23
1 E iluki Balaki, kawala, “Kukwaliai kwailima kwaiyu kabolula baisa paila yeigu, e kumai nalima nayu bulumakau nammwala deli nalima nayu sipi nammwala.”
2 Balaki ivagi avaka eiluki. E matauna sola Balam igabwaisi natana bulumakau deli natana sipi odubasi kabolula kwaitala kwaitala. 3 Oluvi Balam iluki Balaki, kawala, “Kutoli baisa opapala m lula kwegubugabu e igaugwa alokaia bagisi kaina Guyau bibodaigu kaina gala. E igau balukwaim avaka bilukwaigu.” E matauna kalamwaleta ila wa koya. 4 E Yaubada ibodi matauna. E Balam iluki Guyau, kawala, “Bogwa lakaliai kwailima kwaiyu kabolula e lagabu lula bulumakau natana deli sipi natana odubasi kwaitala kwaitala makwaisina.”
5 E Guyau iluki Balam avaka bilivala e iluki matauna bikaimilavau baisa Balaki bisola Guyau la biga baisa matauna. 6 E ikeiita ibani Balaki eitotu opapala la lula kwegubugabu deli goli komwaidosi kasi tokwaraiwaga mina Mowabi.
7 Balam ivitoubobuta baisa makawala.
“Matauna Balaki guyoula Mowabi eimaiyaigu metoya mapilana Siria,
e metoya wa koya opilibomatu.
Kawala, ‘Kuma kulivala paila yeigu.
Bukubuloti mina Isireli.’
8 Ammakawala babuloti avaka Yaubada gala ibuloti,
kaina balivala paila kaliga avai tuta Guyau gala wala eilivala makawala?
9 Metoya dukutotu saina walakaiwa gagabila bagisi matausina.
E igagabila bavitusi matausina metoya wa koya.
Matausina makwaina boda eisisuaisi kasimwaleta.
Bogwa eikatetasi kidamwa Yaubada eikabwaili matausina,
gala makawala boda ituwoli.
10 Dalela Isireli makawala tubumyou.
Matausina saina bidugaga gala gagabila bitakalau.
Ibodaigu bavigimkulovi ulo tuta ovalu watanawa makawala taitala Yaubada la tomota.
Ibodaigu bakaliga duwosisia wala makawala tomitukwaibwaila.”
11 E Balaki ivitakauloki Balam, kawala, “Avaka kuvagi baisa yeigu? Yeigu lamaiyaim baisa paila mwada bukubuloti agu tilaula, mitaga yoku lokukwabwaili wala matausina.”
12 E Balam ivitakauloki, kawala, “Yeigu gagabila balivala mesinaku wala avaka Guyau bilukwaigu balivala.”
Balam siviyuwela la vitoubobuta
13 E oluvi Balaki ikaibiga baisa Balam, kawala, “Kuma bitala kwaiyuwela valu e baisa igagabila bukugisi mimilisi wala mina Isireli, e metoya baisa bukubuloti matausina paila yeigu.”
14 Ivakouli matauna ilau obaleku Sopim odabala Koya Pisiga. Baisa tuvaila ikaliai kwailima kwaiyu kabolula e igabu natana bulumakau namwala deli natana sipi namwala odubasi kwaitala kwaitala makwaisina.
15 Balam ikaibiga baisa Balaki, kawala, “Kutotu baisa opapala m lula kwegubugabu e yeigu bala baisʹe babodi Yaubada.”
16 E Yaubada ibodi Balam e iluki matauna avaka bilivala, deli iwitali matauna bikaimilavau baisa Balaki paila bisola Guyau la biga baisa matauna. 17 Mapaila ikaimilavau e ibani Balaki itotu wala opapala la lula kwegubugabu deli tokwaraiwaga mina Mowabi. E Balaki ikatupoi avaka Guyau eilivala. 18 E Balam ivitoubobuta baisa makawala.
“Balaki yoku Sipora latula, kuma,
e bukulagi avaka balukwaim.
19 Yaubada gala makawala tomota tosisasopa.
Guma watanawa tuta tuta ikivilivau nanola mitaga Yaubada gala makawala.
Avai vavagi ikatotila bivagi e bogwa bivagi wala.
Eililivala e bogwa eikaloubusi.
20 Bogwa eikaraiwogaigu paila bakabwaila.
E avai tuta Yaubada bikabwaili, yeigu gala gagabila badouyumali.
21 Bogwa lagisibogwi paila mina Isireli tuta oluvi
kidamwa gala bibodasi mwau kaina pakula,
paila Guyau si Yaubada deli matausina,
e matausina ikamitulaisi matauna si Guyau.
22 Yaubada eikaimilivau matausina metoya Itipita.
Iyowai paila matausina makawala bulumakau nabolodila.
23 Baisa gala isisu avai silami deli avai mlukwausa
gagabila biyogagaisi mabudona mina Isireli.
u Tuta baisa tomota bikaibigasi paila mina Isireli, kawasi,
‘Kugisaisi avaka Yaubada bogwa leivagi.’
24 E mabudona mina Isireli makawala laiyoni napeula,
gala wala bivaiwasi tatoula wala bigadi bikamtumtu
tatoula bimom buyavi metoya minasina bogwa eikamati.”
25 E Balaki ikaibiga baisa Balam kawala, “Ka, lokupaiki bukubuloti mina Isireli. Mitaga anigadaim gala bukukwabwaili matausina.”
26 Balam ivitakauloki, kawala, “Kaina gala alukwaim mwada bogwa bavagi vavagi komwaidona avaka Guyau leilukwaigu.”
Balam sivitolula la vitoubobuta
27 E Balaki ikaibiga kawala, “Kuma deli yeigu bitala balauwaim ituwoli valu. Kaina Yaubada bitagwala bukubuloti matausina paila yeigu metoya mapilawena.
28 E ivamwenei Balam odabala Koya Peora ambaisa metitoki baisa viloupakala opapala.
29 Balam iluki matauna kawala, “Kukwaliai kwailima kwaiyu kabolula paila yeigu e baisa kumai nalima nayu bulumakau nammwala deli nalima nayu sipi nammwala.”
30 E Balaki ivigaki makawala eiluki, e igabu natana bulumakau namwala deli natana sipi namwala odubasi kwaitala kwaitala kabolula makwaisina.
<- KALA BAWA 22KALA BAWA 24 ->
- a Mina Isireli gala wala avai meguva kaina avai silami bivagaisi.
