2 Jon

Nalob̃ulat napisulan na-vǝha-ru-an aJon totosi van hǝn alat siYesu

Ase itos nalob̃ulat egai?

AJon tovi ahai susur siYesu, gai itosi.

AJon itos nalob̃ulat egai hǝn nǝsa?

Itosi hǝn b̃eṽusan alat siYesu hǝn naṽide hǝn lǝb̃itoh, b̃on mai aGot mai nǝvanuan tile gail.

AJon itos nalob̃ulat m̃os ase?

Itosi van hǝn alat lotokad nadǝlomian len aYesu Kristo len naut p̃isi.

AJon itos nalob̃ulat ŋais?

Hum ma totosi len nasihau A.D. 90.

1) Na-ke-ivoi-an mai na-sor-tuṽ-an (1-3)

2) Nakitinan mai na-lǝmas-buni-an (4-11)

3) Nǝ-maris-kotovi-an (12-13)

1 Ginau, nǝvanuan na-il-a-m̃o-an, nutos nalob̃ulat egai van hǝn gaiug, Levet*Levet evi nasoruan sua sidato namilen napǝhaṽut toṽat nǝhes hum nasub̃. Len naut egai, nǝboŋ toke Levet mai anatum̃ gail, evi nasoruan tosusuah namilen toke naluṽoh sua len naut sua lotovi alat siYesu ei. Ale len naṽide tomaienan, len naut ṽisusua aJon toke Litegai am., aGot totabtabuh len gaiug, van hǝn gaiug mai anatum̃ gail. Nolǝmas bun gamit len nakitinan. Be savi ginau ŋai, galit p̃isi am lotolǝboi nakitinan, lolǝmas bun gamito, 2 bathut nakitinan itoh len gidat tabtab ale titah mai gidat vi sutuai. 3 AGot teviol kǝmas hǝn navoian mai gidato, nǝlon titaŋis gidato, nǝlodato tikad natǝm̃at. Natgalen p̃isi legǝm len aGot Tata mai aYesu Kristo tovi aNatun aTǝman, ale datikad natgalenan len nakitinan mai na-lǝmas-buni-an.

4 Nukemkem masuṽ nǝboŋ notosab̃ lǝboii ke anatum̃ galevis lohusur nakitinan hum aTata tokele hǝn gidato. 5 Imaienan nukel mai gaiug, Litegai, ke, gidat datelǝmas bun gidat gabag.*Jon 13.34, 15.12, 17 Enan, nototosi van hǝn gaiug, savi nakelean veveu todaŋ, be datukade len natub̃atan. 6 Na-lǝmas-buni-an imaiegai ke: datigol nǝsa aGot tokele. Enan evi nakelean todaŋ mǝttosǝsǝloŋ hǝni len natub̃atan, ale mitimashusuri. Mǝtelǝmas bun gamit gabag!

7 Nǝvanuan gǝgǝras isob̃ur luperŋan navile a pan tia, galit lomǝtahun lǝb̃ikel lǝboii ke aYesu Kristo egǝm vi vanuan kitin tokad niben. Nǝvanuan ideh tomagenan evi nǝvanuan gǝgǝras, aenemi seKristo. 8 Mǝtelǝlǝgau hǝn gamito hǝn asike nǝsa dattoum m̃osi b̃imasig be hǝn mǝtb̃ikad nakonp̃urp̃uran kavkav aGot totǝgau gati m̃os gamito len nǝmav.

9 Avan ideh asike b̃itoh tabtab len nap̃usanan seKristo, avil b̃ivan masuṽ am, atenan, aGot satoh len nǝlon. Avan ideh totoh tabtab len nap̃usanan, gai ikad aGot Tata mai aNatun, gǝlar p̃isi len nǝlon. 10 Imagenan, avan ideh b̃egǝm hǝn gamito, be asike b̃ilav nap̃usanan seKristo gǝm hǝn gamito, samtehǝhaṽur hǝn b̃eb̃is lohoim samito, samtike, “Ivoi,” maii; 11 husur avan ideh b̃ike, “Ivoi,” maii, gai ib̃on mai atenan len nǝsaan togolgole.

12 Nukad natit isob̃ur hǝn nǝb̃itosi van hǝn gamito, be nomǝtahun nǝb̃itosi hǝn napen len nalob̃ulat. Avil nuvatvat viri ke nǝb̃itoh mai gamito, ale dereh gidat datihol gabag hǝn datb̃epul hǝn nakemkeman.

13 Levet, aṽam̃, aGot totabtabuh lan, anatun gail, lukel na-ke-ivoi-an vi tǝban gaiug.