1 Yeigu balilivala wala paila bakapewoli uwosi mina Yerusalem.

Yeigu gala wala bakapatu, tatoula wala matausina bisibwabwailasi,

e si tomgwaga bivisigili makawala kaitala kaitapa biuvisigili wa bogi.

2 Mina Yerusalem, boda kwaitala kwaitala igau bigisaimi bukutomgwagasi.

Deli komwaidona si gweguya bigisaisi kami guyugwayu.

Bidouwaimi metoya yagami igavau,

maigana Guyau titoulela bivabu baisa yokomi.

3 Bivigakaimi makawala Guyau kala kulupaipi makwaina kwematabwailigaga.

4 Tomota gala tuvaila bidokaimi “Gumalawa”,

kaina mi valu bidokaisi yagala “M mwala eipakaim”.

Mitaga yagami igavau bidokaimi “Yaubada nanola imwamwasila paila minana”,

deli mi valu bidokaisi yagala “Si veivai baisa kabomwasawa goli”.

Paila Guyau nanola imwamwasila paila yokomi,

e matauna biyamati mi valu makawala goli taitala tau biyamati la kwava.

5 E makawala taitala tau bivaisi sola natana vilakapugula,

makawala goli matauna eibubulaimi bogwa bitugwali titoulela baisa yokomi.

E makawala taitala tovaivau imwamwasila nanola paila la kwava,

makawala goli mi Yaubada bimwamwasila nanola paila yokomi.

6 Ka, mina Yerusalem! Omi valu kalila yeigu bogwa lasaili toyamata.iMabigana “toyamata” ikibuboti mabudona mina vitoubobuta ibodi bisetuwolaisi ninigada mwada Yaubada bivagi makawala la biga katotila.

E matausina gala avai tuta bikapatusi yam kaina bogi.

Matausina ibodi bikatululuwaiyaisi Guyau paila avaka la biga katotila,

mwada taga avai tuta bilumwelavi makwaisina.

7 Matausina gala wala bisimwaisi katululuwai baisa matauna,

tatoula wala matauna bikaliivau Yerusalem,

deli bivigaki mapilana valu biyakawolaisi komwaidosi mina watanawa.

8 Guyau bogwa eilivala biga katotila saina mwau,

e metoya ola peula matauna bivagi avaka eilivala, kawala,

“Kami witi gala tuvaila tilaula bivigakaisi kʹasi,

deli mina gilagala gala tuvaila bimomwaisi kami waini.

9 Mitaga availa availa yokomi lokusapwaisi deli lokutaiyauwaisi kaula,

yokomi wala bukuvigakaisi kʹami e deli goli bukuyakawolaisi Guyau.

E yokomi availa availa kuiyamataisi e kukukwawaisi kaiuwala waini,

yokomi wala bukumomsi waini makwaina ulo Bwala Kwebumaboma omatala.”

10 Mina Yerusalem, kusunapulasi metoya omi valu,

e kuteyasi kadatala keda paila mi tomota matausina semia igau bikaimilavausi!

Kwatubiasaisi kadatala kaduwala, e dikunela kukwatudubunaisi!

E metoya baisa bukusailisi kwaitala kabutuvatusi, kidamwa boda ituwoli ituwoli bikatetasi

11 kidamwa Guyau eikikamituli baisa komwaidosi mina watanawa, kawala,

“Kulukwaisi mina Yerusalem

kidamwa Guyau bogwa bimaima paila bikatumovaimi,

e matauna bimai tomota matausina bogwa eikoli.”

12 E yokomi bidokaimi, “Yaubada la tomota mina bumaboma,”

deli, “Matausinaga Guyau bogwa eikatumovi.”

E Yerusalem yagala bidokaisi, “Makwaina kwembwailila Yaubada,”

deli, “Makwaina valu Yaubada gala wala ininilavi.”

<- AISEA 61AISEA 63 ->