Pigbukasan 5

Ya libru na piglulun aw ya Nati na Karniro

1 Pagkatigkas yan, awun kyinita' ku na libru na piglulun na pig-awidan na kalintu na nyingkud dun ni trunu. Ya libru yeiy pigsulatan alag adti seled aw adti luwa', aw awun pitu ya silyu pada dili' ma-ulad na pangkay singalan. 2 Aw kyinita' ku uman ya anghil na kesegan, aw nyusip sakanan magi sa dakula' na tingeg, law nan, “Singalan ya umba' maglanit sa manga silyu aw mag-ulad sa libru yeiy?”

3 Manang wala' ya pangkay sambuk na umba' mag-ulad sa libru yeiy, pangkay adti tas na langit aw asini tas na lupa' aw adti dalem na lupa'. Aw wala' uman ya pangkay sambuk na umba' magtanaw sa adti seled. 4 Yanagaw to-o aku migsugaw asuntu na wala' ya pangkay sambuk na umba' mag-ulad aw magtanaw sa adti seled na libru yeiy. 5 Manang miglong kanak ya sambuk na lekat adti kaluwa͡an tag upat, “Dili' kaw magsugaw! Inunuwa! Awun saba sambuk na umba' mag-ulad sa libru iyan. Pigtawag sakanan na Liyon, lekat adti buwadbuwad ni Juda. Lekat sakanan adti manga buwadbuwad ni Dabid. Aw pigdeg da nan ya kanan manga po-on. Yanagaw yan olo' ya umba' maglanit sa pitu ya silyu aw mag-ulad sa libru iyan.”

6 Aw kyinita' ku ya Nati na Karniro. Nyindeg sakanan dun ni tenga-tenga' na upat ya kérubim aw kaluwa͡an tag upat ya maggagaday na nyakapalibed sa trunu. Aw ya Nati na Karniro, kyinita' ku na awun manga ulat nan asuntu sa pagpatay kanan. Awun pitu ya mata nan aw pitu uman ya suwag nan. Aw ya pitu ya mata, yan ya pitu ya ispiritu na pigsugu' na Tyumanem adti kadakula' na banwa. 7 Aw pigkamang na Nati na Karniro ya libru lekat adti kalintu na nyingkud dun ni trunu. 8 Aw sa pagkamang nan sa libru, lyumuhud adti asdangan nan ya upat ya kérubim aw ya kaluwa͡an tag upat ya maggagaday, aw pigsimba nilan sakanan. Aw ya kaluwa͡an tag upat kyatpedan na arpa, aw ya tagsambuksambuk kanilan nyawid sa lipung na bulawan na nyangkatmu' na insénso. Aw ya ebel na insénso, yan ya palangad pagpanawagtawag na manga utaw na nyangintu-u kan Jisus. 9 Aw migdalangan silan sa bagu na dalangan:

“Ikaw olo' ya umba' magkamang sa libru na piglulun

aw maglanit sa manga silyu.

Kay dun ni pagpatay kanmu

piglekat mu ya kadég na manga utaw magi sa kanmu dugu',

pada ma-imo' silan kana Tyumanem utaw.

Lekat silan adti kadég na tribu,

aw miglong silan sa madég na punganan na tingeg.

Sakup silan na kadég na manga nasud,

aw wala' pag-unawa ya batek na kindal nilan.

10 Aw pig-imo' mu silan kasakupan na kanmu pighari-an,

aw kasiling silan na manga magdadugsu-ay asini muna na migtabang sa imo-unun na Tyumanem.

Aw maghari' silan eped mu asini tas na lupa'.”

11 Aw tigkas yan, awun kyinita' ku na to-o madég na manga anghil na dili' ma-iyap. Nyakapalibed silan sa trunu aw sa manga kérubim aw sa kaluwa͡an tag upat ya maggagaday. Aw dyengeg ku ya tingeg na manga anghil 12 na migsidengan silan miglong sa to-o dakula' na tingeg:

“Ikaw saba ya Nati na Karniro na pigpatay,

yanagaw ikaw ya umba' deyen.

Dakula' ya kanmu katulus,

aw ikaw ya tagtun sa kadég.

Ikaw ya to-o matadeng,

aw to-o kaw kesegan.

Yanagaw ikaw ya umba' simba͡en

aw ya to-o dengganen.

Aw ikaw saba ya umba' dumawat sa pagdeyen na kadég.”

13 Tigkas yan, dyengeg ku uman ya kadég na awun ginawa na adti tas na langit, aw ya kadég na asini tas na lupa', aw ya kadég na awun ni dalem na lupa', aw ya kadég na awun ni tubig, aw alag silan migsidalangan, law nilan:

“Naten deyen ya nyingkud adti trunu.

Aw deyen tadun ya Nati na Karniro.

To-o silan basa͡an

asuntu sa kanilan dengeg aw kanilan pagdumala.

Yanagaw naten silan deyen na wala' ya tyamanan!”

14 Aw miglong ya upat ya kérubim, “Amén!”

Aw lyumuhud ya kaluwa͡an tag upat ya maggagaday aw pigsimba nilan ya nyingkud adti trunu aw ya Nati na Karniro.

<- Pigbukasan 4 Pigbukasan 6 ->