞋa nagaifena mage huno humaine “Hetika vuo. Nagaya hugatesugeka ayaꞋaya kotega Yuta veaꞋne omainaya veapi hugategahue.” huno higeꞋna havimainoe huno humaine.

PoloꞋa “Nagaya Lomu kano mainoe.” huno ati vayala hamapaimaine.

22 “Yuta vea omainaya veapi ugahuema.” hia keleti amaipa haviya nehuꞋya ala kegefafiti Polofena mage huꞋya hae “Haegeno falino. NaꞋa augafa kanomoꞋa afaꞋa omaigahigi ago haegeno falino.” huꞋya humainae. 23-24 Ala kenake nehuꞋya siotaꞋamia asagi neꞋataleꞋya kugukegeꞋya kateꞋya hagaꞋyu hu neꞋatageno ati vayate ala kava kanomoꞋa mage hie “Hailagi ataleho.” nehuno ati vayaꞋmogamife “Tokiya notifi Polona avaletama haiho. VayaꞋyagamoꞋya ala kefitiꞋma Polona ‘Haegeno falino.’ huꞋya haya kemona aepaꞋama havisuafe hegi kaꞋyoteti Polona aikolisageno ani kemona aepaꞋa tahapaisie.” huno humaine. 25 HigeꞋya avaleꞋya hegi kaꞋyoteti haegahe nofiteti kineꞋatageno PoloꞋa ani aliꞋyate kava neꞋyagaiya ati kanomofena mage huno havige “Lomu kahegi kemoꞋa ‘Kanalelagi Lomu nofi kanomona* kaiyekeꞋa havitama fatago hutama kaiyekea huoꞋatenetama hegi kaꞋyotetila haeho.’ huno humainefi?” huno hamavige-maine.

26 Higeno ati vayateꞋma kava neꞋyagaiya kanomoꞋa anima hia kea haviteno anile ataleneno ala kava kanomote mage huno mo hie “Kagaya hanaꞋa hugane? Mani kanoa fatago huno Lomu nofi kano* maine.” huno hapaiye. 27 Higeno ati vayate ala kava kanomoꞋa Polote eno mage huno havige “Kagaya Lomu nofi kano mainano?” huno havigegeno PoloꞋa “E.” huno humaine. 28 Higeno ati vayate ala kava kanomoꞋa mage hie “Nagaya kamani vayala kasagoꞋya moneꞋniꞋa miyana amamiteꞋna Lomu nofi kano hapae-mainoe.” huno higeno PoloꞋa mage hie “Kagaya aniꞋa humainanagi nagaya itaꞋniꞋmoꞋa nategeꞋna Lomu nofi kano fatago huꞋna mainoe.” huno humaine. 29 HigeꞋya hegi kaꞋyoteti amigahema haya vayaꞋmoꞋya ani kea haviteꞋya anile aupaꞋa neꞋataleꞋya vageno ati vayate ala kava kanomoꞋa havigeno “PoloꞋa Lomu nofi kano fatago huno mainegeꞋna nofila hutenoe.” huno tusi yate kolia humaine.

PoloꞋa Yuta kanisole vayaꞋmogami amaulagale kaiyekea huhaleno humaine.

30 Kolia nehuno mo faeteno egamaga Yuta vayaꞋmoꞋyama Polofe “Ma kava humaine.” huꞋya humainaya kemona aepaꞋa havigahe ayapiti nofila kalu heneꞋateno ala mono note kava vayaꞋene mukiꞋa Yuta vayaꞋmogami Kanisole vayaꞋenefe “Melitalu hiho.” huno higeꞋya melitalu humaletageno Polona avaleno elavino amuꞋnoꞋamifi me hetitene.

<- Aposolo 21 Aposolo 23 ->