BIGIVAKALA 6

1 Ki latugu, bogwa kukwatotila mwada bukumapu availa availa kasi wasi ke? 2 Ki om biga titoulem bogwa eiwawaim, e kuvisilagaim metoya om biga katotila kadai? 3 O ka latugu, yoku bogwa lokusisu oyamala matauna, mitaga baisa makawala bukuvagi paila bukuyuvisaim metoya pakula makwaina. Nani bukulokaia matauna e kuyokakapisi baisa matauna kidamwa bitanekwaim. 4 E gala bukumasisi kaina goli bukuvaiwasi. 5 Ibodi bukuyuvisaim metoya pakula makwaina makawala mauna eiyoyowasi kaina diya eisisakaulasi metoya towaiga.

Paila tobigumata

6 Ibodi tobigumata bimitakavataisi ammakawala si kaisisu lata. 7 Lata gala isim kasi tokugwa, si guyau, kaina kasi tokwaraiwaga, 8 mitaga ikatugugulaisi kʹasi okweluvala kaula e ikatubaiasasi paila tutala molu. 9 Ammakawala kala kaduwonaku paila tobigumata bikanudubaduba? Avai tutaga bitokaia? 10 Matauna bilivala, kawala, “Igau sita akipu matagu. Bakatukwaibobu e bavaiwasi pikekita.” [a] 11 Mitaga saina masisi matauna bigweiluva, e molusaula biyogagi matauna makawala tolibulebu.

12 Tomota tomitugaga gala dimlesi, bititavinasi wala bisisasopasi. 13 Matausina imitikipoisi deli ititageunasi mwada biwabwaimsi, 14 tuta komwaidona matausina ninasi doudoga wala, mapaila ininamsaisi sula wala e iyoulavekaisi pakula ambaisa ambaisa. 15 Paila baisa makawala, kabommayuyu bisikaila matausina gala yolibiga, e gala ibodi bitakatumovi.

Guyau kwekukolola

16 Kwailima kwaiyu vavagi Guyau kwekukolola, e gala wala bitagwala bigisi.

17 Gisimnaka,

udomomola,

yamila makweyasina ikipwasasi tobubwaila buyavisi,

18 ninalela mitugaga,

kwai ivananakwa paila bivagi mitugaga,

19 matauna tobigavila,

e matauna tosilapulu biyogagi si kalubaila sala.

Katuloluta paila kailasi

20 Latugu, kuvagi avaka tamam eilulukwaim deli gala avai tuta bukulumwelavi avaka inam eivitulokaim. 21 Tuta komwaidona si biga bukuyamati deli kukwatukikiti mabigasina onanom. 22 E veyamwa si vituloki baisa bivakadaim om tuta kwaidadina, bikolaimsi wa bogi, deli bikatululutaimsi wa yam. 23 Paila si katuloluta makawala kaitapa isim visigala, e si katuwola baisa yoku ibodi bivakadaim ammakawala bukusisu bwaina. 24 Mabigasina ibodi bivaleilimsi metoya vivila gaga, deli si kukova tauwau ituwoli metoya osi katudabuma. 25 Taga bikau nanom metoya okasi naminabwaita deli taga bukukouyagila metoya osi tagwala. 26 Taitala tau ibodi wala bibuwi kwaitala buwa baisa natana nakalimwala; mitaga paila kailasi bikasau wala la kaisisu.

27 Ki ibodi bukukwaipapi kova ovitakom e kudoki galaga bigabu kam kwama ke? 28 Ki, ibodi bukuloula odabala pwanosi eikapolu e kudoki galaga bigabu kaikem ke? 29 Baisa bogwa wala makawala bukusilagi kidamwa bukumisii som la kwava. E availa availa bivagaisi makawala, bogwa bibodasi mmayuyu. 30 Tomota gala ikoulovaisi matauna iveilau kaula avai tuta ikamolu; 31 mitaga kidamwa avai tuta biyosisi matauna touveilau ibodi wala matauna bimapu sivalima sivayu avaka leikau - e ibodi bisaiki komwaidona la guguwa avaka leiyosi. 32 Mitaga matauna tokakailasi gala wala isim nanamsela. E titoulela wala iuvisilagi. 33 E gala bitemmalaisi matauna biwaiyasi wala; e kala mmosila wala bikatumati. 34 E tau tovavaigila la gibuluwa saina siligaga avai tuta biuliweli gala makawala gibuluwamakava, e avai tuta bikeula lugwala, gala wala inikoli avai tuta bisim. 35 E gala ibodi bitagwala bikau avai lula; kaina avai bobwailila paila kiminumla nanola.

<- BIGIVAKALA 5 BIGIVAKALA 7 ->