1 Âgofâc-nane, moc mupe. Wofuŋte erâ bubiaŋhec junšepieŋ. Dâŋ hâsine ijaha qâreŋke-ŋarezore manape mi quŋkekac, â ŋoŋe ine hume keteŋ eŋarezejec.

2 Ŋoŋe qâto jaŋere rucsoŋaŋ junšepieŋ, miti gie bapa bâbâsifucne, sahac hehetâc ŋic jaŋere rucsoŋaŋ hâcne junšepieŋ. 3 Anutu maŋzi kiŋaŋ qacneeŋgopeneŋ â Kristo Jesurao qohotaeŋgopeneŋ â mamanasiŋ-nâŋec sahacko mi râeeŋgopeneŋ, nâŋâc hâcne ma fârine bajueŋgopeneŋ. 4 No nahac sahacko siŋkezo murâ sâcne ezapo. Ŋic gâcne jaŋe sahacko siŋkeeŋgopieŋ no ijaha ezo murâ siric-jopazapo. 5 No fuarâ fohape šoaŋ 8 eme sahac-naneo ma bambiŋ, no Israe ŋicguruonec, Benjamiŋte ɋâric, no Judaŋiczi Judaŋic jaŋeraonec fuakicne hâcne, sâcmutâc dâŋte neŋgocne farisaio ŋic jupo, 6 šoɋac-nanere erâ kikefuŋ jaŋere râsi epo, sâcmutâc dâŋ sâcko tiŋne juju â bahacmâc jupo.

7 Eme no mârâc wiac bajuhuc manape fârine ewec, i šâhec ine Kristore erâ manape racne ewec. 8 No Wofuŋ-nane Kristo Jesu ere fuŋne hone šâŋitâc erâ manape furi sâko eme wiac mârâc epo bapo irec jâmbomac manape racne eekac. No Kristo rauckepemurâ ere erâ wiac sasawa ho jawa muhuc qikiŋne-fârepo. 9 No erao qohotahuc, sâcmutâc reŋkehuc kiŋfâsâc bâbâfua i mâcne. Kristo manasiŋkehuc kiŋfâsâc juju irec enareekac. Mamanasiŋhec jupe Anutuzi kiŋnanere maname tatara, irec mukopac. 10 Erâ no Kristo maŋzi hemiriŋkepe fafahare-ticnere tâpiri norao fuame šâic manawecko šuhuckerâ ehec manazepac. Eku hâmoc-ticnere hawari wâc bâfuazepac. 11 Iŋuc eerâ raku hâmockonec fafahare bâfuapere enareekac.

12 No nahacnere šiŋuc mi mukopac: Biac mao fisirâ eri bâfuapo. Mâc Kristo Jesuzi no rocnuwecte eri bâfuapemurâ hata gagasa i gasackeekopac 13 Âgofâc-nane, eri biac bâfuarâ ropo, i no nahacnere manape iŋuc mi ekac Kecšiŋuc ine eekopac: Wiac hetarapo i râpeckeekopac, â wiac mai-naneo râekicne irec menane sicneekopac, 14 ehuc Anutuzi Jesu Kristore erâ sambâŋte hefârecnuhuc mao eri râe-narewec, i bâfuapemurâ šâŋezi hone dendeŋnehuc gasackeekopac. 15 Soka tarakicne nâŋâc mâmâc sasawa wiac irecteaŋ hâcne henširiŋnehuc junšepeneŋ. Eme wiac mocte manapie hatane moc ekacko Anutuzi maŋŋeŋic batamaeme mana taraniŋmu. 16 Mâc hata âte warembeŋ ijaha âte ranšepeneŋ.

17 Âgofâc-nane bânie-ŋarepe honecnuhuc ijaha bâjâpecnunšepieŋ. Á ŋic gâcne sâc ijaha juhuc bânie-ŋareeŋgopieŋ jaŋerao wâc šâŋe fihuc junšepieŋ. 18 Ŋic tucne jaŋere ŋaza warehuc jupo, ši ine ki busâqochec mocwâc ŋazape: Jaŋe Kristo maripoŋ-ticne râsi ecneeŋgopieŋ. 19 Ŋic i jaŋe hâcne sisipiric bâfuaniŋmu. Hobu-jeŋiczi wofuŋ ejareekac, â wiac mimineheczi bubiaŋ qajareekac, â mâreŋkonec wiac maŋ mamanasu-jeŋic rofâreekac. 20 Nâŋâc ine sambâŋ hae irec fârine, eme irecnec hâcne bâbâpiaŋ-nâŋec Wofuŋ Jesu Kristo, e waharâ rocnâpoocte woŋec jueŋgopeneŋ. 21 E ŋic â wiac sasawa bawahac-joparâ jahacne rurumaŋko guruc-jopaocte tâpiri focnekac, tâpiri izi sahac-nâŋec waha qaqane bâtikieme e jahacne sahac iŋucne tatamac huririnehec eocmu.

<- FILIPI 2FILIPI 4 ->