1 Onne penia ya apanak an'anhedi i wal'uhe man lernohi Yesus na'akeme hi'i lir napanak mamani. Mapanak trimkasi laa Makromod Lalap la mapanak Ai namre'e namharu ri na'akeme. 2 Mapanak Makromod Lalap namre'e namharu rai-rai noro ma nodi molollo na'akeme leke ik holi namlina namkai, la mori noro akin man mou lolo Makromod Lalap noro ri heri ri wali kalarne. 3 Panaeku onne peni man wa'an la nahuwa'an Makromod Lalap man huri we'er ika nano dohohala nin molollo akin. 4 Ai raram nodi huri we'er ri na'akeme nano dohohala nin molollo, la raram nodi ri na'akeme rauroin wanakuku ma namlolo, 5 ono Makromod Lalap ida mehe, la Ri ida mehe namwali man lolo toro, la man du'ul kali wali'ur ri mormori na'akeme roro Makromod Lalap. Man iuwuku auwuku onne, Makromod Yesus Kristus man mai namwali ri mormori. 6 Ai nala kemen ri nesne leke na'ohu nahala ri mormori na'akeme nano dohohala noro makimaki nin molollo. Makromod Lalap mehen nili lere alam Yesus nala kemen rin nesne. Nano onne ik kauroin mouropo nahenia Makromod Lalap raram nodi huri we'er ri na'akeme nano rir hunukum makimaki.

7 Onne penia Makromod Lalap niliyedi maya'u, Nin hophopon ma nodi Yesus Lirna Wawa'an eni, leke ya aderre adaul Lirna Wawa'an eni laa ri ma ka namwali Yahudi. An hopon ya'u wakuku wanakuku ma namlolo leke hi akin naili'il Yesus. Ainu'u wanakunu eni namlolo, ka apoho.

8 I mo'onwal'u, ya apanak nahenia lolo ewi-ewi lo'o mo'oni hi'i lir napanak, hir kikan liman laa wawan rodi aki ma ka nahinuri Makromod Lalap, la yon hi rodi oimahu raramha'a.

9 Ya'u raram nodi maekenihe nair nainair nodi nohi noho honolla. Yon hir hi'i muruk man hi'i rin po'on mamani, yon nair maha, mutiyara noro nainair man ma'aruru wake'e leke ri namehin ra'uli, 10 maa ra'akeki rodi honoli man wa'an mamani leke rin po'on rauroin hi akin ka nahinuri Makromod Lalap.

11 Lere ri ma nodi molollo wakuku loikaru wanakuku, wa'an rehi maekenihe karkaramedi rakani wanakuku onne noro akin ma namdaru. 12 Ya amhene maeke nodi molollo mo'oni, ee wakuku mo'oni. Wa'an rehi karkaramedi la rakani, 13 ono dedesne Makromod Lalap umupala Adam onne noluwedi Hawa. 14 Enla nee lalap kan kokwudi Adam, maa kokwudi Hawa penia larlewenedi Makromod Lalap Nin nou. 15 Maa maekenihe lernala rere'e harharu lere alam mormoriyana,*Napa'ahne ida woro'o aile: 1) lernala rere'e harharu ono hi ramwali man makrana tatana wawa'an, ee 2) hir lernala or'ori dardari ono mormoriyana Tatana man Kuru Mehe Lai Mehe de herre Hawa nin hini'i onne. horo nahenia hi akin namkene naili'il Makromod Yesus Kristus, la raramyaka ri namehin, la holi rodi aki man mou lernohi hini'i wenewhe man wa'an.

<- 1 Timotius 11 Timotius 3 ->