1 Eia mulinai aneru ta magena tiavu kamu kupana emarigoto agitaato. Ia ralemana maekana na tanopara ewae-gavuato. 2 Ne maki ati ekogo-gagavuto, netiwato,
“Peketo! Vanuga kamuna Babulonia peketo!
Ia temoni geria talu kapunai peago,
e palagu rakavara e palagu mamilora,
e manu rakava kwaikwaira geria talutago kapunai peago.
3 Kwalana pete maparara na gena wain geniuato aonai gekala-kawakawato;
vowain ia gena mata-poraga inagulura.
Tanoparai getaluna kingra maparara ia ria gemata-poragato,
e tanoparai gau gevoivoi-agina talimara maki
ia gena rinaga namara na geverinagato.”
4 Voia mulinai kupa na karo ta evogomaito maakamonagiato, netiwato,
“Geku talima maparami,
evanuga kamuna aonana iomai-lakati.
Pe ia gena kala rakava kalara ragai pio kalara,
ia na vitiviti gaura rakavara pene gapira gaura
gomi na ragai pio gapira.
5 Kwalana ia gena kala rakava ataiatai peve tenutenukau, peve rage neamo, kupa vanugana maki peve rawalia.
Na Palagu na gena kala, ati rorirori gaura,
etugamagi-tagorana, ati etugamagi-lekwalekwarana.
6 Ia na gomi evenimito gelegelena mapio veni vega-voia.
Gena kala voina gelegelena pio vega-rualaa, ne pio venia.
ia gena kaputi taunataunai niuniu wainna gauna aonai
kwauta mapio wagi-rigoa, pio vega-rualaa, ne voina pio venia.
7 Matotauna evevega-rageto e egani-namawai
e etalu-namawai gelegelenai,
vitiviti pio venia e pio kala-tagitagia.
Ia aonai eveagina, ekilana,
‘Au logea vetaina amagulina.
Au ati wapu e ati vagi pana tagi-wanonowanono.’
8 Vovetaina gaurai ia toma kwapunamo aonai vitiviti irauirau na pene vega-ketoa,
voo kwarega, tagi-wanonowanono, e roge ia genai pene kwara.
E ia kalovana pene galaa.
Kwalana ira geria rakava voina pene venia Palaguna
ia Palagu Velekou, ia matiavuna.”
9 Tanopara kingra, ia ria gemata-poragato e ia ria gegani-namawai e getalu-namanamawai kingra, na ia pene galaa kovuna pia gitaa aonai, galamanai pia tagi, e pia tagi-wanonowanono. 10 Ia gena vitiviti pia gitaa, voia kalina na pakai pia ruga, ne pia tagi-kilakila, nepiatiwa,
“Vetugamu! Siti kamuna vetugamu keikei!
Babulonia o, tiavu rakava sitina!
Goi ora kwapunamo aonai gemu rakava voina metauna pogapia!”
11 Tanoparai gau gevoi-agirana talimara pia tagi e pia tagi-wanonowanono, kwalana geria voivoi rinagara ati tau voira talimana ta. 12 Vogeria kolo, e siliva, e vatu nama iwavagira voi kamu vatura, e kurukuru ralemara iwavagi gaura; rapuga gaokara namara, e rapuga kiatana kalovakalova pa pepolora, e rapuga tilikara, e rapuga kalovakalovara; maponara gaura, e elepanti rogara na gekalarana gaura irauiraura, e gau voira kamu mararana gekalarato, e auri polapolara e auri namara e maapolona gekalarato gaura; 13 ganigani mamira vega-namara mulamulana arana sinamon, e maponara mulamulara, e kovu maponana ekalaana mulamulana, e ponana namana mulamulana arana muro, e tauniparai geiruana mulamulana arana frenkinsens, vine nanuna, olive rigana, paraoa e vuiti, polomakau e mamoe, osi e kariota, e taunilimalima maki. 14 Pia kila, “Gautupu vuana pono gapia notiiwai ririwaragena okalaawai gauna gemuna pegerevagi. Gemu rinaga vogo e gemu ralema maparara pege lekwalekwa, ati pono rawali-waira!”
15 Gau gevoivoi-agina talimara na egau gevoi-agirato e ia genana rinaga vogo gerawalito, gaura rauvagi ai pia veruga, vovitiviti irana nege rawaliana kalinana. Ira pia tagi-rakavarakava e pia tagi-wanono, 16 e pia tagi-kilakila, nepiatiwa,
“Vetugamu! Vanuga kamuna, vetugamu kekei!
Rapuga gaokara namara, e rapuga kiatana kalovakalova pa pepolora,
e kalovakalovara na overapugato;
kolo vekemelerana, e vatu nama iwavagira,
e kurukuru ralemara galagala vagi okalawai.
17 Ora kwapunamo aonai gemu rinaga vogo galagala vagi
maparara pege maiaiki-verovero-vagi!”
Poti kamura geravu-agirana talimara maparara, e poti ai rawaparana geagona talimara maparara, e poti ai geinaguluna talimara, e rawapara maganira e magau reketa geriana geve rinagana talimara maparara rauvagi ai geverugato. 18 Ne egalaato kovuna gegitaato aonai, evetaina gekilato, ‘Evanuga kamuna irau vagi vegata, siti ta evetaina ati emiawai.’ 19 Ne kwano kavura reparai gelakukauto, getagito e getagi-wanonowanonoto, gekilato,
“Vetugamu kekei! Vanuga kamuna, vetugamu kekei!
Geria poti rawaparai talimara ia na rinagana
geverinaga-vogovagito talimara, arigia?
Ora kwapuna aonai ia verovero vagi ai pemia.
20 Kupa vanugana o, ia gena keto vererena iokalaa.
Palagu gena talima veagami,
e apostolo talimami e peroveta talimami ioverere;
kwalana gomi kala rakavara ekala-venimito pakunai,
Palagu na gena rakava voina pevenia.”
21 Ne aneru tiliga iwana taa na vatu ta vuiti gekao-agiana rivuna kamuna ta vetaina egapiato. Vovatu rivuna gauna egapi-itiato, ne rawaparai epia-raiato, ne ekilato,
“Vanuga kamuna Babulonia evetaina maligoligona pia pia-talia,
ne pene lekwalekwa-vagi, ati gitagitanai pene ago.
22 Hap gelavuana e mari gegapina kulura, e turai gevilina
e kipi gevilina kulura goi gemu nenai ati mapia kamonagi-waira.
Inagulu namara ripara talimara goi aomu ai ati mapia taluwai.
Vuiti gekao-agirana vatura kulura maki nenai ati mapia kamonagi-waira.
23 Nenai lamepa maekara ati mapia waewai.
Vegarawa valigu maruna e garena karora ta maki
nenai ati mapia kamonagi-waira.
Goi na gau gevoi-agirana talimara e tanopara aonai ira talima kamura.
Goi gemu megamega kalarana tanopara irauirau maparara ovailearato.
24 Peroveta talimara e Palagu gena taunilimalima veagara gevagirato ralara,
e tanopara atanai gevagirato taunilimalimara ralara maparara maki
