1 Yisasi anagala Yelusalemua mainageꞋna amaya hisaya mone amamisaya kea hugahe hue. Kalesia kotega mainaya veaꞋmogamina hamapaugeꞋya humainaya kavala tamakaya aniꞋa hiho. 2 Nagaya esua kanafina ani monema alitalu hisaya yafena nonahaigi SotamaꞋahe SotamaꞋahe alisaya monea ali fako hutama alu vaya amamisaya monea alitalu hute hute hiho. 3 Ani kava nehageꞋna esua yupa tamahaisia vayala hapalisageꞋna avo kaeꞋna amamiteꞋna humatesugeꞋya avoꞋene monene aliꞋya Yelusalemua ugahae. 4 Ugahagi nagaya visua nagesa hisugenofena amakaya nagaiꞋene ugahae.

5 Masetonia kotega mainaya anagaꞋmogamina mogeteꞋna tamakaitega egahue. 6 NeꞋeꞋna nago kanafina tamakaiꞋene yasima alisia ikatela maineꞋna alulegama ugahe hisugetama nagaila naya hutama ali kate nategahae. 7 AnumayamoꞋa kanalene hisigeꞋna nagayama visuana tamaketeꞋna aupaꞋa tamataleꞋna visua yafe onahaigi nagoꞋene ayaꞋaya kanagefa tamakaiꞋenena maisua nagesa nehavue.

8 Efesusi kumate maineꞋna kaveꞋma afulesia kanahe muse hisaya imu kisaya kanamoꞋa falote hutesigeꞋna ugahue. 9 Meni kanafina Anumaya KotiꞋa agai kea hamapaisuafe fita yakinateno tusiꞋa aliꞋyana namigeꞋna neꞋalugeꞋya kasagoꞋya veaꞋmoꞋya ani kea nehaviyanagi ani kemona kame vayaꞋa kasagoꞋya vaya mainae.

10 Nagaya Anumaya Koti aliꞋya neꞋalua kava huno TimotiꞋa Anumaya Koti aliꞋya neꞋalianagino tamakaiteꞋma visiana tamakaife kolia ohuno aipamoꞋa falu nehinageno kanaleꞋya huno maino. 11 “Afa kano maine.” hutama hu-haviya hu-oꞋateho. Falu yapi mainesigetama aya hutama hutesageno nagaya mainolega kanaleꞋya huno eteno esie. Agayaene nagoꞋa nafuꞋnaganaꞋyaene esayafe amakava mainoe.

12 ApolosiꞋa nenafufe nehue nagoꞋa nafuꞋnaganaꞋyaene “Kolini kumate vuo” huꞋna hamapaite hamapaite nehuanagi “Menia oꞋvisua nagesa nehianagiꞋna oꞋugahugi haenagama visua kanaꞋniꞋama hanesigeꞋna ugahue.” huno humaine.

13 KaꞋyetama mainetama Yisasife havitama lamakupi malenaya yana atafa hutama kolia ohutama lokiya vaitama maiho. 14 Nelama-fugamifena tamahau tamayamopafi nelahainage-tama mukiꞋa kavala hiho.

15 Tamakaya Setefanasifena havi-mainae. Kaliki kotega agaiꞋene agaiꞋa afamoꞋaene hagoteꞋya amakuꞋa aiyahae huteꞋya Yisasife haviꞋya amakupi malenayapiti mukiꞋa kanafina Yisasi anagala amaya humainae. 16 NaꞋa kava humaineꞋya Anumaya Koti aliꞋyana tusiya huꞋya neꞋaliya veaꞋmogami amaiyaꞋafi maiho.

17 Tamakaya alulega mainetama nahaꞋomaenayanagi menia SetefanasiꞋene FotunatusiꞋene AkaikusiꞋene nagaitega ageꞋna nahaꞋnemaeyafe tusiꞋa muse nehue. 18 Amakaya tamakaifema me nahapaigeno naipamoꞋa kanaleꞋya higeꞋna muse nehue. Muse nehuafe tamakai tamaipamoꞋa aniꞋa huno kanaleꞋya humaine. NaꞋa kava nehaya vayafena tusiꞋa muse hutama amakia alisaga hiho.

19 Esia kotega alu kumate kumate maineꞋya Yisasife haviꞋya alitalu nehaya veala “Mainafio?” huꞋya hu falu fala hunelamatae. AkuvilaꞋene PalisilaꞋene anakai nopima Yisasife haviꞋya melitalu nehaya veala AnumayamoꞋene ailokaeꞋya maineꞋya “Mainafio?” huꞋya hu falu fala hu nelamatae. 20 MukiꞋa mafi mainaya tafu-taganagaꞋya “Mainafio.” huꞋya hu falu fala hu nelamatae.

Tamakaya Anumaya Koti anaga mainayafe nagoke nagokeꞋmogatama tamayana oꞋami aꞋami hutama maiho.

21 NagoꞋa kea nago kanomona hapaugeno kae-maleneanagi nagaya PoloꞋna mamona atupa avona nagaiꞋni nayapiti kaeꞋna nelamamue.

22 Anumayamofe havino hau ayamopafi nomalea kanomona Anumaya KotiꞋa ali haviya hutesie. “Anumayatimogae aupaꞋa eno.” huꞋna nehue. 23 Anumayati Yisasi kayone yamaꞋa tamakaiꞋene hanesie huꞋna nehue. 24 Yisasi KalaisiꞋene aigaꞋmaeꞋna tamakaila naipa nelamamue. Tamage.