JOHANE III

1 No ŋicraŋɋazi âgo-nane Gaio gore papia ši qâreŋkekopac. No gore jâmbomac enarekac. 2 Âgo-nane, maŋge mitio sâcne foekac, iŋuc jaha sahackopec huc šâic tâmiric sâcne juhâmocmurâ enarekac. 3 Go dâŋ fâri qizecne sâcne bajuhuc reŋkeekomec, irec âgo gâcne jaŋe ware dâŋ binaŋ epie manarâ bunane boc biaŋkekac. 4 Naru motecfâc-nane jaŋe dâŋ fâri qizecnere hata âteeŋgopieŋ, dâŋ i manarâ bubiaŋ fekicne jâmbâŋ manaekopac.

5 Âgo-nane, go ŋic âgo ehâmo-jareekomec, erâ bembeŋkonec sawa mâcne, šorickonec mâmâc ejareekic, i sâcnea eekic. 6 Ŋic jaŋe šira kikefuŋte maio jauŋgere mu warec embiŋ. Ŋic fâpie go Anutu šâŋe biŋe-ticnere erâ hone jauŋ ejarerâ râec-jopatec rapie biaŋkeocmu. 7 Jaŋe šâŋe-ticnere erâ miti kiŋaŋ rahuc mâreŋ-jeŋic beherâ qâpuc jaŋeraonec moneŋ mafa mi roeŋgopieŋte ehâmo-jarezo hâcne. 8 Ŋic iŋucne âgo ejarehuc bafic-jopapene dâŋ fâri qizecne haŋ baocte munârekicne hâcne.

9 No kikefuŋ dâŋ wirec-jeŋic qâreŋkepo. Eme Diotrefe e micne-jeŋic juocte muekaczi dâŋnâŋec qikiŋneekac. 10 Irec no fârâ juju bapa-ticnere fuŋne bataniŋkepemu. E nâŋere burec ehuc boc musâqorec-nâpoekac. Erâ i sawa mâcne, ŋic fâpie e jahac hezu hewâneŋ mi ejarehame gâcnezi ejarepie qatara-jarerâ kikefuŋ sahacnao râec-jopaekac.

11 Âgo-nane go ŋic jaŋe wiac sâqocne epie mi bâjâpec-jopazemec, wiac biaŋne epie ine bâjâpec-jopazemec. Moc e wiac biaŋne ehuc juocmu ere muzo, e Anuturaonec fuakicne. Moc e sâqocne ehuc juocmu, e Anutu mi šâŋitawec muzo. 12 Demetrio ere fuŋne ine ŋic sasawa mutaniŋke-fârembiŋ. Erâ mitio fuŋne-ticne taniŋkewec wâc. Nâŋe iŋuc jaha dâŋticne dopeckeŋgopeneŋ. Erâ dâŋ jâmbomac mueŋgopeneŋ i manaekic.

13 Dâŋ gâcne bocjaha fokac, erâ tinte â fedazi qâreŋkezo mi enarekac. 14 No gorao biac fâzore mukopac. Fâ fisipe miczi nazaŋ gazaŋ ezeperec. 15 Wama gorao fozejec. Âgo jaŋe manasu-gare-fâreŋgopieŋ. Go iŋuc jaha âgofâc-nâŋec šâŋe-jeŋic wosehuc manasu-jarezemec.