Link to home pageLanguagesLink to all Bible versions on this site
31
Mina Isireli bikaimilavausi osi valu tatousi
1 E Guyau ikaibiga kawala, “Ka! Igau tuta bima dala komwaidona mina Isireli bivigakaigusi si Yaubada, e yeigu bavigaki matausina ulo tomota. 2 Paila metoya oviloupakala, yeigu ayomitali ulo nokapisi baisa availa availa matausina eisakaulasi metoya okaliga. E avai tuta mina Isireli inainevisi paila bivaiwasisi, 3 yeigu atotu kaduwonaku ayoumatila baisa matausina. Mina Isireli, yeigu tuta komwaidona aiyebwailimi wala, mapaila tuta baisa yeigu bammitukwaiyaimi wala. 4 Mapaila yeigu bavagugulaimi tuvaila. E yokomi bukukwauwaisi sasani e deli mi mwasawa bukukwaiwosisi. 5 E yokomi bukubigulivauwaisi mi bagula bigulesi waini odubakaila mapilana Sameria, e availa availa matausina bivaulasi, bogwa bikamsi avaka kabinaila si bagula. 6 E bogwa makawala, igau tutala bima toyausa bidousi metoya okoyala Epereim[a] bikaibigasi kawasi, ‘Kutokaiasi kumaisi tamwenasi Koya Saiyoni, e bitalokaiasi Guyau da Yaubadasi.’ ”

7 E Guyau ikaibiga kawala,

“Kuwosisi deli mi mwasawa paila Isireli,
mabudona dubasi boda komwaidona.
Kuwosisi kami wosi mapilana wosi yakaula,
‘Guyau bogwa eikatumovi la tomota.
Matauna bogwa eikoli komwaidosi matausina eikesasi.’
8 Ka, yeigu bamai matausina metoya opiliyavata,
e bavaguguli matausina metoya obusibusila valu watanawa.
Tokwau, topem bimaisi wala deli matausina,
tuvaila susuma, deli minasina bogwa eitotu kaivalulu.
E matausina bidalasi e si boda bikwaiveka.
9 Ulo tomota bikaimilavausi deli si valam,
e matausina bininigadasi avai tuta yeigu bavakadi bakaimilivau.
Yeigu bavakadi matausina balau ambaisa sopi bititayelu,
deli wa keda makadana kadadudubuna, e gala gagabila bisilubeibeusi.
Ka, yeigu makawala mina Isireli tumasi,
e Epereim avigaki makawala ulo kuluta tau.”
 
10 E Guyau ikaibiga kawala,
“Boda komwaidona, kunakaigalaigusi,
deli kukwamitulaisi ulo biga baisa valu makwaisina kaduwonaku.
Yeigu bogwa lavabutu ulo tomota, mitaga igau bavaguguli matausina tuvaila,
e bayamati matausina makawala toyamata sipi iiyamati la yawa.
11 Yeigu bogwa lataneku ulo tomota mina Isireli,
deli lakoli matausina metoya budotala boda saina budopeuligaga.
12 Mapaila matausina bimaisi biwosisi deli si mwasawa odabala Koya Saiyoni,
deli bimwamwasila ninasi paila ulo bobwailila
basaiki witi, waini, bulami olibe,
e basaiki sipi deli bulumakau.
Matausina bavigaki makawala kwaitala bagula tuta komwaidona kuna bikukuni wala makwaina.
E matausina biyosisi komwaidona avaka avaka magisi.
13 Kapugopugula deli si mwasawa bikikaiwosisi,
e tauwau tubovau deli tommoya bitutulaulasi.
Yeigu bavisimoli matausina, e si valam bavigaki si mwasawa,
si ninamwau bavigaki kala mwamwasila ninasi.
14 E yeigu bavakomati tolula metoya kaula makwaisina kalamatabwaila,
deli avaka ulo tomota magisi, yeigu bogwa wala bavagi.
Ka, yeigu Guyau bogwa lalivala.”
Guyau la nokapisi baisa mina Isireli
15 E Guyau ikaibiga kawala,
“Kaigila ilagaisi mapilana Rama,
valam kavivia sainela.
Retieli iuvalam paila litula.
Matausina bogwa eitamwausi,[b]
e gala wala magila visimoli. [c]
16 Ve! Kusimla, e kuvaisi mitilagim.
Avaka avaka lokuvagi paila litumwa
igau bukubani mapula.
Matausina igau bikaimilavausi bimaisi metoya tilaula osi valu.
17 E yoku ibodi bukupikwaku paila tuta oluvi.
Paila litumwa bogwa bikaimilavausi bimakaiamsi goli!
Ka! Yeigu Guyau bogwa lalivala.
 
18 “Ka! Yeigu lalilagi wala mina Isireli eililivalasi deli si valam kawasi,
‘Mwa Guyau! Yakamaisi makawala natana bulukilova,
mitaga yoku bogwa kuvigakaimasi lakatowosisi.
Kukwaimilivauwaimasi baisa yoku.
Yakamaisi bogwa lakakatubaiasasi bakakaimilavausi
bakawokaiamsi yoku Guyau ma Yaubadasi!
19 Yakamaisi bogwa katotubulokaimsi,
mitaga oluvi nanakwa goli magimasi bakakaimilavausi baisa yoku.
Yoku bogwa kumipukwaimasi,
e mapaila kasilamwagudusi deli ma valamsi,
e yakamaisi kammosilasi e deli tomota iyomsilaimasi,
paila uula kamitugagasi igau oma tutasi tubovau.’
 
20 “Mina Isireli, yokomi goli ulo kaipusipwesi.
Yokomi saina ayebwailimi.
Paila avai tuta bakavitagi igami,
e yeigu baluluwaimi deli ulo yebwaili.
Ka, nanogu komwaidona yokomi wala.
Mapaila yeigu bogwa banokapisaimi.
21 Kusailisi kabutuvatusi, deli kulavaisi tulela keda,
deli kunevivauwaisi keda makadana bogwa lokuulilavaisi.
Mina Isireli, kwaimilavausi kumaisi.
Kumaisi omi valu makwaisina bogwa lokusilavaisi.
22 Yokomi tokowolova, ammakawala kala kaduwonaku yokomi bwaina wala biuwoyaimi wala?
Ka, yeigu bogwa lavagi kwaitala vavagi kwaivau deli kwemitawasi,
kala tuwoli makawala natana vivila bivamitali kasa otutala kabilia.”
Igau tuta oluvi Guyau la tomota biyubwailasi
23 E Guyau Topeuligaga, matauna mina Isireli si Yaubada, eilivala kawala, “Avai tuta bakaimali tomota osi valu, matausina bivigivauwaisi kasi livala makwaina olopola Yuda deli komwaidona viluwela kawasi,
‘Ibodi Guyau bimitukwaii Yerusalem la koya kwebumaboma,[d]
makwaina la kabosisu kwebumaboma.’
24 E tomota bisipatilasi mapilana Yuda deli goli oviluwela, e tobigubagula bibigubagulasi, deli toyamata sipi bilosi iiyamatasi si yawa. 25 E yeigu bakatupewoli matausina tosomata e bavakoma matausina eiyomami molu. 26 E igagabila ulo tomota bilivalasi kawasi, ‘Owei! Lammasisi wala e lamamata e wowogu salauwokuva wala.’

27 “Ka, yeigu Guyau lalivala igau makateki yeigu bavigaki mapilasina Isireli deli Yuda bikasewoki tomota deli mauna. 28 E makawala goli ulo biga katotila laiyamata paila lasabu, lavakubali, laluvaim, lakodidaimi e deli layogagi, e makawala goli ulo biga katotila baiyamata kidamwa bakaliai deli bavaula. 29 E avai tuta yam makwaina bikaloubusi, tomota gala tuvaila bilivalasi kawasi,

‘Tommoya ikomasi pipi kwepupwayuyu,
mitaga litusia ilumkolaisi kala pwayuyu.’ [e]
30 Mitaga kaimapula, availa availa bikomasi pipi kwepupwayuyu, e matauna goli titoulela bivigaki kudula bipwayuyu. Deli, taitala taitala bikaliga paila uula la mitugaga wala titoulela.”

31 E Guyau ilivala kawala, “Tuta makwaina igau bima e bakabutuvau deli mina Isireli e deli mina Yuda. [f][g] 32 Gala makawala lakabutubogwa deli tubusia, tuta makwaina ayosi yumasi avakadi matausina lasunupuloi metoya ovalu Itipita. Matausina gala iyamataisi kabutu makwaina, ilagoli yeigu avigakaigu makawala si mwala. 33 E baisa makawala bakabutuvau deli mina Isireli. Ulo karaiwaga basaili oninasi e bagini olumoulesi. E yeigu goli si Yaubada e matausina ulo tomota. [h] 34 E gala wala bibodi taitala bivituloki sola kidamwa binikoli Guyau. Paila komwaidosi wala bogwa binikolaigusi, matausina gweguya deli goli matausina tokai. Yeigu baligaiwa si mitugaga deli gala tuvaila baluluwai si sula. Yeigu goli Guyau bogwa lalivala.” [i]

 
35 Guyau isaili kalasia paila kala kaitapa yam
e tubukona deli utuyam bikatasi wa bogi.
Matauna bibasi la kaitalia e bivigaki bolita bikaipolu.
Ka, matauna yagala Guyau Topeuligaga.
36 E matauna eikatotila mwada makawala goli kala kaduwonaku vavagi makwaisina bisisuaisi ovalu watanawa,
e makawala goli Isireli bisisu boda kwaitala.
37 E kidamwa avai yam availa bibodi bivisaikoli labuma,
deli bisuvalaisi tumilela valu watanawa,[j]
e matutona goli Guyau bipaiki mina Isireli
paila komwaidona avaka avaka leiuvagaisi.
Ka, Guyau bogwa eilivala.
 
38 E Guyau eilivala kawala, “Ka, kala tuta igau bima e tomota bikaliivauwaisi Yerusalem makwaina ulo valu, bivitouulasi Ananeli Buliyamata[k] opilikwaibwaga e bila oWokulu Kalapisilela. 39 E kaligei bisaitaula wala opilikwaibwaga bila mapilana Gareba koyala e bitavina bila mapilana Gowa. 40 E komwaidona makwaina itayatila, ambaisa lokuvigakaisi kasi laka tokwaliga deli lokuluvakaisi tubwaga, e deli komwaidona baleku mapilana Waya Kidironi e bisaitaula wala bila oKalapisila Wosa opilibomatu, mapilana bavigaki pilibumaboma. E valu makwaina gala avai tuta tuvaila bikatupilakwaisi kaina bikatudidaimisi.”

<- YEREMAIA 30YEREMAIA 32 ->