1 Guyoula Taia yagala Iram iwitali kwaitala boda baisa Debida paila bigigimwalasi youdila e deli bikatumapusi guguwa. Isaiki Debida makaisina kai kweisila paila youdila, e deli goli matausina tokabitam kaliai metoya dakuna deli metoya kai, kidamwa bikaliaiisi kwaitala ligisa. 2 E mapaila Debida itapuloki nanola paila Guyau bogwa eisaili matauna kidamwa biguyoi Isireli, e eivigaki la kabokaraiwaga biyouloveka, paila wala kasi bwaina la tomota.
3 E bogwa eisisu Yerusalem, matauna Debida ikatumkulovi la kukova e tuvaila iuni litula guduwovau tauwau deli vivila. 4 Litula eikaloubusisi mapilana Yerusalem yagasi Sammwa, Sobabi, Netani, Solomoni, 5 Iba, Elisuwa, Epeleti, 6 Noga, Nepegi, Yapia, 7 Elisama, Beeliada, Elipeleti.
8 Avai tuta mina Pilisitia inakaigalaisi Debida bogwa leivigakaisi eiguyoi viloumwaidona Isireli, e si tokabilia mina Pilisitia ilosi mwada bikatupipaisi matauna. Mapaila Debida ila bibodi matausina. 9 Mina Pilisitia iviloubusisi Itayatilela Repaim e ivitouulasi ikwayaisi valu. 10 Debida inigada baisa Yaubada kawala, “Ibodi bakabilii mina Pilisitia ke? Ki bogwa bukuvigakaigu batomgwaga?”
11 Mapaila Debida isugigai matausina mapilana Beali Perasim e ikalisau matausina. Matauna ikaibiga kawala, “Yaubada bogwa eivigakaigu basugigai tilaula si tokabilia makawala dadoya bititayelu.” Mapaila valu makatupona idokaisi Beali Perasim.eMaigana obonasi mina Iberu “Guyoula sugigai”. 12 Avai tuta mina Pilisitia leisakaulasi, matausina iligaiwaisi minasina si yaubada tokolu, e Debida ikaraiwaga bigabwaisi minasina.
13 Avai tuta mina Pilisitia ikaimilavausi oitayatila ivitouulasi ikwayaisi valu tuvaila. 14 E Debida tuvaila ikatupoi Yaubada, e ivitakauloki kawala, “Gala bukusugigai matausina metoya mapilana, mitaga kutavina kula kukwatubaiasa katitaikinela mapoulona kai paninita. 15 E avai tuta bukulagi luluwasi tokwabilia odogina kai makaisina, e kusugigai, paila yeigu bogwa balobogwa omatam paila batomgaga odubasi mina Pilisitia tokabilia.” 16 E Debida ivagi avaka Yaubada leikaraiwogi, mapaila matauna ibokavili mina Pilisitia metoya Gibioni iiyosi goli ilau Gesera. 17 E Debida bulogala ikaligiaki ambaisa ambaisa e Guyau ivigaki boda komwaidona ikukolaisi matauna.
<- 1 LILIU 131 LILIU 15 ->- a Maigana obonasi mina Iberu “Guyoula sugigai”.