1 Betania haeo ŋic moc juwec šâŋene Lazaro, e huc bame fowec. Maria â Mata jahe hahac qozi hae irecteaŋ. 2 Maria eki hâcne Wofuŋ opâ âsu biaŋ ruacnerâ qizec susuc-ticnezi kikene bâkereŋkewec. Ɋaticne Lazaro hâcne huc fowec. 3 Eme jahe hahac qozi Jesurao dâŋ kecšiŋuc muhuc râepire rawec: “Wofuŋ go manac, âgoge huc fokac.” 4 Eme Jesuzi biŋe manarâ šiŋuc muwec: “Huc irec fârine hâmoc fuaocte mâcne, Anuture mumuteŋ fuaocte mukicne. Anutu ŋokâ-ticne ere sambâŋ qâreŋ fua taniŋkeocte hâcne.”

5 Mata â qoticne â Lazaro jaŋere Jesuzi ecnewec. 6 Eme hucte biŋe manarâ juweckoa gie bapa jajahec mocwâc juwec. 7 Iŋuc jurâ motecfâcne šiŋuc jazawec: “Warepie Judaia mâreŋko risie ranaŋ.” 8 Mume motecfâcne jaŋe šiŋuc âzâcnembiŋ: “Qaqazu, Judaŋic jaŋe juc bânic moc ira qânâzi hecguzo mumbiŋ, eme ši wemocte jaŋerao mocwâc risiezo mukic?” 9 Mupie Jesuzi šiŋuc jazawec: “Gie bapa dameŋ aua 12 fokac i¡ Moc e šoaŋko hata rahame wiac moczi he âkec mi ecneocmu, e tatamacko wiac sâcne honeocmu. 10 Moc e ŋafeo tatamac basahuc hata rahame ine he âkec ecneocmu.” 11 Iŋuc murâ dâŋ moc šiŋuc šuhuckewec: “Âgo-nâŋec Lazaro guŋ fokac, eme no rarâ wiwickepemu.” 12 Eme motec jaŋe šiŋuc mumbiŋ: “Wofuŋ, guŋ fohuc biaŋkeocmu.” 13 Jesu e hâmocte dâŋ suŋsuŋne mume jaŋe guŋ jâmbâŋte mukac muhuc mi mana-hâmombiŋ. 14 Irec Jesuzi muɋaɋackerâ jazawec, “Lazaro hâmojec. 15 No ira mi ra juhape hâmojecte ŋoŋere erâ bunane biaŋkekac, ŋoŋe mamanasiŋ fârihec eniŋte wiac i fuajec. ši ine erao ranaŋ.” 16 Eme Toma, šâŋene moc Didimo, eki motec âgofâcne šiŋuc jazawec: “Nâŋâc mâmâc rarâ ehec hâmonšepeneŋ.”

17 Lazaro šâŋeruŋko fohame šoaŋ gie bapa jahec â jahec ehame Jesu ra fisiwec. 18 Betania hae i Jerusalem hae irec rašimicne bembeŋko ŋewecte 19 irecnec Judaŋic bocjahazi Mata â Maria ɋajekic hâmowecte soŋgâŋ fâsâc honec-jofazo rambiŋ. 20 Eme Mata e Jesu fisikac mupie manarâ Maria ficko ŋehame ra hatao bâfuawec. 21 Bâfuarâ šiŋuc âzâcnewec: “Wofuŋ, go šira jutec muzac ɋanane mi hâmozac. 22 Erâ šiŋuczia gore wâc manakopac, wiac irec me irec Anutu numucnetec mana-gareocmu.” 23 Eme Jesuzi šiŋuc âzâcnewec: “Ɋage ɋârerâ fahareocmu.” 24 Mume Matazi šiŋuc muwec: “Juku dameŋ sâkoo ɋârerâ fahareocmu i manakopac.” 25 Eme Jesuzi šiŋuc âzâcnewec: “Ɋâɋâre â juju rune no, irec moc e no manasiŋnuocmuzi hâmo-bipierâ juocmu, 26 â moc e ɋâricne juhuc manasiŋnuocmuzi hâhâmo tâmiric jurašihuc juocmu sanaŋ. Go dâŋ i mana šakiekomec?” 27 Eme Matazi muwec: “Go Kristo Anuture Ŋokâzi mâreŋko wahaocte mukicne hâcne, i maŋnanezi mana šakiekopac.”

28 Dâŋ iŋuc murâ qoticne Maria wiracnerâ saŋucko šiŋuc âzâcnewec: “Qaqazu warejec gore mukac.” 29 Eme Mariazi manarâ izia faharerâ Jesurao rawec. 30 Jesu e hae upeo Mata dâŋ âzâcneweckoa domawec. 31 Eme Maria e biac faharerâ rame Judaŋic soŋgâŋte ficticnao ŋembiŋ jaŋe šâŋeruŋko kioocte rakac muhuc bâjâpembiŋ. 32 Eme Maria e hae upeo hurâ Jesu honerâ kikefuŋnao fodaperâ šiŋuc âzâcnewec: “Wofuŋ, go šira jutec muzac ɋanane mi hâmozac.” 33 Iŋuc murâ kiome Judaŋic bâjâpembiŋ jaŋe e bafickerâ mâmâc kiombiŋ. Kiopie Jesuzi honec-joparâ mana hâtâwehuc gâgâmârâwec.

34 Iŋuc erâ wio-jarewec, “Wena duckembieŋ?” Eme jaŋe mumbiŋ, “Wofuŋ ware honec.” 35 Eme Jesu šâŋene ruruame šâŋeucne wahawec. 36 Eme Judaŋic jaŋe honerâ mumbiŋ, “Honeniŋ, maŋne ere mo iŋucne domawec.” 37 Á gâcnezi mumbiŋ, “Tiŋtuŋ moc šâŋene bâtâcneweczi ŋic kecši sâcne mi bâpiaŋkeme ɋiɋic qazac me?” 38 Eme Jesuzi bune mocwâc hâhâtâwehame šâŋeruŋko ra fisiwec. Qâŋɋâŋ e qânâ hawecko fowec, motâcne qânâ kâcɋenezi âke bâzickekicne. 39 Irec Jesuzi šiŋuc muwec: “Qânâ bârârieniŋ.” Mume hâmocnere hahac Mata eki muwec: “Wofuŋ, šoaŋ gie bapa jahec â jahec fowecte âsu fikac.” 40 Mume Jesuzi šiŋuc âzâcnewec: “Dâŋ gazape mi manamec, go manasiŋnutec Anutu tâpiri-ticnere qâreŋ fuame honecmu.” 41 Eme qânâ bârâriepie Jesuzi faic fime fehame šiŋuc numuwec: “Mamac, go nunumu-nane manamecte daŋge gazakopac. 42 Go nunumu-nane dameŋ sâc manaekic i manakopac. No mâc ŋic ši doma raŋgopieŋ jaŋe goki sorecnutec wahapo i maŋjeŋiczi mana šakieniŋte dâŋ iŋuc gazakopac.” 43 Iŋuc murâ hahaŋne bahuc wirawec, “Lazaro go wahac.” 44 Mume hâmokicnezi wahawec. Me kikene qoruczi qâfisekicne â šâŋe maine qoruczi foŋkekicne, irec Jesuzi šiŋuc jazawec: “Qoruc goroŋkepie raoc.”