LUKA 2

Jesu motec fuawec

(Mat 1: 18-25)

1 Dameŋ ira Roma ŋicwofuŋ sâko Augusto ere micdâŋ kecšiŋuc fuawec: ŋic mâreŋ sâc wose qâreŋ ejarezo. 2 Gie iŋucne mârâc mi bakicne, i Qirinio e Siria mâreŋko kia sâko juhame furune fuŋkekicne. 3 Eme ŋic mâmâc sasawa wose qâreŋ ejareniŋte haefuŋ-jeŋic sâc rafârembiŋ. 4 Rahapie Josefe e Dawidire ɋâric Galilaia mâreŋko Nasarete haeo juweczi iŋuc jaha Judaia mâreŋko Dawidire haefuŋ Betelehem ira rawec. 5 Ehuc ŋokac biŋe-ticne Maria ehec mâmâc qâreŋ-jofaniŋte kiwechec jowame rapic. 6 Fisirâ juhapire Maria motec roro dameŋ-ticne maickewec. 7 Eme mârâc motec-ticne rorâ qoruczi foŋkerâ bulimakao otoo râeme hurâ fowec. Ŋic jaŋe tomafic fusucmambiŋte ŋeŋe fofo basarâ bulimakao ficko ferâ ŋepic hâcne. 8 Eme hae mâreŋ ijaha ŋic tucne jaŋe ŋafe ira kecɋaŋ gieo lama jaŋere soŋaŋ ŋembiŋ. 9 Ŋehapie Wofuŋte aŋelo moczi jaŋerao fuame Wofuŋte oŋararaczi batamaec-jopame mâretec hâwic-jopawec. 10 Eme aŋelozi šiŋuc jazawec: “Ŋoŋe mi hâwic-ŋopaoc, manaŋgopieŋ, no aŋac šeridâŋ bajukopac, irec fârine ŋic mâmâc sasawa fua-ŋareocmu. 11 Miŋecgac Bâbâpiaŋ rune Wofuŋ Kristo hâcne, Dawidire haefuŋko fua-ŋarekac. 12 Eme mutâcne-ŋarepe mananiŋ: Ŋoŋe motec geune jâmbâŋ qoruczi foŋkekicne bulimakao otoo foha ra bâfuaniŋmu.” 13 Dâŋ iŋuc muhame izia sambâŋ momori gurune fufusuc jaha ututuŋ aŋelo âgo-jeŋictao tumaŋnerâ šiŋuc muhuc Anutu muteŋkembiŋ:

14 “Ʒeri mumuteŋ Anutu faic sambâŋko,

mâreŋko ŋic âgo jauŋ ejarekac jaŋerao wama fuakac.”

Soŋaŋŋic jaŋe Jesu motec bâfuambiŋ

15 Aŋelo jaŋe sambâŋko risie fepie soŋaŋŋic jaŋe šiŋuc muhuc nazaŋ gazaŋ embiŋ: “Nâŋâc Betelehem haeo ferâ Wofuŋzi dâŋ nâzâkac irec fârine honenaŋ.” 16 Iŋuc murâ bâruŋ jaha ferâ Maria â Josefe bâfuac-jofarâ motec geune bulimakao otoo fohame honembiŋ. 17 Honerâ motecte dâŋ biŋe manambiŋ i mufuambiŋ. 18 Eme soŋaŋ jaŋere mickonec binaŋ manambiŋ jaŋe warecke-fârembiŋ. 19 Maria eki ine dâŋ i maŋkerâ manatâc qâtâc ehuc juwec. 20 Eme soŋaŋ jaŋe risierâ wiac hone manac embiŋ sâc manasurâ Anutu daŋge mumuteŋ ecnembiŋ.

Simeoŋ â Hana jahere dâŋ

21 Jesu motec fuarâ fohame šoaŋ gie bapa 8 eme motec sahacnao Wofuŋte ma bahuc šâŋene Jesu mumbiŋ. Ʒâŋe i motec e mi fuahame aŋelozi qanaŋ mufuawec.

22 Eme Mosere sâcmutâc dâŋ fowec, i reŋkehuc Mariazi bâtâcko juku sahac herâ Josefehec motec Jerusalem haeo baferâ Wofuŋte biŋe qapic. 23 Wofuŋte sâcmutâc dâŋ kecšiŋuc fowec i hâcne sâsehuc epic: “Mârâc motec fuapie i Wofuŋte biŋe qafârezo.” 24 Erâ Wofuŋte sâcmutâc dâŋko hapâ jajahec me buni jajahec bâzi ririkere mukicne i wâc barâ rapic.

25 Jerusalem haeo ŋic moc juwec šâŋene Simeoŋ. E tiŋne â mitihec juhuc Israe ŋic jaŋerao bâbâmiriŋ fuaocte woŋec juwec. Ehame Tiri Mârozi maŋticnao ŋeŋe juju ehuc 26 dâŋ šiŋuc mufuacnewec: “Go mi hâmohaŋtecne Wofuŋ Kristo fuame honecmu.” 27 Ŋic e Mârozi ecneme taha ufuŋko fewec. Eme Maria â Josefe jahe sâcmutâc dâŋ reŋkehuc Jesu motec ijaha bafepire 28 Simeoŋzi motec hâporâ šiŋuc muhuc Anutu muafeckewec:

29 “O Wofuŋ sâko, šine hâcne šâŋe fâri-nanezi

goraonec bâbâpiaŋ honekopacte

30 go kiŋaŋŋicge no micdâŋgere sâcko râecnutec

bumâteŋ fuaha rakopac.

31 Go bâbâpiaŋ i mâreŋ sâc ŋicne ŋicne

jaŋe honeniŋte bâfuakomec.

32 Izi qâpuc jaŋere maŋ âke tamaekac

â Israe ŋicfâcge jaŋere šâŋe biŋe bafaharekac.”

33 Motecte dâŋ iŋuc mume neŋgoc mamac jahecne manapire bipinehec ewec. 34 Eme Simeoŋzi jambuŋ-jopahuc motec neŋgoc-ticne Maria šiŋuc âzâcnewec: “Manakic, motec kecši erao Israe ŋic fâuckeniŋte mukicne, gâcne jaŋe erao hetakirerâ rândiŋke qa eniŋmu â gâcne jaŋe erao hesiŋnerâ fahareniŋmu, erâ aka-jeŋic râekicnere ro waha âte boc ecneniŋmu. 35 Erâ gahacne wâc šikare busâqoc hâtânezi buheric bâfua-garezokac. Waic iŋucne fuame ŋic bocjaha maŋjeŋicte fuŋne taniŋkeocmu.”

36 Eme miti ŋokac moc juwec šâŋene Hana. E Fanuere otâ, Ase ere tucne tofane. Naru-ticnao ŋic barâ ehec juhame jara 7 eme hâmome 37 hozec erâ jufeku jara 84 bazurâ ŋokac qizec jâmbâŋ ewec. Ŋokac eki hâcne taha ufuŋko hati jurâ ju ehuc Anuture erâ sowa â nunumu gie bajujec. 38 Eme eki hâcne dameŋ ijaha taha ufuŋko fisirâ Anutu mumbiaŋkewec, â Jerusalem rune jaŋere fifirue dameŋte woŋec jumbiŋ, jaŋe Jesu motecte biŋedâŋ jazawec.

39 Maria â Josefe jahe Wofuŋte sâcmutâc dâŋ mukicne i efârerâ Galilaia mâreŋko Nazarete haeo risie rapic. 40 Ira juhapire motec e Anutuzi hone jauŋ ecneha soka sanaŋ ehuc mamana sâkohec ewec.

Jesu motec hombaŋte Jerusalem haeo jowa fepic

41 Maria â Josefe jahe jara sâc aakic hombaŋte Jerusalem haeo fejupirec. 42 Ehame Jesu motec jara-ticne 12 bazume hombaŋte fefe dameŋ-jeŋic maickeme jowapire mâmâc fembiŋ. 43 Ferâ juhapie hombaŋ tarame Maria â Josefe jahe Jesu motec hetarapire Jerusalem haeo juhame buc risiepic. 44 Risiehuc guru sâko jaŋehec biac bâniejec murâ hatao âgo wiacfâc-jekic jaŋerao basa rahuc juhapire ŋafewec. 45 Jaŋerao basa-bipierâ hae fureme mocwâc Jerusalem haeo risierâ ira basapic. 46 Basahapire gie bapa jahec â moc eme taha ufuŋko bâfuapic. Ira miti qaqazu jaŋere ŋondeŋko ŋehuc dâŋjeŋic manahuc fuŋnere mu wioc ejarewec. 47 Eme ŋembiŋ jaŋe mâmâc sasawa mamana-ticnere â dâŋticnere wareckembiŋ. 48 Eme jaŋere ŋondeŋko hâcne ŋehame bâfuarâ wodâtâŋnepic. Ehuc neŋgocnezi šiŋuc âzâcnewec: “ŋokâ-mae, go wemocte iŋuc enâctekomec? Manakic, mamacgehec nâhe huacbuc ehuc basacguhuc jukoperec.” 49 Mume šiŋuc jasawec: “Weniŋuc erâ basacnuhuc jukopirec? No Mamac-nanere gieo jupemurâ munarekicne, i mi manakopirec me?” 50 Iŋuc mume jahe dâŋ i manapire quŋkewec. 51 Eme neŋgoc mamac jahec-ticne jahehec Nazarete haeo risierâ ira sâsec-jofahuc juwec. Neŋgoc-ticne eki ine dâŋticne manawec sâc mana maŋ erâ juwec. 52 Eme Jesu e maŋzi â sahaczi mâmâc soka sanaŋ ehuc juwec. Ehame Anutu mecne â ŋic mecne jaŋe hone ririŋkehuc jumbiŋ.

<- LUKA 1 LUKA 3 ->