Aposolo
Alu Aotage AvamuꞋmoꞋa amaya higeꞋya Aposolo vayala alimainaya aliꞋyafe LukuꞋa kae-malene. LukuꞋa hagoteno Yisasife avona kae-malenegeno YisasiꞋa faliteno hetino ikapinaga haitekeno LukuꞋa fotiꞋa (40) kafu agava maineno mani avona kaemalene. Aposolo vayaꞋmoꞋya (Yisasi kema nehavigeno humatenea vayaꞋmoꞋya) Yisasina kanale keꞋa aliꞋya alu kote kotega vayaꞋmogamina mo hamapai-mainae. Pitana aliꞋyamaꞋa Sapta 1 leti 12 le hane. Polo aliꞋyamoꞋa Sapta 13 leti 18 le hanegi hapalika havio.

YisasiꞋa “Alu Aotage Avamula tamamigahue.” huno hulokiya vaino hamapai-maine.

1-2 Tiofilasigae hagoteꞋna kaemalenoa autaꞋmafina YisasiꞋma aepa heno ali-mainea aliꞋyaꞋene humaveli-mainea kene Anumaya Kotina Alu Aotage AvamuꞋmo tokiyaleti “NaꞋa maꞋa kava hiho.” huno Aposolo vayala* (agai kema nehavigeno humatenea vayala)* hamapaiteno ikapinaga haimainea yafeꞋene ago kaeꞋna kahapai-mainoe. 3 YisasiꞋa tusiꞋa augafa agataiya alino faliteno hetino Aposolo vayaꞋmogami amaulagale efalote huno fali-mainefitiꞋma hetino mainea yafena havise huno kasagoꞋya tokiya kavaꞋage humaine. FotiꞋa (40) yupa mopafina maineno efalote huno amaveliteno amataleno uteno eteno efalote huno Anumaya KotiꞋma kava yagaisia yafena hamapai-maine. 4-5 AmakaiꞋenema mainea kanafina mage huno hamapai-maine “Tamakaya Yelusalemu kumala ataletama oꞋviho. NenafaꞋma ‘Nago kanoa tamamigahue.’ hunoꞋma humainea kanoa avaletetama viho. Nagaya ani kanohena ago tamahapai-mainoane. YoniꞋa titeti falelamateneanagi tamakaya aupa kana kanoꞋa maisayana Nenafana Alu Aotage AvamuꞋamoteti falelamategahie.” huno humaine.

YisasiꞋa eteno ikapinaga haimaine.

6 Ani yupa Aposolo anagaꞋmoꞋya alitalu huꞋya maineꞋya Yisasifena mage huꞋya havinegae “Alatimogae menia ma kanafina Lomu kamani vayaꞋmogami amayapitila Isaleli vayaꞋmogati hafaleka kagaikaꞋa kava yagailatesanageno tokiyaꞋage hisifi?” huꞋya havinegae. 7 Havigageno YisasiꞋa mage huno hie “NenafaꞋa agaiꞋa tokiyaleti ‘Ma kanaene mukiꞋa kanafiꞋene maꞋa kava hugahue.’ huno huteno yagai-mainegi agayama hisia yana tamakaya havisaya yana omalene. 8 Omalenegi Anumaya Kotina Alu Aotage AvamuꞋamoꞋma tamakaiteꞋma esiana tokiyaꞋa tamamisigetama nagai kea Yelusalemuene mukiꞋa Yutia kotegaene Samelia kotegaene mukiꞋa ma mopamo atupale mainaya veaꞋnenena nagaifena hamapaigahae.” huno humaine. YisasiꞋa ikapinaga haimaine. 9 Mani kea huno haꞋno huteno ageꞋya mainageno mopaleti haino haino haigeno nako siaꞋmoꞋa melino aiso hulino avaleno haimaine. 10 HaigeꞋya amakaya ikapinaga agesaga huꞋya ageꞋya maiya anayufi tole kanolatana efeꞋage kena failiꞋana efalote huꞋana amakaiꞋene anile heti-mainaꞋe. 11 HetiꞋana mage huꞋana haꞋe “Kalili kumate veaꞋmogatama naꞋa higetama heti-mainetama ikatela aulula maitama nehae? YisasiꞋa tamataleno ikapinaga ago haiyanagi manima ikapinaga haiya avamete huno eteno elavisigetama agegahae.” huꞋana hamapai-mainaꞋe.

Yutasi kuma alisie huꞋya nago kanoa hapalitenae.

12 Amakaya Olivi yosa hanea agoꞋyaleti taviteꞋya aupaꞋale lagiꞋya vani kilomita vayaꞋamoꞋya Yelusalemua uvaꞋyi humainae. 13 UvaꞋyi huteꞋya nemaiya nona folamo huꞋya ana yapi kimale nopi haiꞋya mainae. HaiꞋya mainaya vayaꞋmogami amakia PitaꞋe YoniꞋe YemesiꞋe EtaluꞋe FilipiꞋe TomasiꞋe PatolomiuꞋe MatiuꞋe Alafiusi nafaꞋnea YemesiꞋe SaimoniꞋe kanomona nako agia SelotiꞋe YutasiꞋa Yemesi nafaꞋnene haiꞋya mainae. 14 Ani vayaꞋene aꞋneyagaene MaliaꞋa Yisasina itaꞋamoꞋene Yisasina aganaꞋamoꞋyaene nagoke amaku amakesale maineꞋya mukiꞋa yupa Anumayamotega muse huꞋya nunamu humainae. 15 Ani kanafina Yisasifema haviꞋya amakupi maleꞋya amametiti humainaya veala, vani hataleti tuetiꞋa (120) veaꞋne, mainageno PitaꞋa amakai amuꞋnopi heti-maineno mage huno humaine. 16 “NafuꞋnaganagatama Anumaya Kotina Alu Aotage AvamuꞋamoꞋa Teviti avayafiti hufalote huno nayona Yutasife humaine. Yisasima atafa hisaya kama amavelisia kanohe, aune laga humaine. Ani kemoꞋa ago falote huno tamage humaine. 17 Ani kanoa, YutasiꞋe, YisasiꞋenema tokaeta nemauna anagapi maineno Yisasi kea nehavigeno aliꞋyatela hutenea kano maine. 18 Ani kanoa, YutasiꞋe, kefo yama hia yamo anonaꞋa mone aliteno mopa miya humaleteno ani mopafi agoꞋya faigeno aipamoꞋa aitalaga higeno mukiꞋa aipamoꞋa helafi lavi-maine. 19 Helafi lavigeꞋya mukiꞋa Yelusalemuma mainaya veaꞋmoꞋya ani kea haviteꞋya ani mopamo agia amakaiꞋami kefina ‘Akelatama.’ huꞋya humainae. Tagai kefina ani agia ‘Kolama lavi-mainea kumale.’ huꞋya humainae. 20 TevitiꞋma yagamema humainea autaꞋmafina, Samupina, mage huno kae-maleneane

‘AgaiꞋama nemaiya kumala vaya omaino yu kuma hapaesie.’

huno kae-maleneane. Ani kemoꞋa nago kaiyaga mage huno humaineane

‘Alu kanomoꞋa agai aliꞋyatela alisie.’ huno humaineane.

21-22 Ani yafe nago kanomoꞋma YoniꞋa tima falematenea kanaleti aepa heno Anumayatia YisasiꞋene tagaiꞋenema vaiyatete huno huno egenoꞋma YisasiꞋa ikapinaga haimainea yupa tagaiꞋenema nemaiya vayapiti nago kanoa YisasiꞋma fali-mainefitiꞋma heti-mainea kema hamapaisiafe ani aliꞋyatela alita hetitesune.” huno PitaꞋa humaine. 23 HigeꞋya amakaya tole kanolafe “Anakayae.” huꞋya hageꞋana nago kanoa, Yosefe PasapasiꞋe kanomona, nago agia YasatusiꞋe, nago kanoa MatiasiꞋe huꞋya anakia ayemainae. 24-25 AyeteꞋya Anumayamotega mage huꞋya havinegae “Anumayamoga kagaya mukiꞋa vayaꞋmogami amakuꞋafina ago age-mainane. YutasiꞋma haiya kavaꞋma huteno tataleno havi kapi umainea yafe anonaꞋale alu kanomoꞋa hetino Aposolo kano maisie huta nehune. Kagaya ani kanolatapitila hana kano ago hapalika huneꞋatane? HuneꞋatana kanoa tavelio.” huꞋya havinegae. 26 Nunamuna huteꞋya anakia aote yate kaeteꞋya yopafi maleneꞋya nagoke avayu huꞋya agayana Matiasi agi avayu huteꞋya ani kanoa avaleꞋya hetitageno Aposolo vayapi maine.

Aposolo 2 ->