1 Farisaio ŋic jaŋere âgo moc juwec šâŋene Nikodemo. E Judaŋic jaŋere micne sâko wâc juwec. 2 Ŋic eki hâcne Jesu ŋafeo iqickerâ šiŋuc âzâcnewec: “Qaqazu, nâŋe fuŋnege manaeŋgopeneŋ, go qaqazu fârinezi Anuturaonec wahameŋ, go mâsi baekic i ŋic moczi Anutu tâmiric juhuc bapane mi ekac.” 3 Mume Jesuzi šiŋuc âzâcnewec: “No jâmbomac jâmbâŋ gazape: Moc e harierâ fufua ɋâricne mi fuaocmuzi Anuture uucmaŋ sâcne mi bâfuaocmu.” 4 Eme Nikodemozi muwec, “Hâc, moc e kâcɋeŋkekicnezi fufua ɋâricne weniŋuc fuaocmu, wemocko neŋgoc bumaŋko mocwâc hume hâsine roocmu?” 5 Mume Jesuzi šiŋuc âzâcnewec: “No jâmbomac jâmbâŋ gazape: Moc e Opâ â Mârore kiwecko ɋâricne mi fuakicnezi Anuture uucmaŋko sâcne mi rašiocmu. 6 Ŋickiwecko fuakicnezi ŋic hawari jaha, Mârore kiwecko fuakicnezi Mârore hawari jaha. 7 Ŋoŋe fufua ɋâricne fuaniŋte mupe go manatec mi quŋkeoc. 8 Mâŋâŋ e kosa qaekac, eme go fânâŋ-ticne i manaekic, â fuŋne wenirec fuŋkerâ wareekac, â wena rataraekac, ine mi manaekic. Eme moc e Mârore kiwecko fuakicne, e fuŋne-ticne iŋucnea fokac.” 9 Mume Nikodemozi dâŋ šiŋuc bâtikiecnewec: “I weniŋuc erâ iŋuc ezo?” 10 Mume Jesuzi šiŋuc âzâcnewec: “Go Israe ŋic jaŋere qaqazuzi irec kâuc bakomec me? 11 No jâmbomac jâmbâŋ gazape: Nâŋe wiac hone manac eeŋgopeneŋ ijaha ŋaza mutâc eeŋgopeneŋ, eme ŋoŋe ine dâŋnâŋec qikiŋneeŋgopieŋ. 12 Wiac mâreŋko fufuane irec mac ŋazape sifu mi mana šakieeŋgopieŋ, eme wiac sambâŋko fufuane irec ŋazape wemo-ŋeŋiczi mana šakieniŋmu? 13 Ŋic moczi sambâŋko moc mi fewec, Ŋic Fâri Wâtuŋne, sambâŋkonec wahawec, e mocjahazi sambâŋko wâc juekac.

14 “Mose e mârâc jaha mâreŋ sawao homa bâfeŋnewec, iŋuc jaha Ŋic Fâri Wâtuŋne e bâfeŋnezo mukicne. 15 Eme e manasiŋkeniŋmu jaŋe juju sanaŋ bâfuaniŋmu. 16 Anutu e ŋic ŋoŋere mo iŋucne ecnewecte Ŋokâ jâmbâŋ-ticne mocjaha e râe qikiŋ ecnewec. Eme e manasiŋkeniŋmu jaŋe moc mi sipirickehuc ju ju sanaŋ bâfuaniŋmu. 17 Ŋokâ e ŋic jaŋere kiŋ bataraocte mâcne, ŋic bâpiaŋ-jopaocte Anutuzi soreme wahawec. 18 Moc e Ŋokâ manasiŋkekaczi okacnere biŋe mi ekac. Á moc e Ŋokâ mi manasiŋkekaczi ine biac okacnere biŋe ekac. Wemocte? E Anuture ŋokâ jâmbâŋ mocjaha ere šâŋe mana maŋ mi ekac irec. 19 Okacnere fuŋne šiŋuc fokac: Tatamaczi ŋic maic-jopame jaŋe tatamac bâsuerâ dapâcte wosâembiŋ, juju bapa-jeŋic sâqocnere iŋuc hâcne embiŋ. 20 Moc e sindaŋ eocmuzi tatamac râpeckeocmu, juju bapa-ticnere fuŋne jaŋgeŋkezacte wemocko tatamacko fua taniŋ eocmu. 21 Moc e dâŋ fâri qizecne reŋkeocmuzi ine tatamac maickeocmu, eme eebapa-ticne Anuture micdâŋte sâcko ekicne irec fuŋne taniŋkeocmu.”

22 Eme juku Jesu e motecfâcne rocjopame Jerusalem hae beherâ Judaia qaŋeŋnaopec ra jumbiŋ. Ira jaŋehec juhuc ŋic opâ rua-jarewec. 23 Johane e mâreŋ moc šâŋene Ainoŋ, Salim haeopec juhuc iŋuc jaha Miti Opâ gie bawec, ira opâ bocjaha fowecte ŋic jaŋe fisipie rua-jarewec. 24 Johane e dameŋ ira kâpâcwâru ficko mi ŋekicne.

25 Eme Judaŋic moczi Johane motecfâc-ticne jaŋehec opâ ruruare mu qaqatarac embiŋ. 26 Eme motec jaŋe Johanerao rarâ šiŋuc âzâcnembiŋ: “Qaqazu, go Jordaŋ ocniŋucnao juhaŋtecne ŋic moc bâfuacgume fuŋne-ticne mujaŋgeŋkerâ nâzâmeŋ, eki dameŋ šiŋuczia ŋic opâ rua-jareme erao rafâreŋgopieŋ.” 27 Mupie Johanezi šiŋuc jazawec: “Ŋic moc e sambâŋ runezi wiac râcne tahac mi ehame e jahac wemocko kâŋgâc roocmu. 28 No kecšiŋuc muhuc ŋazapo i wemocko mickeniŋmu, `No Kristo aricne, no biŋe mumu-ticne sawa. Ž 29 Ŋokac biŋe mucnekicne eki hâcne ŋokac rune. Eme ŋokac bahuc šeri kâcɋene šeri eme âgo-ticnezi manarâ bafickehuc bubiaŋ sâko bâfuaocmu wâc. Bubiaŋ i hâcne manapemurâ dameŋne maickekac ši. 30 Eki fua fehame noni pitiwazepac. 31 Faicnec wahaweczi qâhuc-nâpo-fârekac. Moc e mâreŋkonec fuakicnezi mâreŋte biŋe ekac â mâreŋkopec dâŋ muekac. Á sambâŋkonec wahaweczi ine qâhuc-nâpo-fârekac. 32 Eki wiac hone manac ewec irec dâŋ biŋe muekac. Mume ine ŋic jaŋe dâŋticne qikiŋneeŋgopieŋ. 33 Á dâŋticne mana maŋ ekac e Anutu mume sasanaŋ jukac dâŋ i dopeckekac. 34 Anutuzi ŋic sorewec eki Anuture dâŋ jaha muekac. Ŋic iŋucne e Anutuzi Mâro sâc tâmiric qikiŋnecneekac. 35 Mamac e Ŋokâ hone ririŋkehuc ere meo wiac sasawa râe-fârewec. 36 Moc e Ŋokâ manasiŋkeocmu e juju sanaŋ šiŋuczia fuacnekac, â moc e Ŋokâre dâŋ bâsuehuc juocmuzi juju sanaŋ mi bâfuaocmu. Iŋucnere faio Anuture kimbeŋ feweczi foocmu.”

<- JOHANE 2JOHANE 4 ->