1 PoloꞋa Tepi kumate uno Lisitala kumate umaine. Ani kumatela nagola Yisasife havino agupi malenea kanoa maine. Agia TimotiꞋe. Ani kanomoꞋa Yuta aꞋmo nafaꞋne mainegi nefaꞋa Isaleli kanoa omainegi, Kaliki kano mainegeno, itaꞋamoꞋa Yisasina aguꞋa amitafa humainea alagino maine. 2 Ani Lisatalaene Aikoniamuenema maineꞋya Yisasi anagaꞋmoꞋya Timotifena “Kanale kano maine.” huꞋya humainae. 3 Hageno PoloꞋa Timotifena mage hie “TaꞋagaiꞋene tokaeta vaiyesune.” Visuna kotega mainaya Isaleli veaꞋmoꞋya kagaila negafaꞋa Isaleli kanoa omainegi, Kaliki kano maine, huꞋya ago havimainagi havigu ani yafe amaipa haviya huyafene huno nehuno Timotina avaleno Mosese kemo akave maleno agoya anoꞋya laga humaine. 4 NaꞋa huteꞋya alu kumate kumate neꞋuꞋya Yelusalemu mainaya Aposolo vayaꞋene soka vayaꞋene humalenaya kema akave malesaya yafe hamapai-mainae. 5 HamapaigeꞋya Yisasi anagaꞋmogamina amametiti humainaya yamona tokiyaꞋage higeꞋya mukiꞋa yupa nagoꞋa veaꞋnea ete ete huꞋya egasago hageꞋya amakaiꞋenena tokaeꞋya mainae.

6 Alu Aotage AvamuꞋmoꞋa “Esia kotega* nagai ke hamaopaigahae.” huno nagalu humateneanagiꞋya PoloꞋagi SailasiꞋagi Timotigamina Faligia kotegaene Kalesia kotegaene umainae. 7 Misia kotega uvaꞋyi huꞋya Pitinia haigahe hayanagi Yisasi AvamuꞋmoꞋa “OꞋviho.” huno nagalu humatene. 8 Nagalu humategeꞋya Misia kola agaseꞋya Taloasi kumate elavi-mainae. 9-10 Ani kegela PoloꞋa nagola himona kana ya ageana nagola Masetonia kotega kanomoꞋa hetino maineno ke huno mage huno humaine “Kagaya hagelina lakaeka Masetonia me lahaꞋmao.” huno higeno PoloꞋa agetegeta Anumaya KotiꞋa tagaife “Ani kotega utama veaꞋmogamina Yisasife kanale mono ke mo hamapaiho.” huno humaineanagita tagaya aupaꞋa Masetonia visuna kafe atineꞋayone.

11-12 Taloasiti tipi kalefi haisaga humaunageno tavaleteno aiyayeno fatago huno Samotalesia ti amuꞋnopi hanea kumate euvaꞋyi higeta mo faeteta natena ufatago huno haigeta Neapolisi hai vaꞋyi huteta mopafi euta Filipai kumate euvaꞋyi humainone. Filipai kumala Masetonia veaꞋmogamina ala kumaꞋamie. Nayona Lomu veaꞋnea eꞋya mainaya kumale. Tagaya ani kumate euvaꞋyi huta nagoꞋa kana mainone. 13 Maineta Sapati yupa ani kumaꞋmona kegiꞋyamo hiꞋyenale uteta titega lavita anilega Anumayamotega havinegaya kumala hane huta lavunanagi nagoꞋa aꞋneyaga alitalu huꞋya mainageta Yisasi kea mo hamapai-mainone. 14 Hamanepaunageno nagola ani kema maino havia aꞋmo agia LitiaꞋe. Tayataila kumateti alagino haesate oko kena talo huno mone aliꞋya neꞋalia alagi Isaleli veaꞋne omainaya veapiti a maineanagi aluya huno Anumaya Koti agia alisaga nehia alagino ani aꞋmoꞋa PoloꞋma hia ke maino nehavigeno Anumaya KotiꞋa aguꞋa alino aiyahae huteno havisia agu agesa amine. 15 Amigeno haviteno haenagaꞋa mukiꞋa agaiꞋa anagaꞋaene tina fale-matenae. Tina fale-matetageno tagaila mage huno lahapaiye “Musetami nehue nagaifema ‘Yisasina aguꞋa amitafa hia a maine.’ hutama hinutamahena nagaila noniꞋafi emaiho.” huno tokiyaꞋage ke higeta agayama hia kea akave malenone.

16 Nago yupa Anumayamotega havinegona kumate ugahe katega neꞋunageno nago nofipi maineno miya noꞋalia aliꞋya neꞋalia munala katega fotu hunanagi Kefo AvamuꞋmoꞋa aguꞋafi mainegeno aune laga huno haenagama vaꞋyi hisia yafema havigagenoꞋa hufalote huno hamanepaiya munalagiꞋya kava vayaꞋamoꞋya humainea keletila tusiꞋa mone neꞋaliyane. 17 Ani munaꞋmoꞋa PoloꞋene tagaiꞋene takave neꞋeno keha keha huno mage hie “Ma vayala anafinaga mainea Anumaya Kotina aliꞋya vayaꞋamoꞋyae. Anumaya KotiꞋma tamaku tamamema aligatisiafe kanale kate kea tamahanepaiye.” huno humaine. 18 Nehuno mukiꞋa yupa ani kegeꞋya maino higeno Polona aipamoꞋa haviya higeno maiyahae huno ani Kefo AvamuꞋmofe mage huno humaine “Yisasi Kalaisina agai agileti kahanepauve ani munaꞋmo agupitila hati-lavika vuo.” huno higeno aupaꞋa ani Kefo AvamuꞋmoꞋa ataleno umaine.

19 VigeꞋya ani munaꞋmo kava vayaꞋamoꞋya agayana higeꞋya monema neꞋaliya kamoꞋa tilegeꞋya aepaꞋa ageteꞋya Pologani Sailasiganina anatafa huteꞋya anavayu huꞋya vea atagu nefaya kumapi kaiyeke hunatesaya vayate anavaleꞋya umainae. 20 Yasi vayate anavaleꞋya mage huꞋya mo hamapaiye “Ma kanolatana Yuta kanolatanagiꞋana tagai kuma alihaviya nehaꞋe. 21 VeaꞋne amavaya huꞋana ‘MaꞋa hiho.’ huꞋana hulaveli-neliꞋageta tagaya Lomu veaꞋmogata ani kavaꞋma hisunana tusiya huno haviya hugahie.” huꞋya humainae. 22 HageꞋya melitalu humainaya veaꞋmoꞋya “Tamage nehae.” huꞋya hageꞋya Yasi vayaꞋmoꞋya mage hae “KenaꞋania ali hatata hutalenetama hegi kaꞋyoteti hanaeho.” huꞋya hageꞋya hanae-mainae. 23 Hegi kaꞋyoteti tusiya huꞋya anamulo-nalo huꞋya hanaeteꞋya kina nopi nofi hunateteꞋya ani kina nopi kava kanomofe mage huꞋya hapaiye “Ma kanolatatela tokiyaꞋage huka yagaiyo.” huꞋya humainae. 24 Na ke hageno haviteno kava neꞋyagaiya kanomoꞋa anavaleno tole ayenalagi-male nopinaga anateteno anaiya nago yosa amuꞋnopi vaiteno aitalako hunatene.

25 Hunatayanagi anakaya ani kege amuꞋnona yagame nehuꞋana Anumayamotega nunamu huꞋana havinegaꞋageꞋya kina nopi mainaya vayaꞋmoꞋya haviꞋya mainae. 26 Mainageno anile aupaꞋa tusiꞋa imi neꞋalino ani kina note ayevasaga huꞋya kimalenaya yosa ali kanage kanagu higeno mukiꞋa fitayagamoꞋa aiyaki-lavigeꞋya mukiꞋa kina nopi mainaya vayaꞋmogami amayakopitila nofiꞋyagamoꞋa kaluhelavi-maine. 27 Aikalu-helavigeno kina vayate kava kanomoꞋa faeno maineleti hetino mogeteno mukiꞋa fitayagamoꞋa ago yaki-mainegeno mage huno agesa havimaine “MukiꞋa kina vayaꞋmoꞋya ago falae.” huno ayaꞋaya naepe kaꞋyona alisagino agaiꞋa ageꞋya fakaligahe humaine. 28 Nehigeno PoloꞋa ala kefiti mage huno humaine “KagaikaꞋa kaugafa ali haviya ohuo. Tagaya mukiꞋamogata afaꞋa mainone.” huno humaine. 29 Higeno ani kava kanomoꞋa vayafe “KaꞋnila alitama eho.” huno hunemaleno aiyayeno ani nopinaga hai-faleno monaketeno kolia huno atali nehuno Pologani Sailasiganina anavate eno anaiyafi mesaga hulavi-maine. 30 Hu-laviteno ani nofipiti anavaleno kumatega viaꞋyamo anakaife mage huno hanavige “Musetani nehugi naꞋa hisugeno Anumaya KotiꞋa nagu namena aligatigahie?” huno hanavige-maine.

31 HigeꞋana mage huꞋana hapaiꞋe “Anumayati Yisasife havika kagupi maleka kametiti hisanageno Anumaya KotiꞋa kagu kamena ali-negatino anagakamogamiene ali-gatisigetama agai anaga maigahae.” huꞋana hapai-mainaꞋe. 32-33 HuteꞋana ani kanoene mukiꞋa agaiꞋa anagaꞋaene Yisasi mono kea huhaleꞋana hamapai-mainaꞋe. HamapaitaꞋageno ani kegekeꞋya anavaleno amuna sese hunateteꞋya anile aupaꞋa ani kanoene agaiꞋa anagaꞋaene tina fale-matenaꞋe. 34 Tina falematetaꞋageno anavaleno nomaꞋafinaga umaineno kavela anamiteno tusiya huno agaiꞋaene agaiꞋa anagaꞋaene Anumaya Kotina amakuꞋa amiteꞋya amametiti haya yafe tusiꞋa muse humainae.

35 Muse hayanagi kotigeno Yasi kanomoꞋa ati vaya humategeꞋya eꞋya mage me hae “Ani kanolatana afaꞋa anatalegeꞋana viꞋo.” huꞋya humainae. 36 Hageno kina vayate kava kanomoꞋa ani kea mage huno Polona hapaiye “Yasi vayaꞋmoꞋya nagoꞋa vaya humatageꞋya eꞋya tanakaife mage hae tanakaya kina nopitila neꞋataletana tanaipamoꞋa kanale nehinagetana afaꞋa viꞋo.” huꞋya me hanapaiye.

37 Higeno PoloꞋa ati vayafe mage huno hamapaiye. “TaꞋagaya Lomu kanolata* mainoꞋagi haviya hulaꞋateꞋya taꞋagai kaiyekea haviteꞋya fatago huꞋya kaiyekea huotaꞋateꞋya vea amaulagafina hegi kaꞋyoteti tusiya huꞋya taꞋamulonalo huteꞋya nofila hulaꞋatenagi menia naꞋa higeꞋya falakiꞋya taꞋatalegahe nehae? Tamagelafa hutaꞋa kesila oꞋugahuꞋagi amakaya amakaiꞋami male eꞋya ‘Kina nopitila ataletana viꞋo.’ huꞋya hulaꞋatesae.” huno humaine.

38 HageꞋya ati vayaꞋmoꞋya ani kea aliꞋya Yasi vayaꞋmogami mo hamapageꞋya “Lomu kanolata mainoꞋe.” huꞋana haꞋa ke haviteꞋya tusiꞋa koli humainae. 39 Koli huteꞋya kina nopi uꞋya amahau ke mo hunateteꞋya “Havi kava hunagetana haꞋe.” huꞋya kina nopitila anavale neꞋanataleꞋya mage hae “Musetani nehune mani no kumala neꞋataletana viꞋo.” huꞋya humainae. 40 HageꞋana kina nopitila ataleꞋana Litia nopi mogaꞋana anafuꞋanakanagamina amaketeꞋana amaku amamena ali lokiya vaisaya kea hamapaiteꞋana ani kumala ataletana umainaꞋe.

<- Aposolo 15Aposolo 17 ->