2 Kolini

Solo Puwano Matanema:na:wa Wekeye

Yesu hepene fala hanapita: yapene talo elipeipela: pipe sopolo (25) itapa tepela:, Poleyewi Kelesowemi kulu hapa sena kesale Kolini taunewemi sita:nema sawi puwano momateyakeye. Iyewi mane olokeyatela timiyawa Poleyewi hekema:na:pela: matananase sawi amowa momateyakeye.

Kolotea tepela:, iwa ko:luse sitalapita:keye. Aluse Poleyewi matanese, Taitasema potapose hamona seyakeye. Taitase hanapola: Polewa Masetonia peleya: emi enewemi, Taitase mene minakeye. Taitase inise Polema selese, “Kolini senayewi ilipe mane olokeyatelawa hekeyakeye. Alawamona sena nokamoke Poleyewi solo amowa tikapeye tiye, mokopo walosene senayewi solo amowa ta:tapola: kulu hanose sitalakeye,” au seyakeye.

Aputa: Koteyewi Polewa walosene sena timita: ta:peyawa Poleyewi ene penaiya seyakeye. Kolini sena kesaleyewi Yesuwa matanemita: Poleyewi puwano apolose se tiye mikeye. “Mokopo walosene sena solo amowa kiyawa ta:tapa,” aluse Poleyewi seyakeye.

Aputa: Poleyewi solo nowana sawi we momateyakeye. Yutia peleya: emi Kelesowemi kulu hapa sena kesale nano ketea hepe tela sita:nema kiyawa moweni kekenepela: kina:pa:, aluse Poleyewi sawiwemi momateyakeye.

2 Kolini Suluwemi Mou Elakamo Momateya

1:1-11 Poleyewi Kolini sena kesalema sawi we ma:ta: tiye momate tiye Kotema napolo e seyakeye.

1:12-2:4 Poleyewi solo amowa hekeya sopolo selesekeye.

2:5-11 Olokeyatela timiya sena amowa kiyawa falasi elanase siliya:pa:.

2:12-17 Newa mina:na: seyawa nano hetetima:na: inapita: newa eta: minamakeye.

3:1-4:16 Koteyewi puwano sepapowa Koteyewi solo hili sepapolo tinase helete tiye hapakeye.

5:1-10 Niwa hepene falemi fiyanese toma hili napolo tiyaposakeye.

5:11-6:10 Poleyewi mane timinisewa sena kesaleyewi Kotewemi matanemita: se tiye kinisekeye.

6:11-7:4 Senayewi e salama selesene epapuluse Poleyewi ima epapuluse selesekeye.

7:5-16 Poleyewi Taitase potapola: epeyakeye.

8:1-9:15 Kotewa matanepela: sita:la: nano hepe tela sita:la sena amowa seselese moweni kina:pa:, au seyakeye.

10:1-13:10 Mokopo walosene senawa Poleyewi helete tiye hapakeye.

13:11-14 Poleyewi epama e seyakeye.

1 Koteyewi matanawamunuse newa Pole Yesu Kelesoyewi apasolo walosene sena epesita: ta:peyawa nekeye. Neyawana, nini Kelesowemi kulu hapa sena ne ma:e Timotiwala, na:tewi kiwa matanesekeye. Kiwa Yesu Kelesowemi kulu hapa sena kesale Kolini taunewemi sita:newana, Kote sena kesale Akaia peleya: emi sita:newana, kiwa sopoma neyewi sawi weyamowa momate tiye ilikepilakeye. 2 Nini Ata Kotewalapulu Piseiki Yesu Keleso a:tewi kima mokopo seselesewana, hopola sita:tesewana, kaluse mita: matanekeye.

3 Nini Piseiki Yesu Kelesoyewi E Atawa Kote Ene ekeye. Hauwekilise matanesene sopoke mouwala Kote Ene ekeye. Niwa sosolo himu nakolose hilila sitalaleke, niwa ekela temita: hauwekilise solo se tiye kinisene mouwala Kote nini Ata Ene ekeye. Alake, niyewi wapili sopowa Kotema kinisekeye. 4 Nano hilila kalikalila sopoke niwemi hetetiyapitewa nini himu sosolo tema:pekitise Koteyewi niwa hauwekilise seselese penana: ta:sela: elakeye. Alanase sena kesale nowemi nano hilila hetetisaleke, niyewi potapola: hauwekilise seselesaleke ililakeye. Alake Koteyewi niwa hauwekilise sesela epapuluse, sena nowana, niyewi epapuluse hauwekilise seselesekeye. 5 Yesu Keleso sosolo toma oiya himu nakola epapuluse, niwana sosolo toma oiya himu nakolose sita:tesekeye. Niyewi Yesuwa kulu hanosaleke senayewi niwa olokeyaleye tisekeye. Alanase Yesu Kelesoyewi niwa sosolo hauwekilise seselesekeye.

6 Alawamona senayewi niwa ikomonosaleke, olokeyale tisene hililawa niyewi tiyapola: sitalakeye. Kiwa seselese apula: Koteyewi kiwa mene silima:na: aumita: hililawa niyewi tiyapola: sitalakeye. Tiyapola: sitalapita: Koteyewi niwa seselesekeye. Seselesaleke kiyawa potapola: weyamu matanepa:. “Walosene senawa ikomonosaleke Koteyewi iwa seselesene epapuluse, senayewi niwana semetei kamunuse ikomonosaleke, Koteyewi niwana sesepesakeye.” Aluse matanepela: himu mapolosewa iya:pela: himu ekela matanepela: sita:latipa:. 7 Alake nini toma oiya himu nakolose sitalaleke, Yesu Kelesoyewi niwa hauwekilise seselesene epapuluse, kiwala toma oiya himu nakolose sitalaleke, Eyewi kiwala hauwekilise sesepesakeye. Alake kiwa Kotewemi himu semetei matanepela: penaiya sita:pesita: matanekeye. Matanesewa niyewi maiya:takeye.

8 Kelesowemi kulu hapa sena ne ma:ela:o, Esia peleya: emi sena nokamoke niwa sosolo ikomonawa kiwa tikili tese sita:pesa:pekitise, aluse, sawi we momatekeye. Aputa: ikomonawa nini penaiyawa eta: ilimakeye. Sosolo ikomonakeye. Sosolo ikomononase niye tiyakamakiwa kuma:na: telalakeye. 9 Niyewi ninipe matanese, “Ikila weyemi nini opo itapa tekeye,” aluse niyewi matanakeye. Aluse matanese olokeyale tisene hililawa ko:lupita: hetetila? “Niyewi nini penaiyawa eta: ilimanakeye. Koteyewi E penaiyawa semeteiyewi ililakeye. Koteyewi sena kuluwa mene tesa:tesenase E penaiya semeteiwa ilikeye.” Aumita: nano hilila sosolo hetetikeye. 10 Niwa ikomona kuma:na: telawamona Koteyewi niwa sosolo seselese mene silikeye. Mene silinase niyewi matanese, “Me wa:kewala Koteyewi niwa seselese mene siliyaposakeye,” aluse matanesekeye.

11 Aputa: kiyewi niwamopela: kakasilise Kotema kulukulusene amo Koteyewi niwa seselakeye. Koteyewi sesemita: matanese, kiyawala sena kesale muta kulukulupita:, Koteyewi ta:tapola: niwa napola:takeye. Napola:tapita: sena kesale mutayewi potapola: Kotema sosolo epeyakeye.

12 Niyewi solo we kima heneye selakeye. *Pole inaposapo au seyawa mainapita: Kolini senayewi Polewa kotose selese, “Mokopo selesene senawa kekeye.” Aputa: Pole meneye ti mouwa ima seyakeye. Niyewi nano ketea sopoke tima:na: timiyawa, ikila sopoke niwa seli enekeye. Alake mokopo senayewi matanesewa niyewi eta: kulu hapamakeye. Kote penaiyayewi niwa mokopo seselese, nano alusewa napowala hekeya tesewana, nima mikeye. Alake Kote minitapowemi niwa kiwalapulu heneye seli enekeye. Seli ela: nini himuyewi matanese, “Niwa iliye tiye elakeye.” 13-14 Sawi we kiyawa akelese matanemita: niyewi kima hokatolose momatekeye. Mupatese mamomatekeye. Yemiwa ne matanawa kiyewi kolotea matanepela:, sikape kiyewi seli sopoke matanemita: neyewi matanekeye. Neyewi matanese Piseiki Yesu mene ina ikila emiwa niyewi kima epelema:na: epapuluse kiyewi nima aluse epelemita: matanekeye.

15 Kiyewi nima epelese matanema:na:wa neyewi matanepela: selese, “Kiwa napola:tese ikila elipei kili taune newa mina:na:keye. 16 Aputa: Masetonia peleya: emi ha:na:na:pela: kili taunewemi newa inapola:, kolotea tepela: emiwa iya:pela:, Masetonia peleya: emi hanapola: kolotea tepela:, mene ina ikila emiwa, kili taune wa:ke inapola:, kolotea epesena:keye. Enewa Yutia peleya: ha:na:na:pela: kiyawa newa sesemita: ikila kolotea epesena:keye.” Aluse neyewi matanepela: seyakeye.

17 Aluse seyawa mainisaleke, kili nokamoke selese, “Polewa matana elipei matanesekeye,” au seyakeye. Alake kili matanawa, newa nine napola:pa:na: mina:na: elawamona? Kili matanawa, ewa mokopo senakeye. Neyewi mokopo selesekeye. Aluse matanana? Aputa: kili matanawa, ikila nowemi neyewi ilikeye esa:, ikila nowemi neyewi eta: auma:na:ma, aluse napole? Eh, neyawa eta: selesemakeye. 18 Koteyewi Ene nano ketea auma:na: seyawa heneye alusekeye. Alusene epapuluse neyawana heneye selesekeye. Neyewi heneye himu elipei matanepela: eta: ilimakeye. Niyewi “Ehe” epela: “Eh” eta: selesemakeye.

19 Newana, Sailasewala, Timotiwala, niyewi Kote Sa:le Yesu Kelesowa kima puwano se tiye mikeye. Apula: Yesuyawa sowa elipei eta: selesemakeye. Eyawa ilikeye esa:, Eh eta: selesemakeye. Yesuyewi auma:na: e seyawa “Ehe”, Eyewi timinisekeye. 20 Alake Koteyewi auma:na: e seyawa solo sepapo mouwa Yesu Ene ekeye. Ene enase niyawa Yesuwemi kulupela: apola: sita:la: Kotema wapilisene ikila emiwa henekeye, au selesekeye.

21 Niyawana, kiyawala, Kelesowemi himu semetei esa: matanepela: penanose sita:pesita:, Koteyewi nima penaiya sita: tesewa mikeye. Niyewi tisewana, Eyewi nima tima:na: tiya:pa:, aluse apoyakeye. 22 Niwa sopoke Enakeye, aluse niyewi matanemita: †Kopolo kena:ne nanesene epapuluseniwa Eyewi ene tiyapola: tuwatese, Ho Napowa nini himuwemi apoya epakeye. Koteyewi auma:na: seyawa niyewi henenapo aluse matanemita:, Ho Napowa puwano apoya epakeye.

23 Koteyewi ne himu paponase Eyewi ta:pita: neyewi heneye selakeye. Kiyawa mane alusewa olokeyatelawa neyewi seila:pa:na:pela: newa Kolini taunewemi mina:na: elawamona kiyawa hilila tima:pelekitise newa eta: minamakeye. 24 Alake, niyawa kiwa kolotea meapolose maselakeye. Kiwa epiya sosolo sita:pesita: niyewi sesemita: matanese selakeye. Koiyawemiye, kiyawa Kotema himu semetei esa: matanesewa penaiya sitalakeye.

2 Kolini 2 ->