BIGIVAKALA 7

1 Latugu, kululuwai avaka lalivali, e gala avai tuta bukulumwelavi avaka lalukwaim bukuvagi. 2 Kuvagi avaka lalukwaim e bukusisu bwaina. Kuyamataim bibwaina e bukubokuli ulo vituloki, makawala lokuyamati matam. 3 Kuyamati ulo vituloki makawala kam kakalougwa tuta komwaidona; e kugini makwaina onanom. 4 Kabitam bukuvigaki lumta, e ninitalapula lubaim tatoum. 5 Paila makwaisina bileilimsi metoya tauwau ituwoli si kukova, deli metoya vivila ituwoli osi katudabuma.

Vivila la bubunela gegedu

6 Kwaitala tuta ogu bwala alavi matagu metoya owinidowa, 7 e agisi bidubadu tauwau tubovau tobubeikam. Mitaga avitusi taitala tonagowa oluwalaisi. 8 Matauna ililoula wa keda katitaikina okatugulugwelu, ambaisa natana vivila eisisu. Matauna ilokaia katitaikina la bwala minana, 9 odubilikoyavi bogwa eidudubila. 10 E minana ibodi matauna. Minana ikatubaiasa makawala natana nakalimwala deli ininanamsa avaka nanola bivagi. 11 Minana natuvigaki wala deli gala wala inikoli mmosila, e minana tuta komwaidona biuweiyei wala. 12 Mimilisi tuta bitobogwa itulotula okatugulugwelu, e mimilisi tuta wa keda, e mimilisi tuta obikubaku. 13 Minana ilavi yamala ikaipapi matauna totubovau, iviyuwoli matauna e igisamapusi e ikaibiga, kawala, 14 “Mwa! Bogwa lavagi ulo semakavi lagaila deli kesala viliona[a] metoya wa lula ogu bwala. 15 Mapaila lasunapula laninevaim. Yeigu magigu babanaim, e ka! - mayoku! 16 Bogwa layai kanunuva okabagu miyasina yaginigini metoya Itipita. 17 Bogwa lakatusoki vavagi simasimina metoya mro, lileikoya deli gau. 18 Yo! Kuma! Tam takanavai. Da yobobu bivigaki da mwasawa. 19 Ulo mwala gala isisu wa bwala. Bogwa leilʹo ikwaidadina kaduwonaku. 20 Bogwa eikau mani bidubadu leilau, deli gala bima olopola kwaiyu wiki.”

21 Mapaila minana bogwa itavili nanola matauna metoya ola tainona, e matauna ikouyagila wala, paila minana saina nakatudabuma bigatona. 22 E saina nanakwa matauna ilokaia minana makawala natana bulumakau bilauwaisi paila bikatumataisi, kaina makawala natana dia ivatunetuna bila wa sikula olumoulela, 23 ambaisa kaiyala bibisimati minana. Matauna makawala mauna bila wa sikula. Paila matauna gala inikoli bogwa isisu osilagi.

24 Baisa tuta litugwa kunakaigalaigusi. Kukwatukovaisi taigami bukunakaigalaisi avaka balivali. 25 Taga kutagwalasi natana vivila makawala minana bitavili ninami. Taga kuvakulaisi minana. 26 Minana bogwa iyogagi tauwau bidubadu e iyomituli kasi kaliga saina bidugaga gala gagabila bitakalau. 27 Kidamwa bukulokaiasi minana ola bwala, baisa bogwa lokuliloulasi okedala Tuma. Paila baisa kaduvapoi kedala bilokaia kaliga.

<- BIGIVAKALA 6 BIGIVAKALA 8 ->