1 Kỹ Judeu ag hỹn inh mỹ: “ẽg jógjóg ve pẽ tỹ Abraão hỹn hẽ ri ke tĩ?“ he sór mũ. 2-3 “Nén ũ há kar han ti tĩ, Abraão ti, hã tugrĩn tóg Topẽ mỹ tỹ ũn há nĩ,” he sór ag hỹn mũ. Vó, hã tũ vẽ. Ti ki rã tugnĩn ke vẽ. Hã kỹ tag vỹ ti to rán kỹ nĩ, ha mẽ: “Abraão vỹ Topẽ ki rã, hã kỹ tóg Topẽ mỹ tỹ ũn há nĩ, ti tỹ ti ki rã tugrĩn,” he tóg mũ, Topẽ vĩ rán ki. Ti tỹ nén ũ há han tugrĩn Topẽ mỹ tỹ ũn há nĩ ra tóg vẽso: “tỹ sóg ũn há nĩ, ag kar kãfór,” henh ke mũ vẽ, vẽsỹ ũn há han sór kỹ. Hã ra ẽg vẽsỹ ũn há han ki kagtĩg nỹtĩ.
4 Hã vé, ẽg rãnhrãj to ẽg tóg ẽg rãnhrãj kaja vég tĩ. Fagrĩnh mỹ ke tũ vẽ, ẽg rãnhrãj kaja ti. 5 Topẽ jykre vỹ ge tũ nĩgtĩ. Ẽg tỹ ti ki ge kỹ ẽg tóg ti mỹ tỹ ũn há nỹtĩ. Ẽg tỹ ti ki ge tugrĩn tóg ẽg mỹ vẽnh pãte fón tĩ, ẽg tỹ ti vĩ mranh ja ti. Ẽg rãnhrãj pijé'. Topẽ tỹ nén han mũn hã vẽ.
6 Hã kỹ vãsỹ ẽg pã'i tỹ Davi vỹ tó ja nĩgtĩ gé. Ũ tỹ vẽjykre pãno han tĩ to tóg vĩ há han ja nĩ, ti tỹ Topẽ ki rã kỹ. Topẽ tỹ ẽg mỹ vẽnh pãte fón to Davi tóg tag tó ja nĩgtĩ, ha mẽ: 7 “Topẽ vỹ ẽg ve há han ke mũ, hã kỹ tóg ẽg mỹ ẽg tỹ ti vĩ mranh ja ẽn tỹ vẽnh pãte fón tĩ. Kỹ ẽg ve mãn ke tũ nĩ ha, ẽg jykre pãno ja ẽn ti, ti tỹ vẽnh pãte fón kỹ nĩn kỹ. 8 Topẽ vỹ ẽg ve há han ke mũ, hã kỹ tóg ẽg mỹ ẽg tỹ ti vĩ mranh ja ẽn kaja kórég ẽn ven ke tũ pẽ nĩ,” he ja tóg nĩgtĩ, Davi ti.
9 Kỹ Judeu ag hỹn inh mỹ: “Davi hỹn ũ tỹ hẽ to tag tó ja nĩgtĩ'?“ he sór mũ. “Judeu jykre han mũ ag to ke mỹ vó, ag jykre han tũ ag to ke mỹ vó?“ he sór ag hỹn mũ. Ẽg kar to ke vẽ. Ha vé, Abraão to sóg: “ti tỹ Topẽ ki rã tugrĩn tóg tỹ Topẽ mỹ ũn há nĩ,” he ja nĩ. 10 Kỹ ti jykre tỹ Topẽ mỹ kuryj nĩ ẽn kã ti mỹ Judeu ag jykre han kỹ tĩ nĩ', Abraão ti'? Vó, ẽn kã ti ẽg jykre han tũ nĩ ver. Ẽn kã tóg ti gré fár junun kym ja tũ nĩ ver. 11 Topẽ vỹ ti mỹ vẽnh pãte fón, ti tỹ ti ki rã tugrĩn. Ti mỹ vẽnh pãte fón kar kỹ tóg ti mỹ ẽg jykre tag nĩm ja nĩ, ti tỹ ti gré fár junun kym jé sir. Hã kỹ tóg tỹ ũ tỹ Topẽ ki ge mũ kar jóg nĩ sir, Abraão ti, ẽg tỹ Judeu ag jykre han tũ ra, ẽg tỹ ẽg fár kym tũ ra ke gé. Topẽ ki ge kỹ ẽg tóg Topẽ mỹ tỹ ũn há nỹtĩ, Abraão ri ke. 12 Kỹ tóg tỹ Judeu jykre han mũ ag jógjóg ve pẽ nĩ gé sir, Abraão ti, ag tỹ ti mré Topẽ ki ge kỹ. Judeu jykre han to hã tóg Topẽ ki rã. Kỹ tóg ẽg tỹ Topẽ ki ge kỹ tỹ ẽg jóg pẽ nĩ gé sir. 13 Topẽ vỹ Abraão mỹ: “ã krẽ vỹ ga kar mĩ mũnh mũ, kỹ tóg tỹ ag tũ kar nĩnh mũ,” he ja nĩgtĩ. Ti tỹ Topẽ vĩ kri fi tugrĩn tóg ti mỹ tag tó. Vẽjykre pãno ki króm tugrĩn ke pijé'. Ti tỹ Topẽ ki rã kỹ tóg ti mỹ tỹ ũn há nĩ, hã kỹ Topẽ tóg ti mỹ tag tó ja nĩ.
14-15 Ha vé, ẽg tỹ Topẽ tỹ vãsỹ ẽg mỹ vẽjykre nĩm ja ẽn han sór mũ ra ẽg tóg mranh tĩ. Kỹ Topẽ tóg ẽg vóg kónãn ke mũ vẽ sir. Hã kỹ ẽg tóg ti tỹ ẽg mỹ nén ũ há tó ja ẽn venh ke tũ pẽ nĩ vẽ sir. Kỹ tóg ẽg mỹ nén ũ há nĩm ke tũ nĩ vẽ sir. Kỹ tóg ẽg mỹ: “ha inh ki rã,” henh ke tũ nĩ gé vẽ vẽ. 16 Hã ra tóg ẽg mỹ: “ha inh ki rã, sỹ ãjag mỹ nén ũ há ẽn han jé, ãjag tỹ inh ki ge tugrĩn,” he ja nĩgtĩ. Ti tỹ ẽg jagãgtãn hã vẽ. Ti pijé Judeu jykre han mũ ag tãvĩ mỹ vin sór mũ'. Ũ tỹ Abraão ri ke Topẽ ki ge mũ ag mỹ tóg vin sór mũ gé, fag mỹ ke gé. Ẽg kar jógjóg ve vỹ tỹ ti nĩ. 17-18 Topẽ hã ne ti mỹ: “ã krẽ tỹ sóg povo e hynhan ke mũ,” he ja nĩ'. Hã kỹ tóg tỹ ẽg kar jógjóg ve pẽ nĩ. Rán kỹ ti nĩ, Topẽ vĩ rá ki.
19-20 Topẽ tỹ Abraão mỹ ti kósin ke tag tó kỹ tóg 100 (ke) anos pétẽm. Si há ti nĩ ja nĩgtĩ, ti prũ tỹ Sara fi ke gé. Gĩr han vãnh fag nỹtĩ. Ẽn hã kã Topẽ tóg ti mỹ ti tỹ krẽ e hynhan ke tó ja nĩgtĩ. Kỹ tóg ti vĩ kri fi ja nĩgtĩ. To krónh ke ja tũ tóg nĩgtĩ. “Hỹ mỹ vỹ?“ he ja tũ ti nĩgtĩ, Topẽ vĩ tag to. Ti vĩ kri fi kỹ tóg Topẽ to: “ũn mág vỹ tỹ ti nĩ,” he ja nĩgtĩ. 21 “Topẽ vỹ ti tỹ nén tó ja han ki kanhró nĩ,” he ja ti nĩ, Abraão ti, to krónh ke tũ nĩ kỹ. 22 Tag hã tugrĩn tóg Topẽ mỹ tỹ ũn há nĩ, ti tỹ ti fe tỹ ti ki rãn kỹ.
23 “Topẽ mỹ tóg tỹ ũn há nĩ,” he mũ tag tóg ẽg to rán kỹ nĩ gé. Ti hã mỹ ke pijé'. 24 Topẽ mỹ ẽg tóg tỹ ũn há nỹtĩnh ke mũ gé, Abraão ri ke, ẽg tỹ ti ki ge kỹ. Hã kỹ tóg ẽg Senhor tỹ Jesus rĩn mãn ja nĩgtĩ, ti ter mũ ra. 25 Ẽg jagfy tóg ter ja nĩ, Jesus ti, ti tỹ ẽg tỹ Topẽ vĩ mranh tỹ tũ' he jé. Hã jé Topẽ tóg ti fẽg ja nĩ. Kỹ tóg ti rĩn mãn ja nĩ gé, ti tỹ ẽg mỹ vẽnh pãte fón jé, ẽg tỹ ti vĩ mranh ja ti.
<- ROMA 3ROMA 5 ->