IBERU 2

Katumova kwevakaigaga

1 E baisa uula ibodaidasi saina bitayosikikitaisi mabigasina biga kwekamokwita avaka bogwa talagaisi. Gala bibodi avai vavagi biwovilaidasi metoya baisa. 2 Mina watanawa eibanaisi kidamwa vavagi makwaisina avaka anelosi eikamitulaisi[a] baisa kamatula kwekamokwita, e kidamwa availa gala ibokuli kaina ikabikuwoli, bogwa eibani kala mapu mipuki. 3 E ammakawala bitavigaki paila bitasakaula kidamwa bitasilavi kwevakaigaga kada katumova? Guyau tatoula wala ikamitulibogwi katumova makwaina e matausina bogwa leilagaisi goli ikamokwitasi makwaina katumova baisa yakidasi. 4 Makawala goli Yaubada ikatumkulovi si silasola iyomitali la kamatula metoya ola kabutuvatusi deli kaboyowalula deli bidubadu vavagi siligaga. E tuvaila ipati peula makwaisina avaka Baloma Tobumaboma isisaiki tomota, e ipitapata goli makawala nanola.

Yesu bivakadi tomota bibanaisi katumova

5 Paila igau gala bibubuli valu watanawa Yaubada gala ivigaki anelosi kidamwa bikaraiwogaisi makwaina valu. Paila makwaiwena goli valu leitalilivalaisi. 6 Baisa makawala taitala ikikamituli Buki Pilabumaboma olopola kawala, [b]

“Mwa, Yaubada! Yoku kuninamsi mina watanawa e ammakawasi matausina?

Yoku goli kuyamati matausina, e ammakawasi mina watanawa?

7 Paila tuta pikekita[c] lokuvabu matausina kabasi osikowasi anelosi,

e bogwa kusaiki matausina kasi yakaula deli kasi taimamila bivigakaisi kasi kulupaipi.

8 E lokuvigaki matausina bikaraiwogaisi vavagi komwaidona.”

Buki Pilabumaboma kala ginigini kidamwa Yaubada leivigaki tomota “kidamwa bikaraiwogaisi vavagi komwaidona”. E metoya baisa bitanikoli kidamwa tomota bikaraiwagasi paila vavagi komwaidona ambaisa ambaisa. Mitaga gala goli tagisaisi tomota ikikaraiwogaisi vavagi komwaidona tuta baisa. 9 E mitaga baisa tuta gagabila bitagisaisi Yesu. Paila tuta pikekita Yaubada eivabu matauna osikowasi anelosi, kidamwa bikaliga paila tomota komwaidosi. Baisa iyomitali Yaubada la mitakwai. E mauula tuta baisa bitagisaisi matauna Yesu isikam kala kulupaipi baisa kala yakaula deli kala taimamila. 10 E Yaubada ibubuli deli iiyamati vavagi komwaidona. Mapaila ikwani wala Yaubada titoulela bikabwaili Yesu, paila ibodi mmayuyu e gala isim la sula. Mapaila Yaubada gagabila bimai bidubadu litula[d] kidamwa bipataisi Yesu kala kalugologusa. Paila Yesu goli bivakadi tomota bibanaisi katumova.

11 Paila matauna ikatumigileu tomota metoya osi mitugaga. E mapaila matauna Yesu deli matausina eikatumigileu komwaidosi goli Tamasi taitala wala. Baisa uula Yesu gala immosila paila ikabodala baisa matausina. 12 Makawala leilivala, kawala, [e]

“Mwa, Yaubada! Balivala paila yoku baisa budagwa.

Kam yakaula bawosi omitasi baisa mabudona.”

13 Tuvaila matauna eikaibiga, kawala, “Yeigu badubumi baisa Yaubada.” Deli goli matauna eikaibiga, kawala, “Ka, yeigu deli litugwa matausina Yaubada bogwa isakaigu.” [f]

14 E matausina availa availa leidoki litula tomota wala. Baisa uula Yesu titoulela imili tomota e ivigaki guma watanawa. E ivagi makawala kidamwa bikaliga, e metoya ola kaliga bikatudidaimi Diabolo. Paila matauna Diabolo ikikaraiwogi kaliga. 15 E mapaila Yesu bitaneku matausina availa isim kasi katupipi, paila matausina ikukolaisi kaliga tuta komwaidona goli. 16 Ka, baisa saina mimilakatila, gala eivagi baisa mwada bipilasi matausina anelosi. Mitaga makawala Buki Pilabumaboma[g] kala ginigini isisu, “Eipilasi matausina Eberaam tubula.” 17 Metoya baisa bitagisi kidamwa ibodi wala bimili tomota mokwita makawala budala.[h] Paila matauna Yesu si tolula toveka,[i] la bubunela saina madagi, deli goli la nokapisi. E makawala gagabila bivigibau la wotetila baisa Yaubada, kidamwa bogwa biligaiwa tomota si mitugaga. 18 E baisa tuta gagabila bipilasi matausina eibodasi kasi tamnabi, uula paila titoulela bogwa leilumkoli tamnabi deli mmayuyu.

<- IBERU 1 IBERU 3 ->