1 Eme Ikonioŋ haeo fisirâ iŋuc jaha Judaŋic jaŋere mitificko ferâ miti mupire fârio qawec. Ehame Judaŋic â Grikŋic bocjahazi Jesure kikefuŋ embiŋ. 2 Judaŋic gâcne jaŋe ine miti qikiŋnehuc hae irec ŋic suruc-jopapie Kristoŋic aaric mana-jarembiŋ. 3 Eme jahe sifu mosa dameŋ gâcne hae ira juhuctecne Wofuŋtao roweckerâ miti-ticne hâwicmâc muhuc jupic. Ehapire Wofuŋzi akicdâŋ-ticnere fuŋne bataniŋkehuc neŋgoc ŋesiŋ ŋejactehame mâsi fuŋne fuŋne bapic. 4 Eme hae irec ŋic jaŋe fâuckehuc tucne Judaŋic jaŋerao qohotambiŋ â tucne jaŋe aposolo jaherao qohotambiŋ. 5 Izi šâhecko ŋic qâpuc â Judaŋic gâcne jaŋe aposolo qânâzi he imac ejacteniŋte roroc epie 6 manarâ wiserâ Likaonia mâreŋko rapic. Erâ ira Listera â Derebe â hae gâcnao 7 Biŋebiaŋ murahuc jupic.

8 Eme Listera haeo ira ŋic moc ŋewec, e kike jahec-ticne ɋaŋakicne. E neŋgoc bumaŋko iŋucne fuarâ hata juju tâmiric mâc ŋejujec. 9 Eme Paulozi miti mume manahuc ŋehame erao findendeŋnerâ fuŋne-ticne šiŋuc manawec: Ŋic e bibiaŋte mamanasiŋ sâcne focnekac. 10 Iŋuc manarâ dâŋ hahaŋne bahuc šiŋuc âzâcnewec: “Go kikegezi âterâ fahare hâŋ domac.” Mume ŋic e furutuc herâ fahare rac warec ewec. 11 Eme ŋic guru sâko jaŋe Paulozi mâsi bawec i honerâ micne micširiŋ Likaonia dâŋjeŋicko šiŋuc mumbiŋ: “Nemu jaŋe ŋicsahachec erâ ŋondeŋ-nâŋecko fuambiŋ juŋgopieŋ.” 12 Ehuc Banaba e nemu moc šâŋene Dia ere wase bambiŋ, â Paulo e dâŋ bâtâcnerâ mujujecte nemu moc šâŋene Hermes ere wase bambiŋ. 13 Eme nemu Dia ere taha bapa eki mume bulimakao â reso eri wiac hae upeo nemure ufuŋ ŋewecko amecke hurâ ŋicjahec jahere bâzi rikezo embiŋ. 14 Eme aposolo jahec Banaba â Paulo jahe i manarâ fâfâre sâqorehuc hemâtâc-jofame ŋic bâfâuc bâfâuc-jopa 15 rarâ šiŋuc mupic: “Oi, ŋicbureŋ, ŋoŋe wemo eŋgopieŋ¡ Nâhe ŋic jaha wâc, ŋoŋere sâc. Ŋoŋe nemu burec burec râpec-joparâ Wofuŋ jujune maickeniŋte Biŋebiaŋ-ticne muekoperec hâcne. Eki sambâŋ â mâreŋ â hâwec wiac fuŋne fuŋne-jeŋichec bâfua-fârewec. 16 Erâ juwefukicne dameŋ ira ŋic qâpuc mana-jarehame maŋjeŋicte juju hata fuŋne fuŋne bâfuarâ jujumbieŋ. 17 Erâ qâoma mi eŋarewec, fuŋne-ticne mananiŋte âgo jauŋ eŋarehuc mume hoe šoaŋ sâckoa eme mâriri fuame nâ šeri ejumbieŋ.” 18 Ŋicjahec jahe dâŋ iŋuc muhuc mu bâmâteŋ ejarehuc qatara-jarekupire bâzi ririke-jacte i behembiŋ.

19 Eme ira juhapire Antiokia haeonec â Ikonioŋ haeonec Judaŋic fisirâ ŋic mu bâdoc ejarepie babafic erâ Paulo qânâzi hembiŋ. Erâ hâmokac muhuc hae râpeo fâre rambiŋ. 20 Eme ira fohame opâ ruac jaŋe fisirâ orâŋke âte sâoc ecnehapie ɋârerâ fahare haeo fewec. 21 Erâ hae fureme Banabahec Derebe haeo rapic. Rarâ ira Biŋebiaŋ mupire ŋic bocjahazi mana šakiepie Jesure kikefuŋ bacjopapic. Iŋuc erâ hata rapicko ijaha mocwâc risiehuc Listera â Ikonioŋ â Antiokia haeo ª fisi fisi warepic. 22 Hae sâc fisihuc Jesure kikefuŋ jaŋe mamanasiŋ hešakierâ juniŋte mu basanaŋ ejare warehuc šiŋuc jazapic: “Nâŋâc šârâ hâriŋ faio juhuc Anuture uucmaŋko rašinaŋte mušâwe-nârekicne.” 23 Erâ wâc kikefuŋ gurune gurune soŋaŋ bâwosâe-jarerâ sowa juhuc numu jambuŋ ejarehuc, manasiŋkembiŋ Wofuŋ erao hâcne râec-jopapic.

24 Eme Pisidia mâreŋ fotâcnerâ raku Pamfilia mâreŋko fisipic. 25 Ira fisirâ Perege haeo miti jazarâ Atalia haeo hupic. 26 Ira hurâ wokeo ferâ raku Antiokia haeo fisipic. Hae ira hâcne opâ ruac jaŋe Wofuŋte jauŋko râec-jofahuc gie mujactepie fuŋkerâ barapic. 27 Izi ware fisirâ kikefuŋ hetumaŋ-joparâ, Anutuzi neŋgoc ŋesiŋ ŋejactehame gie bapic, â qâpuc motâc rojareme mamanasiŋhec embiŋ, irec dâŋ binaŋ ejare-fârepic. 28 Erâ dameŋ šošoricnea Jesure gurufâc jaŋere ŋondeŋko jupic.

<- APOSOLO BINAŊ 13APOSOLO BINAŊ 15 ->