1 Nangkabo, nuri Yesus sembe a'unag ambarel ahibunge, teba'en uro amberal ahibu kom. A'undam nimi elwamlom.[a] 2 Nu anam Tesalonika a'unag yan komag as Filipi wamububa, nun san tiliplamsiekpa seklero wamubunge sembe a'un elwamlom.[~2~] Nimi maiknori san tiliplamsiekti iriklamsiek aghana, Nuni Allahri nu wanaag log kom nembahiog. Log kom nembahiogpa, Allah Eldamne Yubu Walinge Yesusti nimi talulamsilne sembe a'unag ambarelahibu.[~3~] 3 Nuri a'un ambarelamsibungena, ogtopne agha kom. Apna liptop yubu mane yubu agha ambatto, “Nimiri saeag agha walinge topsukap,” aro orolena yubu ambarelamsibu kom. 4 Nuri ambarelamsibunge nimiri, “Nun dam nimi sembe wana wali sembaukang,” aro ambarelamsibu kom. Nuri ambarelamsibungena, “Allah nu wanaag miplamsilne wana wali yeng sembalul,” aro ambarelamsibu. Nunag Allahri sembamsiognena, “Wali. Hae Yesus yubu walinge sembe ambatto sol wali uro sik uro sabo nembaukang,” sembamogpa ambarelamsibu. 5 A'un babe elwamlom. Nuri pamag agha “Nimiri wana topsukap,” aro emem arop yubu lerop kom. Apna nuri aboaba sembe tognoro nhon lenne babe orog. Allah nun ipsiogne wamla. 6 Nuri ulamubungena, a'undi babe, nimi orangeri babe, “Nu kibiang towalengkipsiseng,” aro ero ulamubu kom. Allahri samenag Yesus wepto “Nimi so'oag nimi taulbahimendi saelbamsululam,” aro poghogpa, El yaogne ponekori nu wepto pogsiogti, nunag mikipne tatsiog. Mikipne nunag tatsiog ane sembe nunag kwema ulamsoba, “Tatsiseng,” aro nuri a'unag molbahinep. Aghana a'unag molbahibu komne a'un elwamlom. 7 Mikipne nunag tatsiogneag agha a'unag molbahainep aghana, nu a'un anabiag wamubunge ilindi elme win-winna pia uropne saog uro piamsibu. 8 Nu a'unap nhon wamuburi, ulamubunge Allahringe Yubu Walinge pamag aghabog ambarelamsibu kom. Pamag agha ambarelamsibu kom aghana, a'un sembe o'ona senehinne loloro wamogpa, nia nuri nong mikipneag agha “Yepsukap” aro a'un sembe ulamuburi, ambarelamsibu. 9 Nu whin seklero ulamubunge nene sembe a'un ni elwamlom.[~4~] Allahringe Yubu walinge a'un ambarelamsibunge, “A'un nimi nhonag babe nu sembe saeagha seneragsukang kom,” aro sinag kweleknag whin seklero ulamubunge a'un elwamlom. 10 A'un Yesusag seneraglamlom nimi anabiag wamububa, a'undi haingdi babe iamsilumba, Allahri babe nu iamsiogpa ulamubu. A'un anabiag wamuburi, “Allahri uaukang senenne sunsunum uro uaukap,” senelamuburi sikne aghabog a'unag ulamsibu. Ane sembe nimi nhondi babe nuri a'un anabiag wamuburi, ulamubunge sembe “Malia-malia undo-undo ulamek,” senep kom. 11-12 Me ologne agha iliri yubu wenerop saog uro nuri a'un nimi nhon-nhon a'ero wenelamsiburi, a'un wana aingnilamsibu. Ane sembe nari “Sikne aghabog a'unag ulamsibu,” aro sik uro lelamnange sembe a'undi babe el wamlom. Eraruk uro wamlumba, yubu ambatto yeplamsibu. A'un wana ikin uro senelamlumba, wana aingnilamsibu. Sik komne salelamlumba, wenelamsiburi, “Nuri 'Unulamlulom,' aro ambarelamsibunge sunsunum uro ulapmundi, Allah wana yeng nembamlulom,” aro yubu mikip uro ambarelamsibu. Allahri a'un yoplamsildi, “Na Allahri yubu ka'ebamundi, Nandamne Yesus wepto pogsinge ponekoag sikne aro seneraglapmun tanena, Nari a'un wali uro saelbamsunun. Saelbamsineri, Nandamne imang wareropne ua urobag ya'ag nhon wamukap,” aro Allahri a'un yoplamsil. Ane sembe a'undi, “Allah wana yeng nenelamukap,” aro ulamlulom.

13 Tam nhon wamlange uro yabionge nenda sembe Allahag “Nuniong, wah” aro sop-sop molona lero kiplamap. Tam neneko uro yabiongena, nuri Allah Yubu a'unag ambarelamsiboba, yubu ambarelamsibonge neneko sembe “Nimiri yubu mo,” semban koma lipsiom kom. Nuri yubu ambarelamsibunge neneko sembe a'undi “Sik uro Allahri yubu ambarelamsiang,” aro ka'ebaomdi saelbaom. A'undi Yesusag “Nimi so'oag nimi taluro saelbahainepne,” aro seneraglamlomba, Allahri yubu enekori a'un nongag awe tolamla. 14 Nangkabo, Yahudi nimi mog so'o Yudea wameknang agha Yesus Kristus ponekoag seneraglamekpa, Yesus Eldamneringe taek. Eldamneringe taek nimi tanekoag samenag Yahudi nimi agha Yesusag seneragtop kom nimiri sinag malia ulamsiek. Yudea mog so'oag agha babe Yesus Eldamneringe taek nimi tanekoag Yahudi nimiri malia ulamsiek saog uro a'un Tesalonika nimiag babe Tesalonika nimiri malia ulamsiong. A'un seklena seklelamomnena, a'un sisa nimiri ulamsiongba, seklelamom saog uro sin Yudea Allah Elmabo taek nimi babe sin sisa nimi Yahudi nimiri “Seklebaik” aro ulamsiek. 15 Undo unulamsiek nimi tanekori nu Saelba uahiropne Yesus babe obekti Allah silimu tiptop nang babe olamsiekti nu babe seklelamukang aro olamsiek. Sindi nimi ni sembe aisa nembamsiekpa sin sembe Allahri babe karong sembahaiog. 16 Unulamsiekti nimi tala-tala uropne Yahudi sisa kom nimiag Yesus yubu ambatto taluro sae kilihin yubu ambatsinepne neneko iriklamsiek. Sindi undo ununa aghabog ulamsiekti Yesus yubu ambatsinne iriklamsiek ane sembe sin Yahudi nimiri malia ulamsiekne neneko leng-lenga langaro walelaori teknebaoba, wene Allahri sinag tam ikinne pelengenne aghabog wamla.

17 Nangkabo, a'un sembe “Nundam mabo,” senelamsiap pog, nimiri nunag malia ulamsiekne sembe nu sesog saog uro a'un laplobiagha yahiburi, haingdi ipsinep kom saog wamla. Haingdi ipsinep kom aghana, a'un sembe ekon tan koma wana to'opto o'ona senelamsiap. “Nu a'un wamlomag yaberi kemelahukap,” senelamobonge nu wanaag nubu uro lololtalamori, ngenohom alamsioba, otsik sol wali uro sunulamobo. 18 Nuri a'un kemelahukap sembabori, ik phende wilindi na yanun sembanori sumbano aghana, phia sikini nubunge ponekori nu ina irikahio. 19 A'un sik uro a'un nuri nimi wanaagne wamlomdi, nuri wana yeng sirikne nubu nembahaiomba, nuri wana a'unag wamla. Yesus nu saelba uahiropne poneko yalamle sumeneko a'un Yesus yubu mikip uro salelapmunne sembe wana yeng uro wamukap. El whingag nhon wameberi, a'un kembiagha, “Sol wali, wali uro ambatto tolamobonge wali uro tobirobo,” sembaukap. Ane sembe otsik uro a'un kemelahukap senelamobori sol wali uro sunulamobo. 20 A'undi nu wana yeng sirikne nubu nembahaiomba nuri wana a'unag wamlaba, a'un sembe seneraghi agha wali tolamobo senelamap.

<- 1 TESALONIKA 11 TESALONIKA 3 ->