1 Olumoulela mabudona ekalesia mapilana Anitioki eisisuaisi taivilesi tovitoubobuta[a] deli tovituloki, Banaba, Simioni idokaisi Tobwabwau, Lusio tolela Sairini, Manaeni matauna kasitaiyu Erodi[b] eitubwasi, e deli Saulo. 2 Tuta matutowena iuwotetilasi paila Guyau deli si pusoposuma, Baloma Tobumaboma iluki matausina, kawala, “Kukwatupalaisi matausina paila yeigu, Banaba deli Saulo, paila ladou matausina mwada bivagaisi wotetila makwaina avaka lanagi paila matausina.”

3 Ipusoposumasi deli ininigadasi e ikiwotaisi matausina, e iwitalaisi ilosi.

4 Baloma Tobumaboma bogwa iwitali Banaba deli Saulo ilokaiasi[c] Selusia, e ikewasi metoyasi baisa ilosi wa simla Saipirosi.[d] 5 Tutala leiviloubusisi mapilana Salamisi e ikamitulaisi la biga Yaubada baisa mina Yudia osi bwala tapwaroru. Leivakoulisi matauna yagala Yoni Maka paila bipilasi wotetila makwaina.

6 Matausina ivapelasi ilokaiasi mapilana Peposi[e] ibodasi taitala tomigameguva yagala Ba-Yesu, e matauna guma Yudia, idoki titoulela taitala tovitoubobuta. 7 E matauna Ba-Yesu lubaila tokwaraiwogala simla[f] makwaina yagala Segiasi Paulosi, matauna saina toninitalapula. E tokwaraiwaga idou Banaba deli Saulo bimakaiasi, paila magila bilagi la biga Yaubada. 8 E matauna tomigameguva, igiyuwela obonasi mina Girisi Elimasi, isilibodi matausina. Ivigikoni bivisivili tokwaraiwaga mwada taga bidubumi. 9 E oluvi Saulo, matauna igiyuwela Paulo,[g] ivakasau Baloma Tobumaboma e itobu matala igigisi tomigameguva, 10 kawala, “Tabula mitugaga yoku! Yoku tuta tuta mwada bukuyogagi komwaidona vavagi bwaina. Yoku ivakasauwaim bidubadu katudewa gaga migawelu migawelu, tuvaila yoku tuta komwaidona kuvigikoni mwada bukukivili avaka Guyau la kamokwita, e bukuvigaki sopa! 11 Ka, Guyau yamala bikabikonaim baisa tuta; matam bikau, e gala bukugisi avaka paila kwaivila yam.”

E saina nanakwa Elimasi eilumkoli guugwau bwabwau eikuboli matala; e tuta matutowena wala ikabakakava mwada bibani taitala bivakadi. 12 E tutala eigisi avaka eiviloubusi, e tokwaraiwaga idubumi; itutu nanola paila vituloki makwaina paila Guyau.

13 Paulo deli sala ikewasi isilavaisi Peposi e imaisi Periga mapilana Pampilia; mitaga Yoni Maka iligaiwa matausina baisa e ikaimilavau Yerusalem. 14 Metoya Periga isaitaulasi imaisi Anitioki mapilana Pisidia; e wa yam sabate[h] isuvisi osi bwala tapwaroru mina Yudia isilaisi. 15 E igau ikikalawasi metoya Mosese la Karaiwaga deli si ginigini tovitoubobuta,[i] e tokwaraiwogala bwala tapwaroru iwitali biga baisa matausina, kawala, “Tuwagwa, magimasi yokomi bukulivalasi baisa tomota, kidamwa kuyosisi avaka ibodi bukukwatululutaisi matausina.” 16 E Paulo itokaia iyosali yamala iluki bikikwatusi e ikawota, kawala:

“Ka, budagwa mina Isireli, deli yokomi gala mina Isireli, availa availa kututapwarorusi baisa Yaubada:[j] kulagaigusi! 17 Matauna Yaubada, yakamaisi mina Isireli ma Yaubadasi goli, inagi tubumaiasi e ilupi matausina odubasi sesia tutala itogilagalasi mapilana Itipita. E Yaubada topeuligaga ivakadi matausina isilavaisi mapilana Itipita. [k] 18 Deli, kweluwovasi taitu ipeuloki[l] paila matausina tutala ititavinasi oviloupakala. [m] 19 E ikatudidaimi kabokwaraiwaga kwailima kwaiyu olopola Kenani, e la tomota ivigaki iyoulisi si valu. [n] 20 E vavagi makwaisina si kaloubusi iboda lakatuvasi kweluwolima taitu. [o]

“Bogwa leiwokuva, e isaiki matausina mimilisi tokwaraiwaga igau ola tuta tovitoubobuta Samwela. 21 E tuta matutowena inigadasi kidamwa Yaubada binagi si kini, e isaiki matausina Saulo, Kisa latula, metoya Beniamina odalela, bivigaki matauna si kini paila kweluwovasi taitu. [p] 22 Igau eilisi matauna Saulo, Yaubada ivigaki Debida si kini. E Yaubada ilivala paila Debida, kawala, ‘Bogwa lagisi Debida Yese latula matauna ibudoki nanogu; paila bogwa bivagi komwaidona avaka magigu bivagi.’ [q] 23 E Yaubada ivigaki Yesu kama tokwatumovasi yakamaisi mina Isireli makawala eikatotilabogwa, e matauna Yesu dalela Debida. 24 Igau Yesu gala bivitouula la paisewa, Yoni ikamituli baisa komwaidosi mina Isireli, kawala, ‘Ibodi bukuninavilasi paila mi mitugaga e bukubapitaisasi.’ [r] 25 E makateki bivigimkulovi la kamatula, Yoni iluki tomota, kawala, ‘Yokomi kudokaisi availa yeigu? Yeigu gala matauna lokututulaisi. Mitaga ka, matauwena iiyeikulaigu e yeigu gala bibodaigu bavilili kala buta.’[s][t]

26 “E budagwa, yakamaisi metoya odalela Eberaam deli availa availa yokomi gala mina Yudia kututapwarorusi baisa Yaubada, ka! Yaubada leiwitali bigala katumova baisa yakidasi.[u] 27 Paila matausina tolesi Yerusalem deli tuvaila si tokwaraiwaga gala inikolaisi kidamwa matauna Yesu Tokwatumova, e gala ikatetasi livalesi tovitoubobuta avaka sabate sabate ikikalawasi. Mitaga ikamogaisi Yesu e mapaila ivigakaisi tovitoubobuta si biga gala bisala. 28 Ilagoli gala gagabila bibanaisi uula paila bikatumataisi Yesu mesinaku wala inigadaisi Pailato bikamogi Yesu bikaliga. [v] 29 E tutala leivigimkulovaisi komwaidona avaka Buki Pilabumaboma eigini paila matauna, oluvi ivabwaisi metoya makaina korosi ibakwaisi matauna wa laka. [w] 30 Mitaga Yaubada eitokowoi matauna e imovavau. 31 E matausina leibokulaisi matauna tutala eisilavi Galili eila Yerusalem, matausina goli igisaisi matauna tomomova paila yam bidubadu. E tuta baisa matausina kala tosola baisa mina Isireli. [x] 32-33 E yakamaisi katotusi baisa mwada bakamiakaimi Bulogala Bwaina. Paila komwaidona avaka Yaubada ikatotilabogwa baisa tubudoiasi bogwa leivigimkulovi baisa yakidasi tubusia.[y] Baisa makawala, itokowoi Yesu imovavau. E Sam piliyuwela kala ginigini makawala. [z]