1 Wamekti Yesus yubu ka'elamekne sunsunum uro ulamek nimi, nimi maikno talamek. Maikno talamekti, Yahudi nimi wamek aghana sin nusamag agha Yunani yubu lerop nimi babe wamek, Ibrani yubu lerop nimi babe wamek. Yahudi nimi Yunani yubu lerop nimi wamekneri Yahudi nimi Ibrani yubu lerop nimiag wana mali palilamsiek. Yunani yubu lerop nimi tanekori lelamekti, “Ibrani yubu lerop kelabo yauog taekne babe, Yunani yubu lerop kelabo yauog taekne babe kwaneng tatsinep. Aghana, kal ma'al yepna sop-sop yeplamsiloma kelabo kaldam kelabo nu Yunani yubu lerop nimiringe olog tarelamsilom kom,” alamek.

2 Wene aro Yunani yubu lerop nimiri lelamekne sembe, Yesusti wepto pogsiog nimi aobare nang enekori Yesus yubu ka'ero ulamek nimi poloro wimbahiek. Poloro wimbahiekti, yubu ambarelamsiekti, “Nu kwaneng tenaba sembe nimi o'olamsiberi, Allah yubu nimi ambatsin koma libeberi, tenaba sembe ulamebenge nenena mali. 3 Ane sembe nangkabo, nimi saekpare wepsululom. Wepsululomnena, Allah Eldamne Yameri seneragna sunsunum uro wanaag seneraglamangdi, wana maro hekto seneraglamangdi, walia ulamangba ililamsilomne, sin nusamag agha nimi saekpare wepsululom. Wepsimunba, 'Sol wali, wali uro kwanengap, kal ma'alap kelabo yauog taekne nika-nika uro tarelamsululom,' aro nimi saekpare abenekoag ambatsiberi wepsukap. Wepsibeba, sindi saelbamikti, nimi yeplamsukang. 4 Nimi saekpare wepsimunne tanekori nimi tenaba saelbamikpa, nu Yesusti wepto pogsiognangdi sop-sop Allahag molona lelameberi, Allah yubu tibin nenero ambarelamsukap,” seek.

5 Wene seekpa, nimi wamek nimi tanekori “Wali” seekti, nimi weplamsiek. Weplamsiekpa, nimi nhon sina Stefanus webek. Stefanus ponekona, Allah Eldamne Yame Walingeri Stefanus nongag mikipne to'opto piamogpa, Stefanusti wanaag seneraglamogti, “Yesus sik uro Allahri 'Taulbahilulam,' aro wepto poghogne,” aro mikip uro seneraglamog. Yesusag “sikne,” aro seneraglamogne Stefanus webekti, nen weplamsiekti, Filipusap, Prokhorusap, Nikanorap, Timonap, Parmenasapna, Nikolausap wepsiek. Nikolaus poneko samenag Allah omeklamog kom aghana Yahudi nimi saog uro taogti, Allah omeklamekne saog uro el babe Allah omeklamogne taog. Elna as Antiokhia agha, “Na babe Yahudi nimiri omeklamangne Allah omeklamnun,” aro yingkina wamog. 6 Nimi Yesusag “Sikne” aro seneragtop nimi taneko ni wamekneri nimi saekpare abeneko wepsiek. Wepsiekti, Yesusti wepto pogsiognang enekoag pil phiekpa, Yesusti wepto pogsiognang enekori “Allahri mikip nembahileba, kwaneng pogto kelabo yauog taekne yeplamsumuna sol wali, wali uro saelbamlulom,” aro Allahag molona lero usoghag sae pipsiek.

7 Wene aro tenaba sembe awe tona sin saekpare nangag pibekti, Yesusti wepto pogsiognangdi Allah yubuag agha Yesus sembe tibin nenero ambarelamsiek. Tibin nenero ambarelamsiekpa, yubu eneko tala-tala nubu talamogpa, Yesus yubu ka'ero ulamek nimi as Yerusalem maikno talamek. Memnang Allah sembe pairopnang babe maiknori Yesus sembe el talamek. El talamekti, “Yesus ponekona, Allahri 'Malia ulamangne sembe “Opsineag,” aro taubahilulam,' aro wepto poghogne,” aro seneraglamekti, ma'al talamekti.

8 Stefanus neneko Allahri mikipne elag to'opto palilamogpa, nimiag walia ulamsiogti, “Yaghe, Allahri el pere agha ual” senenne kekneba nimiri uanep komne, Allah Eldamneri uanepne nimi maikno whingag Stefanusti ulamog. 9 Stefanusti undo unulamogpa, Yahudi nimi nusamag agha Libertini aldalamek nimi babe wamek. Libertini aldalamek nimiri Allah yubu lerop ae nhonag ma'al dalamekti, sina Libertini Allah yubu lero omektop ae engel dalamek. (Libertini aldalamek nimi anena, “'Nu samenag nimi arukna wamubu aghana sae lobitsiekpa, wamap,' aro urop nimi,” aro engel dalamek. Sin tanekona, mog so'o Kirene nimiap, as Aleksandria nimiap, mog so'o Kilikia nimiap, mog so'o Asia nimiap babe wamek.) Libertini nimi tanekori, “Stefanusti Yesus sembe nimiag ambarelamsilul kom,” aro Stefanusap yubu yo uro lel talamek. 10 Stefanusap yubu yo uro lel talamek aghana, Stefanusag Allah Yameri mikipne piamogpa, wana hekto yubu lelamogti, tibin uro ambarelamsiogpa, sindi samoro elag yubu lemnep kom wamog. 11 Sindi samoro elag yubu lemnep kom wamogpa, Libertini nimi tanekori haing kunuro nimi orangeag wana tolamsiekti, “Stefanusti ambarelamsilne nu karong. Ane sembe, nimi ambarelamsululomne, 'Stefanusti Musa san tiliptop yubu lebori, Allah babe san tiliptop yubu lebo,' aro orolena yubu ambarelamsululom,” aro wana toro ambatsiek.

Libertini nimiri wene aro wana toro ambatsiekpa, nimi orange tanekori, “Wali, ambarelamsukap,” seekti, “Nu aori ka'ebabongena, Stefanusti Musa san tiliptop yubu lebori, Allah babe san tiliptop yubu lebo,” aro orolena yubu lero ambarelamsiek.

12 Wene aro orolena yubu lerop nimi tanekori ambatsiekpa, nimi maiknori ambatsiekne ka'ebaekti, “Stefanusti mali ulamlaba, saelbaukap,” aro wanaag meso yalikahiog. Wanaag meso yalikahiogti, as Yerusalem wameknangap, Yahudi nimi nong nimi nubunangap, Musari samenag mome tobogne ambatsiropnang tanekoap piekti, Stefanus salel pina Yahudi nimi sembe yubu tam kareptop nimi Mahkamah Agama haiptangtobag payaek. 13 Yubu tam kareptop nangag payaekti, Libertini aldalamek nimi enekori yubu loloro lerop nimi babe pabiek. Libertini nimiri yubu loloro lerop nimiag ambarelamsiekti, “Ambatsululomne, 'Stefanus eneri nu haingag wene alamo,' sululom,” seek.

Wene seekpa, yubu loloro lerop nimi tanekori orolena ambarelamsiekti, “Stefanus eneri sop-sop sinag kweleknag lelamori, 'Allah Eldamne Mem Ae loba tao,' seo. Apna, Stefanusti lelamori, 'Musari samenag Allahri “Undo ualulom,” aro ambarogne sembe mome tobogne babe loba tao,' seoba, aori ka'ebabo. 14 Stefanusti yubu lebonge nu ka'ebabongena, 'Yesus Nasaretne ponekori Allahri Ae ene kwerek alul. Tanena, Musari samenag ambatsiogpa, saelba ulamapne orog nembaleri, wendogne nhon lag nembalul' seo,” aro wene seek.

15 Wene aro orolena yubu lebekne sembe Yahudi nimi sembe yubu tam kareptop nimi Mahkamah Agama haiptangtobag wamek nimi tanekori Stefanusti whingag tilamek. Whingag tilamekpa, kembiag agha Stefanusti whing Allah arukna malaikatti whing saog taog[a].

<- POGSIOGNANG 5POGSIOGNANG 7 ->