JUDA

Juda e Jakobo Tiŋne juju ere ɋa. Jahe Jesure ɋajahec hâcne. Mâc Judare papia i Jesu ɋajâmbâŋ-ticnezi qâreŋkewec me mitiŋic moczi Judare šâŋeo âkehotahuc qâreŋkewec i mi mana sanaŋkeŋgopeneŋ. Mitire bâbâsifuc â mumusifuc ŋic dâŋjeŋic qâreŋkewec jaŋe šâhec, aposolo â Jesure ɋafâc hâmo-fârehapie fuarâ gie-jeŋic bambiŋte Jesure ɋajâmbâŋzi mâcne, mitiŋic moczi mecne qâreŋkewec. I šiŋuc ewec mecne: No dâŋ moc mâcne, aposolo gâcne â Jakobo jaŋe mitidâŋ mu qaqazuc erâ qâreŋkembiŋ ijaha mu qaqazuc ehuc qâreŋkekopac. Irec Petorore papia namba 2 ira miti bâbâsifuc ŋic jaŋere fuŋne bataniŋkehuc qâreŋkekicne, dâŋ ijaha tucne Judare papiao qâreŋkekicne.

Miti mamana jaŋere guruo bâbâsifuc ŋic fuambiŋ jaŋe pepec sâko erâ qâsuahuc mamakuc sâko erâ miti sisipiric gie bambiŋ. Eme Judare papia qâreŋkewec qâreŋŋic eki fuŋne-jeŋic bataniŋkehuc miti mamana uŋ sawaŋ ejarehuc qâreŋkewec.

1 Juda no Jesu Kristore kiŋaŋ qaqa â Jakobore ɋa. Mitio hefârec-ŋoparâ Anutu Mamacte jauŋko râec-ŋoparâ Jesu Kristore biŋe qacŋopakicne ŋoŋere papia ši qâreŋkekopac. 2 Ŋoŋerao uruc jauŋ, wama â maŋjauŋ fua bâbâriŋ fuahuc fozejec.

5 Ŋoŋe dâŋ mana-fâreeŋgopieŋ ijaha manasu-ŋarepe. Wofuŋ e Israe ŋicguru Aigita mâreŋkonec batarac-joparâ šâhec dâŋticne qikiŋnembiŋ i jaŋe behec-jopame sipirickembiŋ. 6 Erâ aŋelo soŋaŋ gie-jeŋic hetararâ hae mâreŋ-jeŋic behembiŋ, jaŋe okac dameŋ sâkore woŋec foniŋte kâpâcwâru fofo sanaŋzi dapâczi ɋoroc-jopawec. 7 Erâ Sodom, Gomora â hae rârec rârec ŋerawec, irec ŋic jaŋe ŋic keci jaŋe iŋucne sasec kosa ehuc mamakâc fuŋmoc bâfuapie šocsanaŋko behec-jopame humbiŋ juŋgopieŋ, i hâhâwic râe-nâreocte iŋuc ewec.

8 Eme sifu ŋic keci jaŋe wâc iŋuc jaha, guŋko jujune tinac erâ sahaczi mamakâc eeŋgopieŋ, erâ fekicne ro waha âte ejarehuc tatamachec jaŋe wâc musuac-jopaeŋgopieŋ. 9 Mikae e aŋelo fekicnezi Mose qâŋɋâŋ-ticnere Sataŋhec iiriac erâ mu qaqatarac ehuc Sataŋ dâŋ sâqocne âzâcneocte maname quŋkeme šiŋuc sawa muwec: “Wofuŋzi okacne bazu-garezejec.” 10 Ŋic keci jaŋe ine wiac kâuc baeŋgopieŋ i kosa musua fâreeŋgopieŋ, â qowi jaŋere sâc tinac erâ mâc maŋjeŋiczi manaeŋgopieŋ ira ine sâqorerâ sipirickeeŋgopieŋ. 11 Jei, jaŋe juku wenac eniŋmu? Jaŋe Kaiŋte hata âteeŋgopieŋ, â moneŋ mafare harac ehuc Bileamte bâbâsifuc bâfuaeŋgopieŋ, â Kora pepec-ticnere sipirickewec iŋuc jaha pepec-jeŋicte sipirickeeŋgopieŋ. 12 Ŋic i jaŋe hâcne nânâ qowire harac ehuc fisi tutumaŋ-ŋeŋic hehegâpârene, mimi tâmiric nâ areŋ eene, karorac hoe mi hehuc mâc mâŋâŋzi ficneme rame arictac eekac irec sâcko jujune, jâc garaŋ garaŋne, fâri tâmiric, hâsi fâri hâmokicne, qâqâfiene, ŋic iŋucne tinac hâcne, 13 hâwec siri šocnehec bazu bâfeŋ eekac iŋucne, jaŋacne sâqocne miminehec qâqâtâtiene, bâpiŋ qâsoriekicne iŋucne, duŋdapâc fofo sanaŋ i jaŋere biŋe hâcne bâfuakicne.

14 Adamte oso gitecne fua warekupie 7 eha Enoko fuawec, eme eki hâcne ŋic iŋucne jaŋere findaŋdâŋ šiŋuc muwec: “Wofuŋ e tiri ŋicfâc-ticne guru hâhâwicne jaŋehec fisizokac, 15 erâ ŋic mâmâc sasawa fuŋne-jeŋic bataniŋkehuc ŋic sindaŋne jaŋe sindaŋ-jeŋicte okacne bazu-jareocmu. Ŋic sindaŋne miti tâmiric jaŋe wiac gâgâpâcne bocjaha mu bac eeŋgopieŋte katucne fisi-jareocmu hâcne.” 16 Ŋic izi mu qâtimbucne, isoc qaisocne, sasec fuŋne fuŋnere hešâkiriŋkerâ jujune, pepecdâŋ mumune, ŋic moneŋ mafare mu bâmiriŋ eejarene, iŋuc hâcne jueŋgopieŋ.

17 Âgo biaŋfâc-nane, ŋoŋe ine Wofuŋ-nâŋec Jesu Kristo aposolofâc-ticne jaŋe qanaŋ dâŋ mumbiŋ, irec manasuhuc junšepieŋ. 18 Jaŋe kecšiŋuc ŋazahuc jumbiŋ: “Dameŋ bembeŋkeme ŋic âke sisicne fuarâ miti imackehuc sasec gie-jeŋicte hešâkiriŋkerâ juniŋmu.” 19 Ŋic iŋucnezi hâcne fâfâuc bâfuaeŋgopieŋ, erâ Mâro tâmiric maŋ qâŋɋâŋne jueŋgopieŋ. 20 Jorocfâc-nane, ŋoŋe ine tiri mamanasiŋ fârine izi ŋesiŋ ŋeŋarehame sanaŋkerâ junšepieŋ. Ehuc Tiri Mârorao roweckerâ numuhuc junšepieŋ. 21 Iŋuc ehuc Anuture maŋjauŋko aimuŋ junšepieŋ. Erâ Wofuŋ-nâŋec Jesu Kristo uruc jauŋ-ticne fua tâcneme juju sanaŋko fisiniŋte woŋec junšepieŋ. 22 Ŋic miti bape behepe bajueŋgopieŋ jaŋe dopec-jopanšepieŋ. 23 Á gâcne jaŋere busâqoc manarâ rucŋeŋic bahuc bafic-jopanšepieŋ, ehuc qoruc-jeŋic sâqocnezi hegâpârekicne i wâc bâec banšepieŋ.

24 Âkesiŋ-ŋopame docke pârâc tâmiric juhapie tatamac-ticnao bahacmâc â šerihec râec-ŋopaocte tâpiri focnekac, 25 Anutu mocjaha hâcne, e Wofuŋ-nâŋec Jesu Kristore erâ bâbâpiaŋ-nâŋec juekaczi tatamac â eri qaraweŋ â sasanaŋ â tâpiri mârâc dameŋ tâmiricko focnewec iŋuc jaha ši focnekac, erâ focne rahuc juocmu sanaŋ. Jâmbomac.