Hokatea
Solo Puwano Matanema:na:wa Wekeye
Yesu hepene falemi hapa fo:suwemi yapene talo tekapeipe epela: piipe (65) sopoke itapa tepela:, Yone Yesuyewi walosene sena amoke puka we momateyakeye. Yoneyewi puka we momateya ikila emiwa, Patamose hano olo:luwemi tipolo selapola: enekeye. Puka weyamo mouwa Koteyewi hepene senayewi Yonema waiyakeye.
Puka we Yoneyewi momateya ikila emiwa, Lome kamani senayewi Kelesowemi kulu hapa sena kesalewa ikomonakeye. Alake niwa ikila weyemi epesita:yemi ikomoma:na: ikila amowa seta: hetetimakeye. Sikape ikomoma:na: ikila amowa hetetiyapita: potapola:, niyewi puka weyamo mouwa seli matanema:na:keye.
Sikape ikila koloteawemi Seteneyewi timiyamoke eye helete tima:na:pela: timinise elakeye. Alawamona sikape Koteyewi Setenewana, Seteneyewi e tima:na: tisene senawana, ikomonose falasipesakeye.
Puka momateya weyamowa solo se tiye kinaka pale selapita: momateyakeye. Alake niyewi mou sopoke seli mamatanepesakeye. Sikape ikomoma:na: ikila emiwa niyewi matanema:na:keye.
Yelusaleme siti hili tiwa Yoneyewi papowa peleya: weyemi maelakeye. Sikape peleya: we itapa tema:na: ikila emiwa, Kotewemi kulu hanosene sena kesalewa sopoke Yelusaleme siti hiwemi kao sitalaposakeye.
Sikape Koteyewi Setene amowana, Setene kulu hapa papolo senawana falasima:na:wa tuwataposakeye. Seteneyewi Kotewa masitipesakeye.
Koteyewi heletesaleko, Kote kulu hanosene sena amowa Ewalapulu kokolo kao seli sitalaposakeye.
Solo Mupapo Waiya Pukawemi Solo Mou Takalese Momateyawa Wekeye
1:1-8 Puka we ma:ta: tiye momateyakeye.
1:9-20 Yoneyewi Piseiki Yesu Kelesowa papokeye.
2:1-3:22 Kulukulu koane tomoipewemi sawi momatepa:, au seyakeye.
4:1-11 Hepene falemi piseiki sea helapita: Yoneyewi papokeye.
5:1-8:1 Sawi kopola Piseikiyewi tiyapola: akelese, peleya: weyemi ikomoma:na: noka hetetima:na: akeyakeye.
8:2-11:19 Hepene sena tomoipeyewi wa:polo tomoipewa semetei semetei esa: sanakeye.
12:1-18 Kesalewala talakone Yoneyewi papokeye.
13:1-18 Mowa kopolo epapula puwano minawana, Mowa kopolo epapula sikape minawana Yoneyewi papokeye.
14:1-20 Yoneyewi nano ketea nokala papokeye.
15:1-16:21 Hepene sena tomoipeyewi tisi tomoipewa Kote konomona suyetiyapita: Yoneyewi papokeye.
17:1-19:5 Papilone sitiwa Koteyewi falasise heneye keneyetikeye.
19:6-20:10 Mowa kopolo amunawana, mokopo sepatosene senawana, Setenewana Koteyewi kotose falasipesakeye.
20:11-15 Kotoma:na: ikila amowa Yoneyewi papokeye.
21:1-22:5 Hepene hiwala, peleya: hiwala, Yelusaleme siti hiwala, Yoneyewi papokeye.
22:6-17 Yesu mina:na:wa mapateyakeye, au seyakeye.
22:17-21 Solo we kiyawa senisima:pekitise pota:pa:, au seyakeye.

Yesuyewi Ene Tima:na: Tisene Sena Yonema Solo Mupapowa Waiyakeye

1 Koteyewi sikape nano ketea auma:na:wa mupapokeye. Solo mupapowa Yesu Kelesoma mikeye. Pa tela ikila emiwa nano ketea auma:na:wa, Yesuyewi Ene tima:na: tisene senama walomita:, Koteyewi Yesuma mikeye. Walopita: Yesuyewi Ene tima:na: tisene sena Yonema solo mupapowa waloma:na:pela: hepene sena hamona seyakeye. 2 Alake, ewa Yoneyewi nano ketea papowala, nano ketea topuwala, Kote sowala Yesu Keleso sowala sopoke puka weyemi eyewi momatekeye.

3 Koteyewi nano ketea auma:na: seyawa puka weyemi momateyawa Keleso sena kesaleyewi ta:pita: sena nowamoke penanose muta akelese Koteyewi ewa napola:takeye. Aputa: puka weyemi momateyawa Eyewi akepita: topulu sena kesale apula: ta: tisene sena kesale amowa Koteyewi iwa napola:takeye. Koiyawemiye, Koteyewi nano ketea auma:na: seyawa waiyawa hetetima:na: ikilawa mapatotakeye.

Kulukulu Koane Tomoipewemi Kelesowemi Kulu Hapa Sena Kesale Sita:nema Yoneyewi Sawi Momate Tiye Ilikepiyawa Wekeye

4 Esia peleya: emi Yesu Kelesowemi kulu hapa sena kesale kulukulu koane tomoipewemi sita:ne, kima Yone neyewi sawi we momate tiye ilikepilakeye. Kote yemiwa elakeye. Ewa puwano kao enewala, sikapewala Kote kao elaposakeye. Kote amowa E mokopo seselesewana, E halute hopola enewana, kima mita: neyewi matanekeye. Kote Piseiki sea minitapowemi* Ho Napoyewi enene ho tomoipe amuna sita:neyawa kiwa napola:pita: neyewi matanekeye. 5 Yesu Kelesoyawala kiwa napola:pita: neyewi matanekeye. Sena kesaleyawa Kotewa matanemita: Eyewi hene solo amowa se tiye mikeye. Sena puwano kulu mene tesi tiye teisa:pe puwanowa Yesu Keleso Ene ekeye. Peleya: we sosowemi piseiki sopoke Yesuyewi semetei Piseikipela: pota: elakeye. Yesu Kelesoyewi niwa himu hapa matanese niwamopela: kakasilise kulukeye. Nini mane olokeyatela amoke niwa potapola: sita:newamona Yesu pepeta hapa amoke niwa silikepilakeye.

6 Apula: pilisiti senayewi timiya epapuluse, E Ata Kotepela: niyawana aluse timita: ta:peyakeye. Ta:peyanase niwa E sena mayakeye. Aluse Eye ene Piseikipela: pote elakeye. Ikila sopoke Yesuyewi E ho:liyawala E penaiyawana kokolo kao elaposakeye. Ikila sopoke Yesuyewi Piseikipela: pote elaposakeye. Alake Yesu unuwa tili tiyapola: wapilise sita:latipa:. Henekeye.

7 Mapopa:. Yesu akopa: honosanewemi inapitekiwa†

sena sopoke Ewa potaposakeye.‡

E fapo hema ola sena amokiyawala Ewa potaposakeye.

Yesu inapita:, sena kesale peleya: sopowemi sita:neyawa potose

sosolo matanese ya:pelepesakeye.§ Sikapewemiwa aupesakeye.

Henekeye.

8 Aputa: Piseiki Koteyewi selese, “Puwanowa Nekeye. Apula:, sikapewala Nekeye. Newa puwano enewa yemiwana elakeye. Sikapewala mina:na:keye.” Heneye penaiya Kote amowa Nekeye.

Yoneyewi Yesu Keleso Papowa Wekeye

9 Newa Yonekeye. Newana kiwala Kelesowemi palanase ninipe ma:ekeye. Niwa sopoke Yesuyewi Piseikipela: pote elakeye. Niwa Yesu Kelesowemi palanase, kiwala newana niwa sopoke kamunuse sena nokamoke ikomonanakeye. Ikomopita: niwa Kelesowemi palawa iya:pa:pekitise Yesuye penana:tese niwama sutesimita: nima kinakeye. Apula: sena kesaleyewi Yesuwa matanemita: Kote solo amowa neyewi se tiye kinapola:, apula: neyewi Yesu potapola: Ewemi himu semetei esa: matanepela: ela: se tiye kinapita:, Patamose hano olo:luwemi newa tipolo selawapo amuna sena nokamokeyewi nema hamona seyakeye.

10 Tomo ikila nowemi Ho Napowa Newemi sosolo tese Kote wapilise ela:, wa:polo sanapita: ta:tesene epapuluse, ne fo:su tapowemi unuwapo hopota: neyewi topukeye. 11 Neyewi ta:takamake eye nema selese, “Kema neyewi nano ketea waloma:na:keye. Walopita: keyawa potapola: pukawemi momatepa:. Yesu Kelesowemi kulu hapa sena kesale kulukulu koane sita:nema, taune tomoipewemi sawi momate tiye ilikepila:pa:. Taune tomoipewa wekeye. Nowa Efesese taune, apula: nowa Semena taune, apula: nowa Pekamame taune, apula: nowa Taiataila taune, apula: nowa Satisi taune, apula: nowa Filatefia taune, apula: nowa Leotisia taune epakeye. Kulukulu koane ama momatepa:.”

12 Au seya senayewi selapita:, sowa ta:tapola:, neyewi potapose mene notoyakeye. Mene notolose potakamake, koloyewi timiya napa tomoipewa tesela 13 honosane neyewi potakamake Sena Sa: amuna elapita: neyewi papokeye. E tapola senatolo onatu kole sine naiya kapela:, kopolo toma tekapo koloyewi timiya amowa e honowemi kapela:, 14 e pisei apula: e pisei fawala heneye koiya neyewi papokeye. Koiyalo hene heneye koiya haiya fano koiya epapulakeye. Apula: e siwa tei wa:la ho:lulusene epapuluse ho:liya elakeye.

15 E onatuwa aiyane ki teiyewi sapolo nano ketea funu itapalapita:, ho papaya epapula elapita: papokeye. E sowa ta:takamake, hano sakulu sosolo feya sosolo ta:tesene epapuluse neyewi topukeye. 16 E tiya:wemi potakamake tiya: iliyewi meiyetolu tomoipewa tiyapola: elapita: neyewi papokeye. Ene meakemi potakamake sapa semetei senato mina elipe meapo emi mowa inapita: neyewi papokeye. E mitiwa opo sosolo ho:lulusene epapuluse ho:lilakeye.

17 Alake Ewa potapola:, E onatuwemi newa sutesinise kuluse kulu amuna telakeye. Alawamona, sutesine ka:pelalapita: ne tomawemi E tiya: iliyewi kesalese Eyewi selese, “Kewa ipipa. Puwanowa Nekeye. Sikapewala Nekeye. 18 Kokolo kao tesewana Nekeye. Newa kuluwamona mene tesinase kokolo kao elaposakeye. Sena kulusene isu sosowala, Hetisi peleya:wala isu tenamo kiwa neyewi tiyapola: elakeye. 19 Yemiwa nano ketea potosewana, sikape nano ketea auma:na:wana, nano ketea sopoke keye papowa momatepa:.

20 Solo mupapo mowa wekeye. Koloyewi timiya napa tomoipewa mouwa wekeye. Kulukulu koane tomoipewemi Newemi kulu hapa sena kesale epesita:ya akeye. Apula: ne tiya: iliyewi meiyetolu tomoipewa tiyapola: enene mouwa wekeye. Meiyetolu tomoipewa hepene sena tomoipewa akeye. Hepene senayewi kulukulu koane tomoipewemi Newemi kulu hapa sena kesale amowa potapola: sitalakeye.” Aluse Eyewi nema selesapekeye.

Hokatea 2 ->