EFESO
Paulo e miti kiŋaŋ šâšâŋiŋ moc rawec, i ra juku risieocte wareku Efeso haeo fisiwec Erâ i jaŋehec juhuc miti gie mi bawec, mâc jowarurâ warewec. Eme šâhecko miti kiŋaŋ mocwâc rarâ Efeso haeo jara 2 â nâfocne iŋuc juhuc ŋic miti jazame mâretec haŋ bawec. Eme irec hâcne ŋic qâpuc tucne jaŋe, nemu sâko-nâŋec ere ufuŋ i qoroc heocmu, muhuc dâŋsâko jâmbâŋ bâfuarâ ŋic bâiŋ-jopapie šika bâfuazo embiŋ Efeso i Asia mâreŋ masune irec hae qizec sâko ŋewec. Eme ira miti fuahuc rârec rârec hae ŋerawec ira mâmâc fua rawec. Eme Paulo e šâhec kâpâcwâru ficko ŋehuc papia i wirec-jeŋic qâreŋkewec. Erâ Tikiko râcneme barâ rawec (Efeso 6:21-22)
Mitire fuŋne kecšiŋuc qâreŋke-jarewec Anutuzi juwicnao dameŋ tâmiricko biŋefâc-ticne enaŋte mana wosâec-nâpohuc miti fufuare dâŋ birickewec. Izi šâhec dameŋne maickeme Jesu râehuc hatane bâfuawec (gaŋ 1). Mârâc jaha juju kosa juhapie sâqocnezi âke fâuc-ŋopame gurune gurune jumbiŋ. Eme Wofuŋzi rocŋoparâ. sambâŋte jujuo râec-ŋopame maŋ mocjaha â guru mocjaha embiŋ (gaŋ 2(c) Anuture dâŋ soŋne i Wofuŋzi Paulo mufuacnewec. Dâŋ soŋnere fârine Jesuzi hâcne bâfuawec (gaŋ 3). Juju guru mocjaha embiŋ. Irec mitio gegec dodoc boc mi juzo, erâ qâpuc juju â sâqocne fuŋne fuŋne qikiŋnezo (gaŋ 4). Tatamacko juhuc dapâcte wiac râsi ecnezo, dameŋ mi spirickezo, mitire momori wiac bajuhuc râsi mi hohonene jopa jâpec ezo. Faŋdâŋ i â gâcne qâreŋke-jarerâ ŋic ŋokac, neŋgoc mamac â naru, motec, ŋicbomboŋ â kiŋaŋ qaqa mitidâŋ kâdoc qajarewec (gaŋ 5 â 6)

Jambuŋdâŋ

1 Paulo no Anuture micte Jesu Kristore aposolo epozi Efeso haeonec mitiŋic, Kristo Jesu manasiŋkeeŋgopieŋ hâcne, ŋoŋere papia ši râekopac 2 Mamac-nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnera fozejec.

Anutu e mârâc jaha miti hata mušâwe-nârewec

3 Wofuŋ-nâŋec Jesu Kristo ere Anutu â Mamac, eki sambâŋkonec miti jambuŋ-ticne fuŋne fuŋne Kristore erâ nâre tahac ewecte mumbiaŋkenšepeneŋ. 4 Eki mârâc jaha jâmbâŋ mâreŋte hobeteŋne mi fuahame mai-ticnao maŋfuru â bahacmâc junaŋte Kristore erâ mana wosâc enârewec. 5 E qanaŋ maname fowecte hâcne Jesu Kristore erâ maŋjauŋ enârehuc naru motecfâc-ticne erâ junaŋte buafec-ticnere mupaŋke-nârewec. 6 E joroc Ŋokâ-ticnere erâ aki anonoc biaŋ-ticne tahac-nâpowecte muteŋ bâteŋ ecnenšepeneŋ.

Jesure soczi kitâc-nâpowec

7 Jesu e socticnezi kitâc-nâpowecte sâqocne bâbâtâmire fua-nârewec, i aki anonoc-ticnere šâkâŋ fokac irec sâc hâcne. 8 Eme šâkâŋ-ticnao maŋɋârâŋ â mamana fâri bâmâckehuc qoŋgiŋke-nârewec. 9 Ehuc maŋbuc-ticnere dâŋ, qanaŋ maname biaŋkeme šiŋuc âkendâŋnewec i mujaŋgeŋke-nârewec: 10 “No guriŋne bahape dameŋ maŋkepo i qosackeme Kristozi wiac sasawa, sambâŋko mecne mâreŋko mecne, qâturehuc irec fuŋqizecne ezejec.” 11 Ere erâ, wiac sasawa maŋticnere mupaŋkerâ baekaczi mârâc jaha hone wosâec-nâporâ miti merâfâc rauckenaŋte munârewec. 12 Eme irec Kristore mamanac jumbeŋ jueŋgopeneŋzi Anutu šâŋe rara-ticnere mumuteŋfâc erâ junšepeneŋ. 13 Eme ŋoŋe iŋuc jaha dâŋ fâri qizecne, bâbâpiaŋ-ŋeŋicte Biŋebiaŋ hâcne, ro maŋ ehuc Kristo manasiŋkepie Tiri Mâro qanaŋ biŋe qanarekicne i ŋareme maqâreŋhec embiŋ. 14 Sambâŋko huhure biŋe-nâŋec fokac, irec šâšâficne Mâro nârekicne. Eme Anutu šâŋe rara-ticnere mumuteŋ sâko fuaocte biŋefâc-ticne nâŋâcnao Mârozi bâbâpiaŋ gie fuŋkewec i batarazokac.

Miti jaŋerao qaja fuserâ foocte Paulozi nunumu gie bawec

15 Eme ŋoŋe Wofuŋ Jesu manasiŋkeeŋgopieŋ â mitiŋic âgofâc-nâŋec maŋjauŋ ejareeŋgopieŋ, irec biŋedâŋ manapore 16 ŋoŋere dameŋ sâc manasuhuc Wofuŋ daŋge mumuteŋ ecneekopac. 17 Ehuc ŋoŋere šiŋuc numuekopac: Wofuŋ Jesu Kristo ere Anutu, eri tatamac Mamac hâcne, eki Mâro ŋareme izi maŋɋârâŋhec bacŋoparâ Wofuŋte fuŋne mufua-ŋareme mana taranšepieŋ. 18 Erâ maŋšâŋe-ŋeŋic bâtâcneme ine Wofuŋzi rocŋopahuc sambâŋ šeŋaŋ biŋe qaŋarewec, irec manapie fârine ezejec, â fuŋfuŋfâc-ticne ŋoŋe huhure šâŋe rara biaŋ kadahe ŋarewec, irec wâc manapie fârine ezejec, 19 â mamanasiŋhec nâŋâcnao tâpiri soka makakicne i teqâ saki-ticnezi gie baekac sâc bâfuawec, irec iŋuc jaha manapie fârine ezejec. 20 Tâpiri irec fuŋne Kristo hâmockonec bâɋârerâ sambâŋko mefâre-ticnao râehuc bataniŋkewec. 21 Ehuc kia gawamaî â ŋicwofuŋ â fekicne fuŋne fuŋne jaŋere femicne sâko râewecte mâreŋko â sambâŋko šâŋe biŋe fokac izi gâkowakac, dameŋ šiŋucziare sawa mâcne, iŋuc fohuc juocmu sanaŋ. 22 Erâ wiac sasawa maŋfuŋnao heteckehuc kike-ticnere rurumaŋko guruc-jopahuc qizec-jeŋic eocte âkendâŋnerâ kikefuŋ gurufâcne jaŋerao râewec. 23 Eme jaŋe me kikefâc-ticne ehapie ŋihe umbiŋ ejarehuc fofotâc juhuc wiac sasawa sâcke raekac.

EFESO 2 ->