1 Pen mam ay sikop, ñin akay winiŋgamb, biynimb yerer giyakniŋ winiŋgamb ak, nimbip ma aŋgniŋgayn; 2 nimb key niŋbim: winiŋgamb kun ak, nup kond mindeniŋgambay ñin ak ma winiŋgamb. Bi tap siy dep gok, biynimb kin ambay won ak opay rek ak winiŋgamb. 3 Chinup miñiy tap bap ma giniŋgamb aŋgniŋgambay ñin ak apek, gos yomb yimb niŋniŋgambay. Kasek yiŋgen rek diy winiŋgamb kun ak, biyn ñapan tikniŋg gey yiwur gip rek ak giniŋgamb; pirik amniŋgiy rek ma ayniŋgamb.

4 Pen mam ay sikop. Nimb kisyim wip kind ak ma mindpim; miñmon yowip kind ak mindpim. Kun ak ñin yomb kun ak apek, biynimb gunap pirikiy gos yomb niŋniŋgambay rek, chin kunep ma niŋjun. 5 Chin Seytan ñapan nuk gok windin koy mindpay rek ma mindpun: chin Gor ñapan nuk windin sek mindpun. 6 Biynimb gunap kinamiy mindpay rek ma mindonjun; niŋrep giy mindonjun. 7 Biynimb wisin kinbay gok, kisyimken nep kinbay. Biynimb ñiŋg kilis ñimbiy sakiy aypay gok, kisyimken nep ñimbay. 8 Pen chin biynimb pumbnamb tapun gok, gosimb niŋyiŋg mindenjun. Biyomb anup gosimb niŋiy wasemb ay gon mey, chinup boŋg rek giniŋgamb. Chinup di nop yip jimñiy ayniŋgamb aŋgiy niŋmindiy mey, kim amniŋgambun. 9 Gor chinup yiwur yomb diyaŋ aŋgiy ma aŋgak; Ñiyand Jiysis Krays kuyip tuŋgasik dinimuŋ aŋgiy aŋgak. 10 Pen chinup aŋgiy kumak ak, kim mindon winiŋgamb akaŋ, kumon winiŋgamb ak minim ma mindip; am nuk yip mindiy mindnep mindoniŋgambun. 11 Pen nimb Gor biynimb nuk gunap kuyip niŋem simb gonimuŋ, minim tiksipiyn biy per gipim rek penpen aŋgñirep giy, Jiysis nup chiŋgrep giy, mindrep ginimimb.

12-13 Mam ay sikop. Biyomb nimbip kosyam minim tuŋgasikyiŋg, minim aŋgñiyiŋg mindpay gok, kuyip ma kirginimimb. Gor key aŋgek woŋg kun gipay ak; kuyip wasemb ay direp ginimimb. Pen nimb maŋgiysek kapkap jimñiy mindenimimb.

14 Biynimb woŋg ma giy mindrep ma gipay gok kuyip, minim kilis aŋgnimimb. Biynimb simb gek gospar ay mindpay gok kuyip, kapkap aŋgñirep ginimimb. Biynimb kisen Gor nup gosimb niŋsipay gok kuyip, kunep aŋgñirep ginimimb. Minek minek aŋgñiyiŋg yiruk ma niŋnimimb. 15 Biynimb gunap nimbip timey geniŋgiy, pen timey ma ginimimb. Biynimb nimb key gok yip mindrep gipim rek, biynimb yikop gok yip kunep mindrep ginimimb. 16-18 Jiysis Krays biynimb nuk mindpim ak, Gor mindip aŋgiy miñmiñ giyiŋg, nup aŋgniŋyiŋg mindem, nimbip yerer gek nup tep aŋgnimimb. Kun gem mey, nup tep yimb giniŋgamb. 19 Gor Kawnan chinup gos ñinimuŋ aŋgiy niŋyiŋg mindenimimb. 20 Biynimb Gor minim aŋgep gok minim aŋgeniŋgiy ma kirginimimb. 21-22 Pen biynimb gunap yesek aŋgniŋgiy rek ayip ak, niŋrep yimb ginimimb. Gor minim yipund giy ak aŋgeniŋgiy niŋiy dinimimb; yesek aŋgeniŋgiy ma dinimimb. Timey ar gunap ma nep ginimimb.

23-24 Gor Biyomb biynimb direp gip ak nup aŋgniŋiy apun, “Tesalonayka biynimb nip gosimb niŋbay gok kuyip, kond mindenimin ñin ar nip ak mindey, kuyip kond mindrep yimb ginimin. Biyomb chin Jiysis Krays andkind winiŋgamb ñin ak, minim bap ma mindek; gos kuŋay ma niŋniŋgiy apun.” Chin niŋbun: gos nuk key niŋiy nimbip dak ak, apun apun rek nimbip giniŋgamb. Pen nuk aŋgip rek nep gip ak, nimbip kond mindeniŋgamb ak mey, gos sek mindenimimb.

25 Mam ay sikop. Chinup gos niŋiy, Gor nup aŋgniŋnimimb. 26 Mam ay gunap kuyip niŋiy aŋgnimimb, “Pol bi gok minj tikiy apay, ‘Nimb mindpim?’ apay aŋgnimimb.” 27 Biyomb chin ak niŋmindip rek nimbip aspiyn, minj tiksipiyn kun biy, mam ay gok kuyip maŋgiysek riytiym gem niŋniŋgiy.

28 Biyomb chin Jiysis Krays nimbip simb niŋiy, direp giyiŋg mindonimuŋ.

<- 1 Tesalonayka 4