MADIU 2

Tokwabitam imakaiasi Yesu

1 Yesu ikaloubusi Bedeliem[a] viluwela Yudia,[b] ola tuta Kini Erodi.[c] E oluvi tokwabitam[d] metoyasi opilibomatu imakaiasi Yerusalem, ikaibigasi, kawasi, 2 “Ambaisa matauna eikaloubusi mina Yudia si kini? Paila bogwa kagisaisi kala utuyam leiyuwola obomatu, e lakamaisi mwada bakakavaginasi baisa matauna.”

3 Kini Erodi bogwa ilagi ikubukubu lopola deli komwaidosi mina Yerusalem. 4 E idou isigugulasi tolula kasi tokugwa[e] deli toninitalapula paila Karaiwaga,[f] ikatupoi matausina, kawala, “Ki, ambaisa bikaloubusi Mesaia?”[g]

5 E ilukwaisi matauna, kawasi, “Mapilana Bedeliem oviluwela Yudia, paila makawala tovitoubobuta leigini, kawala,

6 ‘E, yoku Bedeliem, mapilana Yuda,

yoku gala valu kasi kwekekita oluwalaisi vilouvakaveka mapilana Yuda;

paila metoya baisa yoku tokwaraiwaga bima

biyamati uli tomota Isireli.’ ” [h]

7 Erodi ikium idou tokwabitam e ilagi metoya baisa matausina avai tuta utuyam eiyoumatila. 8 E iwitali matausina bilosi Bedeliem, ikaibiga, kawala, “Kulosi bukunevisi mokwita paila gwadi magudiwena; e avai tuta kubanaisi magudina, bukumiakaigusi biga, e yeigu tuvaila bala bakavagina baisa magudina.”

9 Matausina bogwa ilagaisi kini la biga e ilosi. Ililoulasi, e ka, igisaisi utuyam, minawena omitibogwa leigisaisi obomatu. E utuyam ikugwai matausina, e itom ikibuboti ambaisa monagwadi ikanukwenu. 10 Imwamwasila ninasi tutala igisaisi utuyam deli si mwasawa sainela. 11 E isuvisi wa bwala, igisaisi monagwadi deli Meri inala, e ikavaginasi baisa matauna. Itagaiyaisi kasi kauya, si bobwailila isakaisi baisa magudina; goula, bulami mapula mwau toyo mro.

12 E Yaubada iluki matausina wa mimi taga bikaimilavausi baisa Erodi; mapaila ivapoisi keda ituwoli ilosi osi valu.

Isakaulasi Itipita

13 Tokwabitam isilavaisi mapilana, e la anelosi Guyau iyoumatila baisa Yosepa wa mimi, ikaibiga, kawala, “Kutokaia, kulau monagwadi deli inala, e kusakaulasi bukulosi Itipita baisa bukusigagasi igau balukwaim; paila Erodi igau binevi monagwadi mwada bikatumati matauna.”

14 Itokaia, isakawoli monagwadi sola inala wa bogi, e ilokaiasi Itipita, 15 e isigagasi baisa igau bikaliga Erodi; kidamwa avaka Guyau bogwa ilivala metoya ola tovitoubobuta gala bisala, kawala, “Ladou latugu bisilavi Itipita bima.” [i]

Erodi ikatumati gugwadi

16 Erodi igisi tokwabitam eisipulokaisi matauna, e igibuluwa sainela; ikaraiwaga bikatumataisi gugwadi tauwau komwaidosi isisuaisi Bedeliem toyo okatuposulala mapilana kidamwa kasi taitu kwaiyu kaina gala iboda kwaiyu, makawala tuta eilagi metoya baisa matausina tokwabitam.

17 E avaka Yeremaia tovitoubobuta ilivala gala isala, kawala,

18 “Kaigila ilagaisi mapilana Rama,[j]

valam, kavivia sainela,

Retieli iuvalam paila litula,

gala magila visimoli,

paila bogwa ikaligasi litula.” [k]

Ikaimilavausi metoya mapilana Itipita

19 Erodi bogwa ikaliga. E mapilana Itipita Yosepa imimi igisi la anelosi Guyau iyoumatila. 20 Anelosi ikaibiga, kawala, “Kutokaia kulau monagwadi sola inala, kukwaimilavausi mapilana Isireli; paila matausina mwada bikatumataisi monagwadi bogwa leikaligasi.” 21 E itokaia ilau monagwadi sola inala, ikaimilavausi mapilana Isireli.

22 Mitaga tutala ilagi Akelosi[l] iguguyoi Yudia kaimapula tamala Erodi, ikukoli bilokaia baisa; Yaubada ivituloki matauna wa mimi, mapaila isaitaula ila Galili,[m] 23 e ila isisu ovalu yagala Nasaredi,[n] e mwada avaka ilivalasi tovitoubobuta gala bisala, kawasi, “Bidokaisi matauna guma Nasaredi.”[o][p]

<- MADIU 1 MADIU 3 ->