19
Kia e Jesu hâmoocte mutaracnewec
1 Eme Pilatozi mume momori jaŋe Jesu becsahac biriŋneheczi qambiŋ. 2 Qarâ muc šârâneheczi hendiŋ ba akic erâ qizecnao hecnepie huwec â ŋaqi bâbâroŋ mâmâc hecnepie huwec. 3 Iŋuc erâ maŋfuŋnao birickerâ domahuc fânâŋkecnehuc mumbiŋ: “Ohec, Judaŋic jaŋere ŋicwofuŋ.” Muhuc mainao qambiŋ. 4 Eme Pilatozi Judaŋic jaŋerao mocwâc hurâ muwec, “Honeniŋ, no ŋoŋerao jowa wahakopac, no kiŋticne basakopacte ŋaŋac fuŋne-ticne honeniŋ.” 5 Eme Jesu e muchendiŋ â ŋaqi bâbâroŋ, wiac iŋucnehec waha domame Pilatozi jowaturâ muwec: “Ŋic mac ši honeniŋ.” 6 Eme taha bapa micne â ŋicfâc-jeŋic jaŋe honerâ dâŋ ɋeŋɋeŋnehec ehuc mumbiŋ: “Maripoŋko feoc, feoc.” Mupie Pilatozi micjeŋicko rorâ muwec: “No kiŋticne basakopacte ŋoŋe ŋaŋac rorâ maripoŋko qaniŋ.” 7 Eme Judaŋic jaŋe šiŋuc mumbiŋ: “E jahacnere no Anuture Ŋokâ muekac, eme ŋic iŋucne jaŋe hâmoniŋte sâcmutâc dâŋnâŋec fokacte hâmozejec.” 8 Eme Pilato e dâŋ i manarâ mâretec hâwickewec. 9 Eme Jesu mocwâc ficmaŋko jowa ferâ indiŋkerâ muwec: “Go wenirec fuameŋ?” Mume Jesuzi micnao mi rowec. 10 Iŋuc eme Pilatozi šiŋuc âzâcnewec: “Go dâŋ mi nazakomec me? Noni mupe jucmu me mupe maripoŋko hâmocmu irec tâpiri râe-narekicne, i mi manakic me?” 11 Eme Jesuzi šiŋuc âzâcnewec: “Mâc muzac go nore dâŋ wemocko munšaŋ, nore dâŋ mumure faicnec tâpiri qikiŋne-ŋarekicnere mukomec hâcne. Irec gorao râecnukac ŋic ere kiŋzi gore jâurukac.” 12 Dâŋ i manarâ Pilatozi Jesu akickezo mume Judaŋic jaŋe owa ruruckerâ mumbiŋ: “Go ŋic e akickerâ Sisare ª âgo mocwâc mi jucmu. Moc e jahacnere ŋicwofuŋ muhuc Sisa âkehockeocmu.” 13 Pilatozi dâŋ i manarâ mume Jesu jowa wahapie dâŋ mumutara ŋeŋe-ticnao waha ŋewec. Ŋeŋe i qânâ šaeo râekicne, eme šae irec šâŋe Judaŋic jaŋe Gabata mujumbieŋ. 14 Eme Judaŋic jaŋe hae fureme aakic hombaŋ ŋeniŋte teuŋko rašimbiŋ. Ehame qâqâtâc bembeŋkeha Pilato e ŋeŋe-ticnao ŋehuc Judaŋic šiŋuc jazawec: “Honeniŋ, ŋicwofuŋ-ŋeŋic ši.” 15 Mume jaŋe owa ruruckerâ mumbiŋ: “E arictac eoc, e arictac eoc, maripoŋko feoc.” Eme Pilatozi muwec: “Hâc, eme ŋicwofuŋ-ŋeŋic mupe maripoŋko hâmoocte muŋgopieŋ me?” Mume taha bapa micne jaŋe dâŋ šiŋuc bâtikiecnembiŋ: “Nâŋe ŋicwofuŋ-nâŋec moc aricne, Sisa mocjahazi junarekac.” 16 Eme Pilatozi mana urue-jarerâ Jesu maripoŋko hâmoocte qikiŋne-jarewec.
Jesu maripoŋko qapie hâmowec
(Mat 27: 32-50” Maò 15: 21-37” Luë 23: 26-46)
17 Eme momori jaŋe Jesu rorâ maripoŋ râcnepie hâpome mâreŋ moc šâŋene Utusiec, Judadâŋko Goligata, ira barambiŋ. 18 Bararâ maripoŋko qambiŋ. Erâ sâqocne bapa jajahec mâmâc jofarâ moc ŋifec, moc ŋifec, â Jesu šâšâŋiŋko, iŋuc biric-jopambiŋ. 19 Eme Pilatozi mume Jesure qizec botâŋko maripoŋko qâreŋ kecšiŋuc râembiŋ: “Jesu Nazarete haeonec Judaŋic jaŋere ŋicwofuŋ.” 20 Jesu qambiŋ mâreŋ i hae bembeŋko fowecte Judaŋic bocjahazi ira rac warec ehuc qâreŋ i wosembiŋ. Eme qâreŋ i Judadâŋko â Romadâŋko â Grikdâŋko râekicne. 21 Eme Judaŋic jaŋere taha bapa micne jaŋe Pilato šiŋuc âzâcnembiŋ: “Go Judaŋic jaŋere ŋicwofuŋ iŋuc mi qâreŋkec E jahacne muwec, no Judaŋic jaŋere ŋicwofuŋ, iŋuc qâreŋkec.” 22 Eme Pilatozi muwec: “Qâreŋkepac izia fooc.”
23 Eme momori jaŋe Jesu maripoŋko qarâ ŋaqi-ticne faine bâtâcnepie jahec â jahec eme ru sâc embiŋ. Á ŋaqi-ticne maŋne hâfâ iŋucne oorâŋ fukicnere 24 šiŋuc mumbiŋ: “I bâtâcnepene sâqoreocmu, irec ɋâsâi qapene rune âke fuaoc.” Iŋuc epie miti papiao dâŋ moc kecšiŋuc qâreŋkekicne i sanaŋkewec:
“Jaŋe ŋaqi-nane faine bâtâc bambiŋ,
â maŋnere ine ɋâsâi qambiŋ.”
25 Momori jaŋe iŋuc hâcne embiŋ. Jesure maripoŋ fuŋko ine šiŋuc domambiŋ: Neŋgoc-ticne â neŋgoc-ticnere qo, erâ Maria Kelopa ere ŋonâŋ, â Maria Madala haeonec.
26 Eme Jesu e neŋgoc-ticne â motec bufuŋ-ticne domapire honec-jofarâ neŋgoc-ticne šiŋuc âzâcnewec: “Ŋokac, motecge keci hâcne.”
27 Iŋuc murâ motec-ticne šiŋuc âzâcnewec: “Neŋgocge keci hâcne.” Eme dameŋ ira Jesure neŋgoc jowame motec jahacne ficko ferâ ŋec juc ewec.
28 Eme Jesu e gie-ticne tarame manarâ, miti papiao findaŋdâŋ moc fokac i deŋkeocte, šiŋuc muwec: “No opâre enarekac.” 29 Eme râqâc moc maŋnao waiŋ opâ šašacne ŋewec, ira hâwec sâmbiŋ âke uruckerâ qeŋqeŋko âke kindeŋnerâ micnao iticnepie nâwec. 30 Waiŋ opâ nârâ wirahuc muwec: “Batarakopac.” Iŋuc mume qizecne forârieme mâro-ticne wefuwec.
31 Eme Judaŋic jaŋe teuŋko rašimbiŋte šiŋuc mumbiŋ: “Tomâcko sabata hombaŋ sâkoo ŋic jopakicne jaŋere qâŋɋâŋ maripoŋko mi domazejec.” Iŋuc murâ Pilato âzâcnepie momori jaŋe ŋic siec-jeŋic qazurâ qâŋɋâŋ-jeŋic bataraniŋte Judaŋic mana-jarewec. 32 Eme momori jaŋe sâqocne bapa Jesuhec jofakicne mocte siec qazurâ ra mocte siec qazumbiŋ. 33 Iŋuc erâ Jesurao fisirâ honembiŋ: E biac hâmowec. Honerâ siecne mi qaqazu 34 momori moczi tambaraŋne sânduzi âke mârâŋkeme soc â opâ wahawec. 35 Wiac i šâŋe fâri-ticnezi honewec eki mutaniŋkeme jâmbomac ekac. E manakac, dâŋ i fârine. Irec ŋoŋe mana šakienšepieŋ. 36 Miti papiao findaŋdâŋ moc kecšiŋuc fokac i sanaŋkeocte wiac i fuawec: “Ŋoŋe siecne mi qazunšepieŋ.” 37 Erâ wâc miti papiao dâŋ moc kecšiŋuc fokac: “Jaŋe âke mârâŋkembiŋ erao šâŋe finšepieŋ.”
Jesu duckembiŋ
(Mat 27: 57-61” Maò 15: 42-47” Luë 23: 50-55)
38 Josefe Arimataia haeonec e Jesure motec juwec, erâ Judaŋic jaŋere hâwickeme fufua mi juwec, soŋsoŋ juwec. Eki hâcne Pilatorao rarâ Jesu qâŋɋâŋ-ticne bataraocte mufuacnewec. Eme Pilatozi manacneme ra batarawec. 39 Ehame Nikodemo, ŋafeo Jesu iqickewec, eki wokemaŋ âsu biaŋ â kâŋâ bocjaha amecke rarâ Josefe bafickeme 40 Jesure qâŋɋâŋ ruacnerâ qoruc qaŋqaŋzi râpâckepic. Judaŋic jaŋe qâŋɋâŋfâc-jeŋic iŋuc hâcne ejare jumbieŋ. 41 Eme Jesu qambiŋ mâreŋ irec ŋifecnao Jufu gie moc fowec, ira hawec moc šâŋeruŋte biŋe gufukicne fowec. Ira ŋic moc mi ducjopakicne, furu fowec. 42 Eme Judaŋic hombaŋte teuŋko rašimbiŋte bembeŋko ira hâcne Jesure qâŋɋâŋ râepic.
<- JOHANE 18JOHANE 20 ->
