Filemon sembe mome toro pibogha El nenerop yubu Yesusti samenag wepto poghogne Paulus ponekori mome nene toro pibog. Eldi mome nene anam tomna komag, yubu walinge Yesus sembe ambarelamsiogpa, ora nimiri san tilibaekti, sae kaupto kop aeag tobongkibekti, as kota Roma poa piekpa, Paulus wamog. Tam nene sembe Lukas ponekori samenag mome toro pibog (Pogsiognangdi Ulameka pasal 22-28 tanekoag keknep). Paulusti as kota Roma wamoghag, Onesimus neneko haiptarek. Onesimus neneko samenag nimi arukna wamog aghana, Onesimus ili wamoghag agha tognoro lambaog. Roma nimi, mog so'o ngainangdi samenag ul palameknena, nimi arukna tanekori kamna tomna koma yog nimiringe awe tolamek. Roma nimi nubunangdi yubu sia paibekne sunsunum uro, nimi arukna tanekona, nimi wamek aghana, ora nimiri nimi arukna nene sae kaupto kamna kapto torobag pil palamsiekpa, “Nari awe tolamukang,” aro arukna nene kamna kapto tolamsiekti, sikini taek. Nimi arukna nene pham to, kam to nenelamsiloa saog uro kamna kapto tolamsiekti, sikini taekpa, nimi arukna tolamsiekne neneko sikiniri saeag aghabog wamek. Sikiniri arukna nene sembe, “Ya'ag obukap,” sembaho tanena, arukna neneko tebahoba, Roma nimi nubunangdi yubu sia paibekne sunsunum uro, nimi nhondi babe arukna neneko pelebanep kom. Yubu sia paibekne neneko li ko'oag, Onesimus neneko nimi arukna wamog. Arukna wamogti, ili wamoghag agha tognoro lambaogpa, weag pibom agha nubu as kota Roma piogti, wamog. Onesimus neneko Roma wamoghag, Paulus babe yin saleropnangdi, “Ae anea lambaleag,” aro Paulus yae wamek. Ik nhon sum Paulusap Onesimusap haiptarekpa, Paulusti yubu pere agha Onesimus nenekori Yesusag “Sikne,” aro seneraglamog. Paulusap Onesimusap lelamdekag agha, Paulusti el taogti, “Nangkae Filemondinge arukna nene tognoro piori, nanag yaori, Onesimus haiptanomo,” aro el taog. Paulusti samenag elkae Filemonag Yesus sembe yubu ambarogpa, Filemondi Yesusag “Sikne” aro seneraglamog. Filemondi Yesusag “Sikne” aro seneraglamog aghana, nimi arukna tam nene anam seneragna koma, samenag nimiri ul palamekne sunsunum uro ul pirop. Roma nimi nubunangdi yubu sia paibekne sunsunum uro, nimi arukna tognoro lambaog tanena, nimi nhondi arukna nene yepto pelebanep kom. Filemondinge arukna Onesimus tognoro piogne sembe, ili Filemondi, “Tebalul,” senep. “Tebalul,” seho tanena, Roma nimi nubunangdi yubu sia paibekne sunsunum uro, Paulusti Onesimus pelebanep kom. Pelebanep kom aghana, anamag Paulusti elkae Filemonag yubu mome toro pibog. Paulusti samenag elkae Filemonag Yesus sembe yubu ambarogpa, Filemondi Yesusag “Sikne” aro seneraglamogpa, Paulusti wene elkae Filemonag, “Onesimus anag yaleba, waban koma topsom,” aro molorop yubu nene mome toro pibog.
1Paulusti Filemonag kipto mome toro pibogha (1-3) 1-2 Nangkabo! Na Paulus mome nene agha a'un kiplamsin. Na Paulusti nimiag ambarelamsinnena, Allahri Yesus wepto nu mog so'oag nimi “Talulamsileri Saelbamsilul,” aro poghogne poneko sembe ambarelamsin. Allahri wepto poghogne neneko sembe Kristus alamap. Yesus Kristus poneko sembe ambarelamsin aghana, nimiri karongdi na sae kaupto kop aeag piamneongba, mome nene a'un sembe palilamna.[~1~] Nanap nungkae Yesusag “Sikne” aro seneragtopne Timotiusap wamnamdi, kiplamsinam. A'un kiplamsinam nimina, an Filemon sembe, “Nu babe awe nikne torop nimi wamap,” aro wanaagne wamlamba, kiplangkenam. Allah Elmabo andi aeag winiltalamang nimiap sembe babe kiplamsinam. Apna Yesusag “Sikne” aro seneragtop kel Apfia sembe “Nunipsa'el,” aro kiplamnam. Nungkae Arkhipus sembe “Awe nikne weltongolamapba, aisanangdi 'Seklebaik' aro ulamsiangba, nik nimi wamap” aro kiplamnam. 3 Nuri Allahag mobarelamsinamne, “Nuni Allah nuringeap, Yesus Kristus nu Saelbamsilne ponekoapti wana waliri a'undi wana aingnilamsirikpa, wali wamlulom,” aro molbarelamsinam. Allah omekaogha (4-7) 4-5 Nari sop-sop Allahag molona mololamnari, an si lero Nani Allah kipto omeklamna. Nari an sembe ka'ebanoba, “Filemon ponekori Yesus nia mangkina Salelamsilne ponekoag sik uro seneraglamlari, Allah elmabo o'ona senelamsildi yeplamsil,” seongba ka'ebano. Ane sembe Allahag mololamnange abeneko pere andi ulamlamne sembe seneragto “Naniong wali uro yeplamlamba, ulamla,” aro Nuni Allah kipto omeklamna. 6 Nari Allahag an sembe molona molbarelangkennena, andi el talapmenba, Yesus Kristus ponekoap ma'ap tangtopneag agha nunag wali-walia ulamsilne sembe ni el talulam. El talapmenne pere agha Yesusag seneraglamlamne sembe nimiag ambarelamsululam. An sembe Allahag molbarelangkenne, “Yeng uro tibin nenero ambarelamsulul,” aro Allahag “Yeplulam” aro molbarelangken. 7 Filemon naba nangkae. Andi Allah Elmabo ni o'ona senelamsilamdi, yeplamsilamne neneri Allah Elmabo maikno wana mikip nenelamsilam. O'ona senero yeplamsilamne nene yubu ka'ebanori, wana awi yeng maikno uaneoba, nari babe ulbanne mikip nembaneo. Paulusti Filemonag, “An arukna Onesimus waban koma topsom,” aro molbaogha (8-22) 8 Ane sembe, na Yesus Kristusti wepto pogneogne wamnari, sangsanga “Andi unualulam,” senep. 9 “Unualulam,” senep aghana andi ulamlamne sembe nari babe “Nangkae,” aro o'ona sembamna, ane sembe nari anag molona agha Onesimus sembe mololangken. Na wene sabal wamna aghana, Yesus Kristus poneko sembe ulamnaba, nimiri salero na sae kaupto kop aeag tobongkimneongba wamna. 10 Na sae kaupto kop aeag ane wamnoag anea Onesimus pone sembe Yesusag wana saingniro seneraghoba, Onesimus ili saog tano. Ili saog tano ane sembe, wene nari name Onesimus sembe mologhenne nhon mololangken. 11 Samenag el Yesusag wana saingniro seneragna komag, el andi ae lomag awe toropne arukna sol malinge wamoba, el sembe teba'en senelamom. Undop aghana, wenena eldi babe Yesusag wana saingniro seneragnange wamlari, wanaag agha ulamlange neneri na sembe babe, an sembe babe wali yepsinep. 12-14 El neneko nari anag sae lipsene kom. Na Yesus yubu walinge ambatsinne sembe wene kop aeag tobongkiamneongag wamnari, “Na yepnenne nhon wamso,” senelamna. “Onesimus poneko nangkae Filemon lunumna wamso,” senelamna aghana, anam andi sae saekag lemna komag nari yubu karebanep kom. Na wana yengnena, anba andi “Uanun,” senenne agha undo tanep. Nari anag “Unualulam,” senun kom. Ane sembe el nimi na wanaag sirikne neneko anag samoro pogholaneba, “Andi ae lomag awe toplul, to, nen nanag pogholalulam, to,” aro anba, andi ualulam.15 Wene abene Onesimus anap a'eptangto wamtom. Aghana, nari seneraglamnange nene, “Eldi samenag anag agha koloptaromba, Allahri yepsiori, Elba, 'Anag Onesimus samoro yaleba, a'un ya'ag ma'aptangto wamturom,' aro Allahri koloptaromne nene libo,” aro seneraglamna. 16 El samen an arukna wamo aghana, saombale sumeneko an arukna aghabog sembanep kom saog wamlaba, eldi Yesusag wana saingniro pibonge sembe “Naba nangkae walinge wanaagne,” sembamlulam. Elna na wanaag sirikne wamla aghana, an sembe nen ma'aro walinge wamla. Wene el wamlangena, an yepsirop nimi aghabog kom aghana, eldi Yesusag wana saingnia seneragtopne sembe anipsae taptopne wamloa saog wamla. 17 Nangkae, andi na sembe, “Nu Yesusag seneragtop nimiri awe nikne tolamnam,” sembamlam tanena, Onesimus nen anag samoro yaleba, na salero tomnhom saog uro, Onesimus yaleba toplulam. 18 Eldi anag loba uaori andinge kamna wamo agha laploa yao tanena, eldi kamna samoro tatkenne ni ane sembe nanag timbalul. 19 Andinge kamna elag wamlange nene sembe “Nari lumbanun,” aro na Paulus saeri mome ane anag palilamna. “Nari lumbanun,” aro salag palilangken aghana, nari yubu pere agha samenag Yesusag “Sikne” aro seneraghomdi, wene babe seneraglamlamdi, an nong ningki nanag tanepne sembe, “Hae tatnululam,” senun kom. 20 Ane sembe, Yesus Kristus nu talulamsildi, salelamsilne ponekoag agha, nu naro naipsae neneltalamapti, na yepto wana yeng nembanululam. “Onesimus yaleba, opna koma wali uro toplulam,” aro mololangken. 21 Nari mome ane palilamnange nene, “Nari wanaag babe kembaleri ualul,” sembamnari palilamna. Apna na el wamnangena, “Na molbaghen komne babe, nen phelekto walinge aghabog ualulam,” sembamna.
22 Nene sembe undo piamnarina, na kop aeag wamnange sembe, nangkabo, a'undi molona Allahag mololamlomba, sae lopneleri, andi aeag poa yanele sum eneko anag yanun. Ane sembe andi aeag na sembe ae lom nhon kolbamlulam.
Komoptobag kipsiogne (23-25) 23 Nungkae Epafras ponekori Yesus Kristus nu Talulamsildi Saelbamsilneag wanaag saingnia seneraglamlange sembe nimiri kop aeag tobongkibongpa, nanap nhon wamnam. Eldi babe a'unag “Nangkabo,” aro kiplamsil. 24 Na nangkabori awe nikne tolamap nimiri a'un sembe kiplamsiangnena: Markusap, Aristarkhusap, Demasap, Lukasapti kiplamsiap. 25 “Yesus Kristus nu Talulamsildi, Salelamsilne ponekori a'un nong ninkgi yepsilul,” aro kiplamsiap. Na Paulusti kiplamsindi, palilamna. Abenda.
15 Wene abene Onesimus anap a'eptangto wamtom. Aghana, nari seneraglamnange nene, “Eldi samenag anag agha koloptaromba, Allahri yepsiori, Elba, 'Anag Onesimus samoro yaleba, a'un ya'ag ma'aptangto wamturom,' aro Allahri koloptaromne nene libo,” aro seneraglamna. 16 El samen an arukna wamo aghana, saombale sumeneko an arukna aghabog sembanep kom saog wamlaba, eldi Yesusag wana saingniro pibonge sembe “Naba nangkae walinge wanaagne,” sembamlulam. Elna na wanaag sirikne wamla aghana, an sembe nen ma'aro walinge wamla. Wene el wamlangena, an yepsirop nimi aghabog kom aghana, eldi Yesusag wana saingnia seneragtopne sembe anipsae taptopne wamloa saog wamla. 17 Nangkae, andi na sembe, “Nu Yesusag seneragtop nimiri awe nikne tolamnam,” sembamlam tanena, Onesimus nen anag samoro yaleba, na salero tomnhom saog uro, Onesimus yaleba toplulam. 18 Eldi anag loba uaori andinge kamna wamo agha laploa yao tanena, eldi kamna samoro tatkenne ni ane sembe nanag timbalul. 19 Andinge kamna elag wamlange nene sembe “Nari lumbanun,” aro na Paulus saeri mome ane anag palilamna. “Nari lumbanun,” aro salag palilangken aghana, nari yubu pere agha samenag Yesusag “Sikne” aro seneraghomdi, wene babe seneraglamlamdi, an nong ningki nanag tanepne sembe, “Hae tatnululam,” senun kom. 20 Ane sembe, Yesus Kristus nu talulamsildi, salelamsilne ponekoag agha, nu naro naipsae neneltalamapti, na yepto wana yeng nembanululam. “Onesimus yaleba, opna koma wali uro toplulam,” aro mololangken. 21 Nari mome ane palilamnange nene, “Nari wanaag babe kembaleri ualul,” sembamnari palilamna. Apna na el wamnangena, “Na molbaghen komne babe, nen phelekto walinge aghabog ualulam,” sembamna.
22 Nene sembe undo piamnarina, na kop aeag wamnange sembe, nangkabo, a'undi molona Allahag mololamlomba, sae lopneleri, andi aeag poa yanele sum eneko anag yanun. Ane sembe andi aeag na sembe ae lom nhon kolbamlulam.