1 Kolini 14

Anumayamo kea huhaletama hisaya yafena tusiya huno tamahaino.

1 Hagotetama veafena tusiya huno tamahau tamayamopafi tamahaino. Anile Alu Aotage AvamuꞋmo lamamisia tokiya alisaya yafe musena nehutama tusiya huno tamahaino. Ani tokiya yapiti hagotetama AnumayamoꞋa tamakupima humainea kema huhaletama hisaya tokiyahena tusiya huno tamahaino. 2 AmakesamoꞋa nohavia kema hisia kanomoꞋa veala hamanopaigi Anumaya Kotina agaiꞋage hanepaiye. VeaꞋmoꞋya ani kea nohavigi falaki-mainea kea AvamuꞋmo hapaigeno humaine. 3 Humainegi Anumaya KotiꞋa amakupi humainea kema huhaleꞋya nehaya veaꞋmoꞋya nagoꞋamogami amametitia ali lokiya vaimatesaya kene amaya hisaya kene huhaleꞋya humatenae. 4 Nohaviya kefiti nehaya veaꞋmoꞋya amakaiꞋami amakuꞋamo tokiya vaisia yana neꞋamiyanagi AnumayamoꞋa amakupi humainea kema huhaleꞋya hisaya veaꞋmoꞋya Yisasife haviꞋya mono nopi melitalu nehaya veaꞋmogamina amaya nehae.

5 MukiꞋa veala amakesamoꞋa nohaviya kefiti hisageꞋnahena muse hugahe huanagi mukiꞋa veala Anumaya KotiꞋa tamakupi humainea kema huhaletama hisageꞋna aluya huꞋna musena hugahue. Anumayamo kema huhaleno nehisia kanomoꞋa agesamoꞋa nohavia kefiti nehisia kanomona agase-maineanagi ani kea hu yahae hisigeꞋya Yisasife haviꞋya melitalu humainesaya veaꞋmoꞋya havisageno hamaꞋmaeno amametita ali lokiya vaigahie.

6 Ani yafe nafuꞋnagana-gatama tamakaya mainesalega uvaꞋyi huꞋna ohavinesua kefitiꞋma tamahapaisugetama ohavisayana ani kemoꞋa tamaya ohugahianagi Anumayamo aepaꞋa havilama huꞋna mani kene AnumayamoꞋa falaki-malenea kene AnumayamoꞋa nagupi humainea kene huge hamave-lige huꞋna huhaleꞋna hisugeno ani kemoꞋa tamaya hugahie.

7 Nagi veaꞋmoꞋya kepitiꞋene otofitiꞋene yagamema hufatago huꞋya ohisayana veaꞋmoꞋya havilama huꞋya ohavigahae. 8 Nago kumateꞋma tuma hugahe keha kehama hisageꞋya havilama ohisaya kema hisayana vayaꞋmoꞋya hanaꞋa huꞋya haviteꞋya kamea hugahae? 9 Tamakaya aniꞋa humainae tamakesamoꞋma ohavinesia kema hisageꞋya hanaꞋa huꞋya ani kea havigahae? Ani kemoꞋa yasimoꞋma hia kava huno fanane hugahie. 10 Ma mopafi veaꞋmoꞋya alu amake alu amake neꞋaiyanagi mukiꞋa ani kemoꞋa afa yana omalegi ani kema nehaviya veaꞋmogami aepaꞋaene ke hane. 11 Haneanagi nago kanomoꞋa alu kefiti, nohavisua kema hisigeꞋna “Ohavua ke nehianagiꞋna ani kanoenena tokaeꞋna omaigahue.” huꞋna hugahue. 12 Tamakaya Anumayamo aliꞋyama aligahena AvamuꞋmoꞋa tokiyaꞋama tamamisia yafena aluya hunoꞋma tamahaisiana Yisasife haviꞋya amakupi malenaya veala amaya hutama ali lokiya vaimatesaya aliꞋyamo tokiyahekeꞋya aluya huno tamahaisie.

13 Ani yafema ohavinesia kefitiꞋma hisia kanomoꞋa ani kea hu yahae hisia tokiya alisia yafena Anumayamotega havigesie. 14 NagesamoꞋa ohavinesia kefiti Anumayamotega havigesuana ani kea nagesamoꞋa nohavianagi nagu nafaꞋnemoke ani kea huno havinege. 15 Ani yafena naꞋane hisue? NagesamoꞋa nohavia kefiti nagu nafaꞋnemoꞋa Anumayamotega havigegeꞋna nagaiꞋniꞋa havua nagesaene Anumayamotega havigegahue. Mono yagamea nagesamoꞋa nohavia kefiti nagu nafaꞋnemoꞋa hugahianagino nagaiꞋniꞋa nagesa havimainoa mono yagamene hugahue. 16 AniꞋa ohisanana kagu nafaꞋnemoke kagesamoꞋa nohavia kefitila Anumayamo agia alisaga hisigeꞋya nagoꞋa ani yafema ohavinesaya veaꞋmoꞋya kema hana kea nohaviyafe hanaꞋa huꞋya “Tamage nehie.” huꞋya Anumayamo agia alisaga hugahae? 17 Kagaya Anumayamofe muse huka kanaleꞋya huka agia alisaga nehananagi amakaya ohavisayana amakuꞋa ali lokiya vai noꞋamatane.

18 Nagaya mukiꞋa veala amakaseꞋna nohavua kefitila tusiya huꞋna nehua yafena Anumayamofena muse nehue. 19 Muse nehuanagi Yisasife haviꞋya mono nopi melitalu hisafina huhaleꞋna hisugetama havilama hisae huꞋna tagaiti kefitila faefuꞋa (5) ke kanoꞋa osiꞋa tamahapaisuana teni tauseniꞋa (10,000) kema nagesamoꞋa nohavisia kefiti hisua kemona agasegahie huꞋna nehavue.

20 NafuꞋnagana-gatama kefo yama hisaya yafena nute nafaꞋnemoꞋya nehaviya amakesamo avamete hu havitama maiho huꞋna nehuanagi alopa veaꞋmoꞋya nehaviya amaku amakesamo avamete havitama kanaleꞋya hutama ma ma Alu Aotage AvamuꞋmoꞋa tokiyama tamamisia kema tamahapauva kea fako hutama nafaꞋnemoꞋya nehaviya avamete tamaku tamakesa ohaviho. 21 AnumayamoꞋa mage higeꞋya avopina kae-malenayane

“Yuta veafe nayona mage huꞋna humainoane ‘NagaiꞋni veafe alu veaꞋmogami kefiti hamapaisuanagi aniꞋa huꞋya veganokano nehuꞋya nagai kea haviꞋya akave omalegahae.’ huno humainayane.”

22 NaꞋa humaineafe ohavinesia kefiti nehisageꞋya Yisasina amakaveꞋno hutenaya veaꞋmoꞋya haviꞋya Anumaya Kotina tokiya avame yamaꞋa neꞋageꞋya “Anumayamo kea tamage nehie.” huꞋya hisayafe amave-lianagi Yisasife haviꞋya amakupi malenaya veafe ani avame kea nohigi Anumaya KotiꞋa avayafiti humainea kema huhaleꞋya nehageno amaya nehie.

23 Yisasife haviꞋya melitalu hisafina mukiꞋa veaꞋmoꞋya nohavisaya kefiti kema hisageꞋya ani kavaꞋma oꞋagenesaya vealo Yisasina amakaveꞋno hutenaya vealo me havisayana hinageꞋya “Havigunagu kava nehae.” huꞋya hugahae. 24 Hugahagi mukiꞋa veaꞋmoꞋya AnumayamoꞋa amakupi humainea kema huhaleꞋya nehisageꞋya ani kavaꞋma oꞋagenesaya vealo Yisasina amakaveꞋno hutenesaya vealo hainefaleꞋya havinuꞋya Yisasife huhaleꞋya hisaya keleti amakaiꞋami “Kefo ya nehune.” huꞋya hisageno hisaya kemoꞋa amakaila kaiyeke humateteno fako humategahie. 25 Fako hamaisigeꞋya amakupima falaki-mainesia yana falote hisigeꞋya ageteꞋya Anumaya Kotite ape huꞋya Anumaya Koti agia alisaga nehuꞋya “Anumaya KotiꞋa tamakaiꞋene maine.” huꞋya hugahae.

MukiꞋa Anumayamo agima alisaga hisuna auꞋava kavala fatago kavakeꞋya hisune.

26 NafuꞋnagana-gatama naꞋa hisaya yafena naꞋane hisune? Melitalu hisayana nago veaꞋmoꞋya yagamea hisageꞋya nago veaꞋmoꞋya Anumaya Koti kea hisae. Nago veaꞋmoꞋya Anumayamo falaki-malenea kea agupi hapaiya kea huhaleno hisayana nago veaꞋmoꞋya AvamuꞋmo aminea kea agesamoꞋa nohavia kefiti nehisageno nago veaꞋmoꞋya ani kea huꞋya aiyahae hisae. Ani kavakeꞋya hutama veala amakuꞋa ali lokiya vaisaya kea hiho. 27 NagoꞋa veaꞋmoꞋya amakesamoꞋa nohaviya kefitiꞋma hinuꞋyahena tolemoganio tagufa veaꞋmoꞋyao amahaote amahaote hisageꞋya nagoꞋa veaꞋmoꞋya ani kea aiyahae hiho. 28 Ani kema aiyahae hisia kanoma omainesigeꞋya mono nopina ani kea ohuꞋya amakupinaga Anumayamofena ani kea hisae. 29 Tolemoganio tagufa veaꞋmoꞋyao Anumaya KotiꞋa amakupi humainea kea huhaleꞋya hisageꞋya nagoꞋa veaꞋmoꞋya ani kehena amakesa havi havi huꞋya fako huꞋya haviho. 30 Nago kanomoꞋa Anumaya Koti kea huhaleno nehisigeno AnumayamoꞋa nago kanomona agupi kea nehisigenoꞋa hagote kanomoꞋa kea ohuno mainesigeno anile kanomoꞋa kea hisie. 31 MukiꞋa vea amaya hisageꞋya haviꞋya kanaleꞋya huꞋya mai-lokiya vaisayafe mukiꞋamogatama tamahaote tamahaote Anumaya KotiꞋa tamakupi kea higetama huhaletama hiho. 32 AnumayamoꞋa amakupi humainea kema huhaleꞋya hisaya veaꞋmoꞋya mani kea hisaya yafeꞋene ohisaya yafeꞋene amakaiꞋami amakuꞋale kava yagaiꞋya mainae. 33 Anumaya KotiꞋa haviya havaya hisaya kavafena nohaigi ako hutama maisaya yafe nehaiye.

MukiꞋa Yisasife haviꞋya melitalu nehaya veaꞋmogami ani kava nehae. 34 AꞋnemoꞋya mono nopina kea ohuꞋya ako huꞋya maiho. Kahegi kema akave maleꞋya anauꞋamimo amaiyafinaga maineꞋya mono nopina ke haviꞋya nago kea ohuꞋya maiho. 35 Nago kemoꞋa kanama hamaisigeꞋya noꞋamifinaga umaineꞋya anauꞋamimona ani kehena hamavigesae. AꞋnemoꞋya mono nopina kea hisayana amakaye hisia kava hugahae.

36 Yisasi kanale mono kea hagoteno tamakaipiti falote humaineo? AꞋao aniꞋa ohune. “Tagaitige havimainone.” hutama nehao? AꞋao ani kemofena veganokanola ohiho. 37 Nago kanomoꞋa “AnumayamoꞋa nagupi kea higeꞋna huhaleꞋna hisua kano mainogeno AvamuꞋmo tokiya namigeꞋna mainoe.” huno hisia kanomoꞋa ma ma kae-malenoa kemona “Anumayamo kahegi kehe humaine.” huno hise. 38 Manima hua kema amakaveꞋno hutesaya veaꞋmogami kea ohaviho.

39 NafuꞋnagana-gatama Anumayamo kea huhaletama hisaya tokiyahe aluya huno lamahaigahianagi amakesamoꞋa nohavia kefitiꞋma hisaya veafena “AꞋao.” hu oꞋamateho. 40 MukiꞋa kavaꞋma mono nopima melitalu hutama nehaya kavala kaliso oꞋatitama fatago hutama hisaya kavakeꞋya hiho.

<- 1 Kolini 13 1 Kolini 15 ->