1 Nangkabo, a'undi Yesusag wana saingnia seneragtop nimi! A'un sik nari o'ona sembamsin nimi wamlomne, nari wanaag “A'unap sik uro haibiltahabe,” yeng uro senelamsin. A'unna na sembe, nari kilim weang ambarel tongolamnonge sembe kamna nubunge nanag tatneloa saog wamlom. Nangkabo nimi wanaagne wamlomne, nari wana a'unag yeng nubu sirikne nubu wamla. Ni Yesus nu Saelba Uhiropne sembe ambatsinne neneko seneraglapmundi, “Yesus nen samoro yaleba, Elap nhon El umag ya'ag wamukap,” aro nang-nangaro khaepto wamlulom. 2 Nuninyabo Euodiaap Sintikheap kelabo abeneko sembe a'undi yubu leptangtopne sembe mali semban. A'un abeneko Yesus nu Saelba Uhiropne ponekoap ma'aptangtop kelabo wamtom ane sembe, nari wenero mololamsinnena, “A'undi saekag lero wana aingnibarurom,” aro wenero mololamsin. 3 Nangkae Susugos, an wana wali uro sol wali uro nanap nhon tolamnam.[a] Anag moloro ambarelangkennena, “Andi sin kelabo phende tipto a'eptaikagti, yeplamsululam,” aro mololangken. Sin kelabo abeneko nanap nhon Yesus Yubu Walinge sembe kilim weanga ambarel tolamobongena, nungkae Klemenap, nimi orangeapti nhon tolamobo saog uro sin kelabo abenekoapti babe tolamobo. Sin nanap nhon awe tolamobo nimi neneko, sindi si Allahri el wamsildi, “Na Allahap nikag wali urobag ya'ag uro kamag wamukap,” aro nimi si mome toro pibogneag sindi si wamla.

4 “A'un wana ikin uro wamna koma, sop-sop wana yeng uro wamlulom,” alamna! Nen sap sarikto lemnun. A'un Yesus nu Saelba Uhiropne ponekoap sae tiptangto wamlom ane sembe, “Wana yeng uro wamlulom,” alamna! 5 Yesus nu Saelba Uhiropne poneko yanepne peram wamla ane sembe, nimi niag ulamsimunne, a'undi wanaag agha win-win aro ulamsululom. 6 Nia mangkina sembe wana tai pailangkang tau pailangkang uan koma, kwema ulamsilea sembe Allahag molona mololamlulom. Nia mangkina a'undi wana seneragnaag wamlange sembe a'undi wanaag agha “Nuni Allahri nunag walia ulamsil,” aro lelapmundi, Allahag molona mololamlulom. 7 Undo Allahag mololapmun tanena, a'un Yesus Kristusap ma'altalamlomdi, sae tiptangto wamlomne sembe, Allahri a'un wana aingnilamsilul. Allahri wana aingnilamsilengeag agha a'undinge wanaap seneragnaap yae paiamsilul. Allahri nimi wana aingnibahinepne neneko sembe mog so'oag nimiri seneragnep kom aghana, Allahri a'un wana aingnibahileri, yae wamsilul.

8 Nangkabo, Yesusag wana saingnia seneragtop nimi. Komoptopne ma'aro pimnuan. A'undi seneraglapmunnena, tam nene sembe seneragamlulom.

tam nene sembe wana to'opto seneraglamlulom.

9 Nari yubu a'unag ambarelamsinoba, ka'eamomdi, tolamomne sunsunum uro ul palamlulom. Nari ulamnoba, ililamneomdi, el taomne sunsunum uro ul palapmunba, Allahri wana aingnilamsileri, a'un yepto paiamsilul.

10 Nanap nu Saelba Uhiropne ponekoap ma'aptangto wamnari, na yeng sirik wamnelnena, ko'o maikno uro yabio aghana, wene a'undi na wamnange sembe seneraglamnelomdi, yeng sirik nembamnel. Nari lelamnange nene, “A'undi na sembe ekon taneom,” aro lelamna kom. A'undi na sembe elwamnelom aghana, a'un nanag whing pailanepne ekaukti, ko'o maikno uro yabioba, weneog pibom. 11 Nari lelamnange nene na kwema wamnelne agha lelamna kom. Nanag sa'a-sa'a kwema samenag ulamneogne agha “Nu Saelba Uhiropne ponekori yepto piamnel” aro eltalamsi. Ane sembe, naba nanag wamnenne abeneko agha “Mampul uro ua uanun,” aro lelamna. 12-13 Nari samenag na ua unne abene ni yambahi. Kwema uro unne to, na saeag kwema koma sa'a-sa'a wamnaba unne to, abenena tam nhon nanag lag tao. Samenag nimi maiknori ekonne tognoropne nhon nanag lag taoba, lag phoro ambatsinuan. Sa'a-sa'a nanag uro yabilenge, kwaneng yo babe, mon og teneba babe, tam ikinne babe, ikin komne babe nanag uro yabileba, nu Saelba Uhiropne ponekori mikip nenelamnelne agha nari sangsang ul palamneri, mampul uro wamnun. Tam nene nanag lag taoba, lag phoro ambarelamsin.

14 Tognoroba nene el tahiri, lag ambatsin aghana, a'undi na kwema wamnoag a'undi na yepneom. A'undi na yepto uaomne wali sirikne agha uaom. 15 Filipi nimi nangkabo! Samenag a'unag Yesus Yubu Walinge ambatsisiba, ka'ebalum sumeneko sembe a'undam nimi el wamlom. Samenag nari, “Yesus Yubu Walinge ambarel phunun,” aro a'un wamlomag Makedonia so'o agha lanaro palamsiba, Yesusag seneragtop nimi poloptangtop nimi yogneri yepto tatneek komne, a'un babe elwamlom. Ni Yesusag seneragtop nimi poloptangtop nimi agha, ot a'un nhonogti na yepneom. 16 Na as kota Tesalonika wamsiag babe, a'undi “Kwema elag ualeag,” aro na yepnenne ik etpare palilamnelum. 17 Nari sembamnangena, “A'undi na sembe pimnehengba, na toltoneog,” sembamna kom. Nari sembamnangena, “Kal wana maubaloa saog uro a'undi walia unne maupto palilamlomne wana yeng uro imnun,” senelamna. 18 Na kwema wamneonge sembe a'undi ni pimneomne tomno. Apna phelektopne babe pimneom. Na sembe ni pimneomne Epafroditusti payaonge tomno. Wenena nanag ni kwema wamneonge ni saeag taoba wamna. A'undi na sembe ni palilamnelomne nenena Allah sembe song walia taroba saogne wamla. A'undi na kwema wamneonge sembe pimneomne nenena, “Allah sembe tarukap,” aro wali pibomdi, Allahri wana yeng neneropne pibom. 19 A'undi “Allah sembe pibukap,” aro yepneomne sembe Allahri na yae piamnelne ponekori a'unag kwema ulamsilenge babe teknero yeplamsilul. Allahri saeag nia mangkina wamlaba, Yesus Kristus saeag maiknoro phelekto pibog. A'un Yesus Kristusap ma'altalamlomne sembe a'unag kwema uahinepne ni teknero yeplamsilul.

20 Nuba Nuniong Allahri nu yae piamsilne poneko ya'ag uro omeklamebe paghabog kiplamukap! Sikne agha saekag lebap.

21 Nangkabo! Allahri “Nari mabo taukang” aro werop nimi, sin Yesus Kristusap ma'aptangtop nimi ni sembe, nari kiplamsinne nene ambatsululom. Nangkabo Yesusag wana saingnia seneragtop nimi nanap nhon wamapne babe a'un kiplamsiang.

22 Yesusag seneragto Allah Elmabo taong nimi as kota eneag wamangne niri a'un kiplamsiang. Sin yubu sia leropne Kaisar ponekori ae yae ua urop nimi sin mori babe kiplamsiang. 23 Nangkabo, “Yesus Kristus nu Saelba Uhiropne ponekori a'un niag wana waliri ulamsileri nong ningki piamsilul,” aro a'un sembe molbarelamsin.

Abenda.

<- FILIPI 3