Hipulu 8

Koteyewi Niwa Yesuwalapulu Hili Sepapowa Puwanokeye

1 Solo kina mouwa wekeye. Pilisiti sena puwano wa:pa:se heneye napowa Yesukeye. Ikila sopoke Ewa pilisiti sena puwano apola: ela: niwamopela: kulukuluse timinise elakeye. Hepene falemi Piseiki Kote Sosolo E tiya:le ili tapowemi Piseiki Kini Sosolo sea sosolo emi, Yesuwa nini pilisiti sena puwanowa helakeye. 2 Eye pilisiti sena tima:na:wa Kote ene hepene koane falemi tikeye. Koane amowa heneye Kote ene koakeye. Koane amowa senaye eta: timakeye. Eh. Alamakeye. Kote Ene timiyakeye.

3 Aputa: peleya: weyemi pilisiti sena puwanoyewi sopoke a:pele sanose satapola: Kotema kinapola:, nano nowana mokopo kinapola: epapuluse timinisekeye. Alanase, hepene peleya: falemi, nini pilisiti sena puwano Yesu ela:, Ewala Kotema nano mokopo mikeye. *Sena mane olokeyatelawa itapa temita: Yesusyewi E tomawa Kotema mokopo mikeye. 4 Alake, Ewa peleya: weyemi telakiwa, pilisiti tima:na:wa eyawa matimapekeye. Koiyawemiye, pilisiti sena iwa sitalakemi ela: apula: iyawa mokopo miwa kalikalise Kotema kinisekeye. Amowa eleye seyakeye. 5 Peleya: weyemi ili pilisiti senapela: timinise, hepene falemi nano alusewa iyewi ta:pele tiyapola: timiyanakeye. Alusene epapuluse, Moseseyewi fala: koane Kotema wapilise koawa, tima:na:pela: Koteyewi ema selese, “Kewa tokomo Sainai tumu solo elewa tima:na:pela: hapa emiwa, fala: koane tima:na: Neyewi kema waiyakeye. Waiya epapuluse ta:pele tiyapola: tiya:pa:.” †Mene Sili Puka 25:40 Au selapita:, Koteyewi waiya epapuluse Moseseyewi ta:pele tiyapola: tikeye.

Hili Sepapowa Kelesoyewi Potapola: Elakeye

6 Alawamona Yesuyewi Ene pilisiti senapela: timinise, peleya: weyemi pilisiti senayewi timinisewa, Yesuyewi sitiyetiye timiyanakeye. Koteyewi Ene senama hili sepapowa senayewi ta: timita:, Yesu inapola: honosane sena ela: hili sepapowa penana:pekeye. Hili sepapowa penana:penase puwano sepapowa helete tiye hapakeye. Puwano Koteyewi napola: tese auma:na: seyawa koloteakeye. Alawamona, hili sepapowa Koteyewi napola: tese auma:na: seyawa hene heneye sosokeye.

7 Alanase puwano sepapo tili amowa ilima:na: telaleke, Koteyewi hili sepapowa matimapekeye. Eta: ilima tepita: solo hili se tiye mikeye. 8 Alawamona, puwano sepapowa tiwa hepe tepita: sena olokeyatelawa Koteyewi potapola: selese,

“Newa Piseikipela: enenase kiyawa ta:ta:pa:.

Sikape ikila nowemi Neyewi Isolaiya sena mayamawala,

Yuta sena mayamawala, hili sepapo tiyaposakeye.

9 Sepapolo tiwa hili pa:ta elaposakeye.

Apula: puwano ili tilila kouwa meima hoyewi selapita: tili epapuluse,

sikape epapu selapola: matiyaposakeye.

Puwano ilipe Isipi peleya: iya:pela: hamonite,

Neyewi iwa siliye hapa ikila emiwa Neyewi sepapowa se tiye mikeye.

Puwano sepapowa tiwa iyewi ta: tiyapola: eta: kulu hapama tese, Neyewi iwa fa:se mikeye.

10 Alanase, Neyewi puwano sepapowa tiwa iya:pela:,

Isolaiya sena kesalema hili selapita: tiwa wekeye.

Ne solo ele tuwapowa ili matanawemi tuwapa:na:keye.

Ili himuwemi momatema:na:keye.

Ili Kotewa Newa tema:na:keye.

Neyewi iwa potapola: elapita: iyewi Ne sowa matanepela: seli

sitalaposakeye. Aluse sitalapita:, Ne sena kesale amowa iwakeye.

11 Sena nowamoke e sena manawana apula: e ma:ewala walose selese,

‘Piseiki Kotewa matanepa:,’ auwa eta: sema:na:makeye.

Au sema:na: elawamona sena sopoke Newemi matanepesakeye.

Sena sosolo sita:neyawala sena kolotea sita:neyawala,

sena sopoke Newa matanepesakeye.

12 Alake ili olokeyatela timinipita: Neyewi potapola: iwa hauwekilise iya:taposakeye.

Iya:pela: ili olokeyatelawa Neyewi wa:ke mamatanepesakeye.” ‡

13 Hili sepapowa tinase Koteyewi selese, “Puwano sepapo tiwa pusomiyanakeye.” Aluse Koteyewi selakeye. Pusomiyawa sao pusomiya epapulakeye. Puwano sepapo tiwa ikila kolotea tepela: sikape itapa tema:na: epapuluse sopoke itapa tepesakeye.

<- Hipulu 7 Hipulu 9 ->