1 Mukia veamoya Yisasife Anumaya Kotima taugafa aligatigahe hutenea kanoa, Kalaisi maine. huyama haviya amakupi maleya amametitima hayana Anumaya Kotina nafaneyagaa mainae. Maineya Nelamafaa, Anumaya Kotifena, amahau amayamopafima hamaisigeya ania huyama Anumaya Kotina nafaneyagaahena hamaugahie. 2 Tagaya Anumaya Kotifema tahau tayamopafima tahaisigeta agai kema akave malesunana agai nafaneyagahe tahau tayamopafina nelahaiye huta havigahune. 3-4 Tagayama Anumaya Kotife tamagelafa huno lahaisiana agai kea akave malegahune. Agai kemoa kana ohuneanagita Anumaya Kotima latenea nafaneyagaa maineta ma mopale kefo kavala ago agase-mainone. Agaifema tagupi maleta tametitima hu-mainonana ma mopale kefo kavala ago ataleta agase-mainone.

5 Hana veamoya ma mopale kefo kavala ago ataleya agase-mainae? Yisasia Anumaya Kotina nafaneama maine. huya amakupi maleya amametitima hu-mainaya veamoya ma mopale kefo kavala neataleya ago agase-mainae. 6 Yisasi Kalaisia egeno tina faletetegeno fali-mainea kolamaamoa lavi-mainea yateti Anumaya Kotia tagu tamena aligatigahe hutegeno emainea kano maine. Ani kanoma emainea yafe titetikela lave-otinegi agaia kolamaaletiene taveligeta age-mainone. Anumaya Kotina Alu Aotake Avamuamoa kelamage kemona aepaa mainea yafe ania huno tave-nelie. 7-8 Yisasia Anumaya Kotima taugafa aligatigahema hutegeno emainea kanohena tagufa (3) yamo tahanepaiye, Anumaya Kotina Alu Aotake Avamuamoene timoene kolamaamoene tahanepaiya nagoke kate tahanepaiye. 9 Nehageta tagaya veamoyama hu falote haya kea nehavunanagi Anumaya Kotima hu-mainea kea Yisasia nagaini nafane maine. huno hu falote hunoma humainea kea veamogami kemona amakaseno ala humainea kegita havisune. 10 Anumaya Koti nafanehema haviyama amakupi maleya amametitima nehaya veamoya Yisasifena amakupi ago havimainagi Anumaya Kotifema haviya amakupi omaleya amametitima nohaya veanea Anumaya Kotia Yisasifema nagaini nafane maine. huno hu-mainea kema nohaviya yafe Anumaya Kotifena Havigeage kano maine. huya nehae. 11 Anumaya Kotia mage huno humaine Agola maige maige hisaya tamahaimula ago tamaminoe. hunoma hiana agola maige maige hisuna tahaimumona aepaa agaia nafane maine. 12 Nagoa veamoya Anumaya Kotina nafanehema Nagupi emaiyo. huyama hisayana agolama maige maige hisaya hamaimula ago ali-mainagi Anumaya Kotina nafaneamofema Nagupi emaiyo. huyama nohaya veamogamina Yisasia amakupina omainegeya agolama maige maige hisaya hamaimula oalinae.

13 Agola maige maige hisuna tahaimula ago ali-mainone hutama havilama hisaya yafe tamakaya Anumaya Koti nafanehe havitama tamakupi maletama tamametitima haya veamogatami mani avona kaena tamahanepauve. 14 Tagaya Anumaya Kotitegama nelahaisia yafema havigesunana havigahie. Havigahie huta havimainona yafe agaifena kolia ohuta agaite eupa huta havinegone. 15 Mukia yafema havigesunana havigahie. huta havilama hu-mainona yafe Havigesuna yana lamigahie. huta havimainone.

16 Nagola kefo kavala falisia augafa kefo kava haneanagi nago kanoa ania augafa kefo kavama hiseana ani kanomofe Anumaya Kotitega ke hutama havigeho huna nohugi nago negafuma agesanageno kefo kavama mainoma nehisia kanomofena Anumayamotega havigesanageno agola maige maige hisia haimula amigahie. 17 Mukia kefo kavala kefo yamaage hanegi kefo kavafema amakua aiyahaema hisayana ofaligahae.

18 Tagaya ago havimainone Anumaya Kotima atenea kanomoa kefo kavala maino huge huge nohie. Yisasie, Anumaya Kotima atenea nafanemoa, auvai neamatea yafe Satania melino haviya humategahena mematafa ohugahie.

19 Anumaya Koti nafaneyaga mainonagi mukia veanemoya Satani tokiyale aiyafinaga nemaiya yafe tagaya ago havimainone.

20 Yisasi Kalaisia, Anumaya Koti nafanemoa, eaamo aepaa agelama hisuna tagu tagesa ago tamineafe tamage Anumaya Kotina agelama nehuta agaiene nafaneamoene ailokaeta mainone. Ani kanoa tamage Anumaya Koti maineno agola maige maige hisuna tahaimumona aepaa maine. 21 Mainegi osi nafaneyaganimogatama kava yagaitama afaa Anumayamofena tamakesa havitama tamakua oamiho.