1 Nǝboŋ namtsatoh mai gamito, namtolǝŋon isa van van namtsalǝboi namtb̃idaŋ b̃uri am. Imaienan namtunau ke ivoi am hǝn ginau mai aSilas namrb̃itoh sǝb̃onamǝru len nab̃iltivile Atens.*Uman 17.15-16 2 Ale namrosǝvat aTimoti van hǝn gamito. ATimoti, awawa sinamǝru len nadǝlomian, eum siGot mai ginamǝru nǝboŋ namttokel ur na-kel-uri-an tovoi seKristo. Namrosǝvati hǝn b̃igol gamit mǝtb̃idaŋ am, ale hǝn b̃igol mǝtb̃elǝŋon b̃ivoi am len nǝlomito m̃os nadǝlomian samito, 3 hǝn na-lǝŋon-isa-vǝsa-an mǝttokade asike b̃igol gamit ideh b̃ipair dan nadǝlomian san. Husur gamit gabag, mǝtolǝboii ke aGot itabtabuh len gidato hǝn datb̃ikad na-lǝŋon-isa-vǝsa-an. 4 Husur, nǝboŋ namttotoh mai gamito, namtukel nalǝlǝgauan daŋir mai gamito ke nǝvanuan gail dereh lemǝdas bun gidato. Ale evisi maienan sum̃an mǝttolǝboii. 5 Imaienan, nǝboŋ nǝsalǝboi nǝb̃idaŋ b̃uri am, nosǝvat aTimoti hǝn b̃eus kitev nadǝlomian samito hǝn b̃elǝboii. Nunau masuṽ hǝni ke natǝmat tǝsab̃ nap̃isal ideh hǝn asike mǝttǝkad nadǝlomian len aKristo am, ale nauman namttogole hǝn mǝtb̃ikad nadǝlomian, tagǝm vi ut kǝmas.

6 Be aTimoti ivan, eris gamito, imadhatǝlmam, ale ikel mai ginamǝru na-kel-uri-an tovoi husur nadǝlomian mai na-lǝmas-buni-an samito. Ikele ke mǝtunau tǝlmam hǝn ginamito len nahǝhaṽuran, ale mǝtolǝŋon bun mǝtb̃eris ginamito sum̃an namttolǝŋon bun namtb̃eris gamito.*Uman 18.5 7 Imaienan, bathudud nadǝlomian, namtolǝŋon ivoi am len nǝlonamito husur gamito. Naut kǝmas nǝvanuan gail lomǝdas ginamit gol namtolǝŋon isa vǝsa, namtolǝŋon ivoi am len nǝlonamito husur nadǝlomian samito. 8 Gagai namtohǝhaṽur hǝn nǝmauran sinamit husur mǝtoil gǝgat len Nasub̃. 9 Namtuke namtesipa masuṽ vi tǝban aGot tinor hǝn nǝsa togole m̃os gamito, be nasipaan sinamit em̃idol. Namtosipa hǝn nakemkeman namttokade len nǝhon aGot husur gamito. 10 Len nalennǝyal mai nalenmariug namtusor tuṽ habat. Namtous aGot hǝn namtb̃eris gamit tǝtas, hǝn namtb̃igol kavkav hǝn nǝsa tom̃idol len nadǝlomian samito.

11 Ale aGot sidato tovi aTǝmadato, mai aYesu, aMasta sidato, tep̃ul p̃isal hǝn namtb̃egǝm hǝn gamito. 12 Nasub̃ tigol na-lǝmas-buni-an samito m̃os gamit gabag mai nǝvanuan p̃isi tepul sǝsǝhov, sum̃an na-lǝmas-buni-an sinamit m̃os gamito topul sǝsǝhov. 13 Nasub̃ tigole hǝn nǝlomit b̃idaŋ am lan, hǝn asike mǝtb̃ikad nǝsaan ideh len gamito, be mǝtb̃inor kavkav len nǝhon aGot, aTǝmadato, nǝboŋ aMasta sidato, aYesu b̃egǝmai mai alat lotovi esan. Ganan.