JOHANE II

Papia i Johanezi ŋokac bomboŋ moc qâreŋkecnewec. Ŋokac e jahacne â naru motecfâcne jaŋe mitidâŋ aimuŋ reŋkehuc jumbiŋ. Ŋokac e mitiŋic hae ira fisipie hefârec-joparâ hezu hewâneŋ ejarehuc juwec. Eme mitire mumusifuc ŋic fisipie iŋuc jaha hefârec-jopame eatuckenšipiŋte uŋdâŋ ŋecnewec. Mumusifuc ŋic jaŋe, Jesu e mâreŋ sahachec fuawec, dâŋ i mickembiŋ hâcne.

Ŋokac bomboŋte mu qâreŋ ewec I kikefuŋ mocte manasuhuc mu qâreŋ ewec mecne.

1 Ŋicraŋɋa no ŋokac bomboŋ bâwosâekicne go â naru motecfâcge ŋoŋere papia ši qâreŋke-ŋarekopac. No maŋjauŋ eŋareekopac, erâ noni sawa mâcne, dâŋ fâri qizecne mana maŋ eeŋgopieŋ jaŋe mâmâc eŋareeŋgopieŋ. 2 Miti maŋnâŋecko fokac erâ nâŋâcnehec fohuc juocmu sanaŋ, irec erâ ââgo jueŋgopeneŋ. 3 Anutu Mamac â Jesu Kristo, Mamacte Ŋokâ, eraonec aki anonoc, uruc jauŋ â wama i dâŋfâri â maŋjauŋhec juhapene nâŋâcnao fotâcnerâ fohuc juocmu.

4 Naru motecfâcge gâcne Mamaczi sâcmutâc dâŋticne nâzâwec reŋkehuc dâŋ fâri qizecne sâcne bajueŋgopieŋ, fuŋne-jeŋic iŋuc manarâ bunane boc biaŋkewec. 5 Eme ši ŋokac bomboŋ go sâcmutâc dâŋ moc gazape manac. Dâŋ furune aricne, raŋɋane fuŋnaonec mana warehuc jueŋgopeneŋ ijaha šiŋuc gazape: Maŋjauŋ eec ehuc junšepeneŋ. 6 Anuture sâcmutâc dâŋ rereŋke izi hâcne maŋjauŋ ekac. Anuture sâcmutâc dâŋ fuŋnaonec mana warehuc jueŋgopieŋ i hâcne bajuhuc sâseniŋte muŋareekac.

7 Manakomec, eeatuc ŋic bocjaha fuambiŋ juraŋgopieŋ, jaŋe Jesu Kristo e mâreŋ sahachec fuawec, dâŋ i mickeeŋgopieŋ. Ŋic iŋucne hâcne eeatuc ŋic â Kristore râsi ɋizec mucnezo. 8 Gie bapene ŋoŋerao fârine fuawec, i sifucke-ŋarezacte soŋaŋ babac ehuc junšepieŋ. Eme juku fârine ŋemâcne ronšepieŋ. 9 Moc e Kristore mu qaqazuc dâŋ mi bajuhuc âke sipuocmu e Anutu mi rauckeocmu. Moc e mu qaqazuc dâŋ bajuocmu e ine Mamac â Ŋokâ mâmâc rauc-jofaocmu. 10 Ŋic moc e mu qaqazuc dâŋ i mi bajuekaczi iqic-ŋopazo mume fic sakarecnehuc âgo mi ecnenšepieŋ. 11 Moc e ŋic iŋucne âgo ecneocmuzi bâbâsifuc-ticnere bafickeocmu.

12 Dâŋ gâcne bocjaha fokac, erâ tintezi papiao qâreŋkezo mi enarekac. No ŋoŋerao biac fâpe miczi muc manac enaŋte mukopac. Ehuc bubiaŋ kâcɋene bâfuanšepeneŋ. 13 Go qoge bâwosâekicne ere naru motecfâc jaŋe manasu-gareŋgopieŋ.