1 Haleluya, ni ic solaŋ dindiŋa ionac aʒoaʒoroiguc ʒéma hénaoriŋ ionac aʒoaʒoroiguc ewa qerina mocʒoŋnec Yawe ewa hia ac ézémaŋ. 2 Yaweac wawaŋ meme imi kuneŋ yanda, imuac ségiségi waŋanʒu imi eneŋ mocʒoŋ hénia imuac niŋareŋ géanʒu. 3 Wawaŋ memeya imi eeya eŋeŋa, héŋgaleŋ kuc buŋayaguc. Waŋu solaŋ dindiŋanéŋ hémbénaŋa heanʒac.

4 Haka welic welicgia imi ic embac waŋ énécmiyu niŋɋelimanec kecʒu. Yawe imi ewa hia waŋ nénécmima goi héihéi waŋ nénécmianʒac. 5 Yawe imi eeya héimianʒu ionac nene yaka gumu énécmima sisipac acya hémbénaŋa nimmanec kecmac. 6 Inéŋ baera baera imi ic embachéra énécmima wawaŋ memeyawac kuha énézéyu héŋgic.

7 Mériawac wawaŋ meme imi héla ʒéma gésigési aiya imi solaŋa. Héna acya imi niŋkinʒéŋaguc. 8 Imi mia hémbénaŋawac buŋa qemimia, waŋu ewa héla ʒéma solaŋ dindiŋanec wamma memeya. 9 Yawenéŋ ic embachéra boŋhéré meénécmima sisipac ac hémbénaŋawac buŋa kumu énécmiyec. Imuac niŋac qara imi téréya ʒéma welic welicgiaguc.

10 Yaweac bac yandi yandi wawaŋa imi niŋtegic qiŋtegicac hénihénia wanʒac. Héna acya niŋtoho waŋanʒu imi eneŋ mocʒoŋ niŋtegic qiŋtegic ginaguc. Yawe mepé qepésiac haka imi ionac muru hémbénaŋa heanʒac.

<- Legic 110Legic 112 ->