Hipulu
Solo Puwano Matanema:na:wa Wekeye
Hipulu puka we Yu sena Kelesowemi kulu hapa sena kesalema momate tiye selawapo puka akeye. Sena amowa sowa, Hipulu solo au selesekeye. Apula: ikila nokamoke Yu sena amowa Hipulu sena au selesekeye. Alake Hipulu puka we eta:wi momateyale. Momateya senawa unuwa puka weyamo eta: momateyamakeye.
Yesu hepene falemi hanapita: yapene talo usulupe epela: tomoipe (37) itapa tepela:, Lome ami senayewi kisi tetese Yelusaleme sitiwa hene heneye ikomonakeye. Kote koawana ikomonose, etewa koane tili ekela hapakeye. Ikila amowa seta: hetetima ela:, senayewi Hipulu puka we momate tiye selawapokeye.
Yu sena mutayewi ilipe mane olokeyatelawa itapa temita: nano hopola sano tiye satapola: Kotema kao kina:sela: sita:nekeye. Senayewi mane olokeyatelawamopela:, nano hopola Kotema sosowa na tiye iya:pita:, Yesu kuluwa iyewi eta: matanemakeye. Alanase sena amowa puka we momate tiye selawapokeye.
Hipulu Pukawemi Solo Mou Takalese Momateyawa Wekeye
1:1-2:18 Yesu Kote E Sa:le enewa, hene heneye Sosokeye. Yesuyewi hepene sena unuwa sitiyetiye E unuwa hene heneye Sosokeye.
3:1-4:13 Mosesewala Yesuyewi unu amowa helete tiye hapakeye.
4:14-7:28 Pilisiti senawana Yesuyewi helete tiye hapakeye.
8:1-9:28 Puwano Koteyewi Mosesema sepapowa napu yemi Koteyewi Yesuma selese tiwa amowa helete tiye hapakeye.
10:1-39 Yesu pepetayewi nano hopola pepetawa helete tiye hapakeye. Senala: olokeyatelawa Yesuyewi pepeta amoke hene heneye iya:pela:, mane olokeyatelayewi penaiyawana fala:tesekeye.
11:1-40 Sena kesaleyewi Kotewemi himu semetei esa: matanawa weyamu sita:nekeye, aluse momateyakeye.
12:1-29 Niyawana Kotewemi himu semetei esa: matanemita: nima walokeye.
13:1-19 Yesu Kelesowemi himu semetei esa: matanepela: Yesuyewi alusewa kulu hamonite selakeye.
13:20-25 Puka we momateya sena amokiwa epama selakeye.

Kote E Sa:wa Hene Heneye Yesu Kelesokeye

1 Puwano fa:nemi ikila nowemiwana, ikila nowemiwana, ikila sosowemi sepatosene senama Koteyewi se tiye kinise, kalikalila solo se tiye kine hapakeye. Se tiye kine minawa sepatosene senayewi ta:tapola:, nini tilila kouwa meima iyewi se tiye mikeye. 2 Alawamona, napu yemiwa itapa tema:na: mapatoya ikila emiwa nima semita: Koteyewi E Sa:ma se tiye kinapita:, E Sa:yawa peleya: weyemi inapola:, nima se tiye mikeye. Aluse E sa:le emi E Ata Koteyewi peleya: weyala mei falala nano ketea sopoke mou apola: hetetikeye. Apula: sikape nano ketea sopoke Koteyewi Ene enawa pota: epesita: Eyewi ta:peyawa E Sa:le akeye.

3 Koteyewi E ho:liyawa E Sa:ma minase Ewa Ene ho:liyawemi papaya enekeye. Koteyewi Ene alusewa E Sa:yawala semetei kamunuse timinise enekeye. Aluse peleya: weyala mei falala nano ketea sopoke timiyawa iliye tiye sita:pesita:, Kote E solo penaiyayewi amowa Yesuyewi nano ketea sopoke pota: elakeye. Sena kesale sopoke mane olokeyatelawa iya:pela: Kote sikapowemi hekeya sita:pesita: Ewa semetei kulukeye. Kuluwa tesi tiye tesilapola: hepene falemi hanapola: Ene putupela: enenase Ewa Piseiki Kote tiya:le ili tapowemi helakeye.

Kote E Sa:le Yesuyewi Hepene Senawa Helepewa Wekeye

4 Yesu Ewa Kote e Sa:nase E unuwa E Ata Koteyewi sosolo apoyakeye. Aputa: hepene senawa Koteyewi tima:na: tisene sena sita:nenase unuwa Koteyewi sosolo eta: apoyamakeye. Alake iwa Yesuyewi heletetiye hapakeye. 5 Helepe mouwa wekeye. Kote pukawemi momate tiye E Sa:wa piseiki e semita: ta:pele tiyapola: wapilise selese,

“Kewa Ni Sa:keye.

Napu weyemiwa kine ke Ata amowa Nekeye.” *

Aluse, seyawa Koteyewi hepene senawa eta:wi ema wapilise walo selesena? Eh. Hepene senama Koteyewi aluse eta: seyamakeye. Alanase Koteyewi wa:ke selese,

“E Atawa Neyewi tema:na:keye.

Ni Sa:wa Kewamo elaposakeye.” †

6 Aputa: Koteyewi E Sa:le semetei kamona peleya: weyemi hamona seyakeye. Hamone e seya ikila emiwa Koteyewi hepene senama selese,

“Hepene sena sopoke kiwala, Ni Sa:wa wapilipa:.” ‡

7 Apula: hepene senawa Koteyewi Ewamopela: tima:na: timita: selese,

“Iyewi Newamo selapose hanose alopo inisene epapuluse iwa inisekeye.

Iyewi Newamopela: timinise tei wa:la epapuluse aupesakeye.” §

8 Alawamona Koteyewi E Sa:le Yesuma selese,

“Koteo, * ikila sopoke Kewa kokolo Piseikipela: elaposakeye.

Keye senala: potapola: elakamowa Keyawa heneye hekeya pota: elakeye.

9 Mane napolo hekeya sopolo Keyewi epelese ela:, solo elewa hotoye tiwala hekeya solo tikape tesewala mane olokeyatela alusene sopoke Keyawa mapolosekeye.

Alanase, Kote, kine ke Ata Kote amoke Kewa piseikipela: epesita:

ta:pele tiyapola: hano wela Ke tomawemi suluse Kewa epeletakeye.

Hepene sena amowana, peleya: weyemi sena piseikipela: sita:newana,

Kote Eyawa Kiwa ili wa:pa:se falemi apolaposakeye.

Alanase, kiwa sosolo epeletakeye.” †

10 Apula: Kote E Sa:le Yesuwa nano nowana selese,

“Piseikio, Ma:ta: ti ikila emiwa Keyawa matanepela: seya emi peleya: we hetetikeye.

Mei falala Ke tiya:yewi timiyakeye.

11 Apula: sikape peleya: weyala mei falala nano ketea weyamo sopoke itapa tepesakeye. Alawamona nano ketea amowa sopoke itapa tepela: Kewa heneye kokolo kao elaposakeye.

Tapola pusomia epapuluse nano ketea weyamo sopoke epapuluse pusomunupesakeye.

12 Tapola kopolosene epapuluse peleya: weyala mei falala epapuluse kopopesakeye.

Tapola pusomiya iya:tesene epapuluse, peleya: weyala mei falala pusomiyawa epapuluse iya:taposakeye.

Alawamona yemiwa Kewa ela kemi sikapewala Kewa kokolo kao elaposakeye.

Ke opowa heneye maitapa tepesakeye.” Aluse Koteyewi Yesuwamo selese momateyalakeye. ‡

13 Aputa: Koteyewi nano nowa Yesuma selese,

“Kewa Ne tiya:le ili tapowemi helema.

Helapita:, Ke kisiwa Neyewi ke hanetapowemi apoma:na:keye.” §

Au seya aluse, Koteyewi hepene sena nowamawa asu seyala? Eh. Hepene sena nowama aluse eta: seyamakeye. 14 Apula: hepene sena iwa ipa:? Iwa hokeye. Iwa Kote tima:na: tisene senakeye. Apula: Kotewalapulu kokolo kao sita:pesa:na: sena kesale amowa sesemita: Koteyewi iwa hamonasekeye.

Hipulu 2 ->