15 Eme ŋic ŋokac jaŋe ɋiefâc-jeŋic Jesurao amec-jopa rarâ mezi bâuac-jopaocte mupie motec jaŋe hâhâwic hejarembiŋ. 16 Jesuzi ine hefârec-jopahuc muwec: “ŋoŋe behehapie naru motec norao wareniŋ, mi hecke-jareniŋ. Iŋucne jaŋe hâcne Anuture uucmaŋ biŋe qajarekicne. 17 No jâmbomac ŋazape: Moc e ɋie jaŋere sâc ehuc Anuture uucmaŋ mi biŋeckeocmu, e maŋnao mi rašiocmu.”

18 Eme soŋaŋ moczi Jesu wiocnerâ muwec: “Qaqazu biaŋ, no weniŋuc erâ juju sanaŋte biŋe epemu?” 19 Jesuzi muwec, “Biaŋne wemocte munarekomec? Biaŋne rune Anutu mocjaha. 20 Erâ go sâcmutâc dâŋ manaekic, kecšiŋuc: Ŋowe ŋonâŋ ŋohe bebehec mi ezepirec, go šika mi qazemec, go fiuc mi rozemec, go micko âkec mi ezemec, go neŋgoc mamac jahecge sâsec-jofazemec.” 21 Mume soŋaŋzi šiŋuc muwec: “I ɋieo fuŋkerâ reŋke warehuc juekopac.” 22 Mume Jesuzi manarâ šiŋuc âzâcnewec: “Mocjaha fokac, i ezemec, go rarâ moneŋ mafage ŋic hapetac qikiŋne-jarezemec, eme sambâŋko boreŋ šeŋaŋ fua-gareocmu. Erâ ware bâjâpecnuzemec.” 23 Eme ŋic e moneŋ mafa ɋâfoŋne focnewecte dâŋ i manarâ bune boc sâqorewec.

24 Iŋuc eme Jesuzi honerâ muwec, “Moneŋ mafa mâririheczi Anuture uucmaŋko rašiniŋte ququŋkenehec boc eekac. 25 Kamelizi buŋic hawecnao raraši i wiac afecne, â moneŋ mafa mâririheczi Anuture uucmaŋko raraši i wiac ŋemâcne.” 26 Mume manahuc domambiŋ ŋic i jaŋe mumbiŋ, “Hâc, eme mozi sambâŋko feocmu?” 27 Eme Jesuzi jazawec, “Wiac ŋiczi eniŋte quŋkeeŋgopieŋ i Anutuzi hatane bâfuaocte mi quŋkeekac.”

28 Eme Petorozi šiŋuc âzâcnewec: “Manakic, nâŋe wiac-nâŋec sasawa râpecke-fârerâ go bâjâpecgumbeŋ.” 29 Mume Jesuzi šiŋuc jazawec: “No jâmbomac ŋazape: Moc e hae-ticne me ŋokac motecfâcne, me hahac ɋa seŋ baŋecfâcne, me neŋgoc mamac jahecne Anuture uucmaŋte erâ behec-jopaocmu, 30 e irec okacne šira mâreŋko wiac fekicne tahackezo, â juku sambâŋko juju sanaŋ tahackezo.”

31 Jesu e motecfâcne hefârec-joparâ šiŋuc jazawec: “Manaŋgopieŋ, nâŋâc Jerusalem haeo feŋgopeneŋ. Eme porofete jaŋe Ŋic Fâri Wâtuŋne ere findaŋdâŋ qâreŋkembiŋ i sanaŋke-fâreocmu. 32 E ŋic qâpuc jaŋere meo feme jaŋe mu ruruc ecnerâ qa imac ecnehuc tâfeckeniŋmu, 33 erâ becsahac biriŋneheczi qa qâšâic ecnerâ qahâmoniŋmu. Eme šoaŋ jahec â moc eha hâmockonec ɋârerâ fahareocmu.” 34 Iŋuc mume jaŋe kâuc bambiŋ. Dâŋ i manapie quŋkeme fuŋne mananiŋte mana ririfirembiŋ.

35 Jesu e raku Jeriko hae bâqiŋkewec. Ehame hatamecko ŋic tiŋtuŋ moc nânâ moneŋte numuhuc ŋewec. 36 Eme ŋic guru sâko hata ira rapie kike fânâŋ-jeŋic manarâ fuŋnere wiojareme 37 mumbiŋ, “Jesu Nazarete haeonec warekac.” 38 Mupie manarâ hahaŋne bahuc wirarâ muwec, “Jesu go Dawidire ɋâriczi nore mac buge sâqoreoc me!” 39 Iŋuc eme ŋic bâniembiŋ jaŋe niniŋkerâ ŋeocte dâŋ mucnembiŋ. Eme eki dâŋjeŋic mana takirehuc fotarierâ wirawec, “Go Dawidire ɋâriczi nore mac buge sâqoreoc.” 40 Eme Jesuzi manarâ hatao domahuc muwec, “Ŋoŋe norao bawareniŋ.” Mume tiŋtuŋzi erao fisime wiocnerâ muwec, 41 “No wemo egarepemurâ mukic? `à Eme tiŋtuŋzi muwec, “Wofuŋ, no šâŋe fifihec epere enarekac.” 42 Mume Jesuzi šiŋuc âzâcnewec: “šâŋege fitâcneoc, mamanasiŋgere biaŋgukac.” 43 Muha izia šâŋe fifihec ewec. Erâ Jesu bâjâpehuc Anutu muteŋkewec. Á ŋic wiac i homembiŋzi iŋuc jaha Anutu muteŋkembiŋ.