Na-kel-vǝhoti-an 12

Napǝhaṽut mai nǝtrakon

1 Beti noris nab̃iltitite tovisi len nǝmav. Ikad napǝhaṽut sua tosun namityal hum nahurabat. Nahǝbati ipat pipirien ale len nǝkadun ikad nǝkraun hǝn nam̃eso tovi 12. 2 Etian. Ale nǝboŋ tolǝŋon nabǝhaṽun, itaŋ, ikai len nǝpasusan topǝŋas vǝsa habat.

3 Beti noris navisian sual am len nǝmav. Ikad nab̃iltitrakon tobisibis tokad nǝkadun tomǝlevru mai nǝbalbal tosǝŋavur. Len nǝkadun tomǝlevru ikad nǝkraun lotomǝlevru.*Dan 7.7 4 Nagilen eliv kuv tosua dan totor hǝn nam̃eso gail, ale ibar hǝn gail vi lan navile a pan. Eil tǝban napǝhaṽut enan topasus, hǝn b̃ihan kavkav hǝn anatun nǝboŋ b̃evisi.*Dan 8.10 5 Ale aliten ipas anatun, aulum̃an b̃eil a m̃o hǝn naluṽoh hǝn nǝvanuan naut tiltile gail hǝn nǝbatw nametǝlai sekiŋ. Aŋel isab̃ul anatun, ipati vi mǝhat van hǝn aGot, vi lan nab̃iltihai bǝtbǝtah san.*Isa 66.7; Psa 2.9 6 Napǝhaṽut enan igam yav van hǝn naut masmas tob̃ǝb̃esw, naut aGot toutaut hǝni m̃osi, hǝn b̃ekǝtkǝta tǝban len nǝmariboŋ tovi 1,260 ei.

7 Beti ikad nab̃iltib̃alan len nǝmav. AMikael mai aŋel san gail lua b̃al mai nǝtrakon, ale nǝtrakon mai aŋel san gail lub̃al tǝlmam.*Dan 10.13, 21, 12.1; Jut 9 8 Avil nǝtrakon sǝdaŋ. Gai sawin len nǝb̃alan enan, gol gai mai aŋel san gail lǝsǝkad naut ideh am len nǝmav. 9 Ale nab̃iltitrakon egaii, nǝm̃at ta sutuai, gai lotokisi hǝn natǝmat mai aSetan, togǝras alat navile a pan kavkav, aMikael galito lubar hǝni vi pan vi lan navile a pan, gai mai aŋel san gail.*Gen 3.1; Luk 10.18

10 Beti nosǝsǝloŋ hǝn nadoldol towal habat len nǝmav toke,

“Gagai egǝmai! Nǝ-lav-kuvi-an dan nǝsaan,

nǝdaŋan, natohan pipihabǝlan aGot,

mai nǝdaŋan hǝn na-il-a-m̃o-an seKristo san, egǝmai!

AGot ilav kuv nǝvanuan san gail dan nǝsaan.

Eṽusan nǝdaŋan san hum akiŋ sidato.

Gagai aKristo san eṽusan nǝdaŋan hǝn na-il-a-m̃o-an san.

Husur aSetan tokel ke awawa nadǝlomian sidat gail lotosa,

atenan tokel ke lotosa len nǝhon aGot len nalennǝyal mai nalenmariug,

lubar hǝn atenan vi pan!*

11 Len nǝda heTuhsipsip mai len na-sor-lǝboii-an salito, nakitinan lotokele,

lowin sǝhori tia!

Lǝsatǝgau gat nǝmauran salito,

be loutaut hǝn lǝb̃imat, lǝsamǝtahw len nǝmatan.

12 Imagenan mitikemkem, gamit mǝttotoh len nǝmav!

Mǝtehǝhaṽur!

Be nab̃iltimǝtahwan dereh tegǝm len navile a pan mai nǝtas,

husur natǝmat evi pan van hǝn gamito len nab̃iltilol paŋpaŋ,

bathut elǝboii ke namityal togam gole.”

13 Nǝboŋ nǝtrakon tonau sǝhoti ke lotobar hǝni vi lan navile a pan, ehut napǝhaṽut topas natǝtai ulum̃an. 14 Be aGot igol alitenan ikad nǝhabǝlan eru hum nab̃iltiikel, hǝn b̃elǝboi b̃emǝlah vi lan naut masmas tob̃ǝb̃esw, naut aGot toutaut hǝni m̃osi, hǝn b̃ekǝtkǝta tǝban ei a tut dan nǝm̃at tovi trakon len nasihau totor mai nahudhusihau.*Dan 7.25, 12.7. Naikel evi nǝman namǝsav tohum nǝbal be totibau sǝhori. Len nasoruan ta Kris sake nasihau totor mai nahudhusihau, be ike mityal, mityal gail mai nahudhumityal, p̃itoṽ hǝn Dan 7.25. 15 Beti nǝm̃at eru hǝn nǝwai, isav dan nabuŋon hum nawisel, hǝn b̃isel husur napǝhaṽut hǝn b̃elivi van. 16 Be navile a pan evi tarhǝt selitenan, esǝŋav hǝn nabuŋon, edǝlom nawisel tosav dan nabuŋon nǝtrakon hǝn b̃imasur len tan. 17 Ale nǝlon nǝtrakon epǝŋas napǝhaṽut, ale ivan hǝn b̃igol nab̃iltib̃alan mai nǝpasusan san gail am, alat lotogolgol nǝsa aGot tokel buni, lotodaŋ len nakitinan aYesu tokel vǝhoti. 18 Ale nǝtrakon eil len nabion bitas.

<- Na-kel-vǝhoti-an 11 Na-kel-vǝhoti-an 13 ->