1 Yohane

1 Kekecac ackuaʒéc nalé hénihéniaiguc bec kerec imuac mia neŋaŋ gezacninanéŋ niŋaŋiŋ, nimma kicninanéŋ héŋaŋiŋ waŋu hémma méraninanéŋ késaosi wammiaŋiŋ. 2 Waŋu kekec imi mewinini nénécmimia waŋec, waŋu kekec hémbénaŋa imi hémma héipucya wamma ʒéau énécmianʒiŋ. Kekec imi mia Maŋgocguc kerec. Keru Maŋgocnéŋ neŋaŋ muru mewinini nénécmiyec. 3 Ini acguc niniguc ala kekec wamma kecbiŋ niŋac, nini kicninanéŋ hémma gezacninanéŋ momacnec niŋaŋiŋ imuac mia ʒéau énécmianʒiŋ. Neŋaŋ ala kekec imi Maŋgoc ʒéma Naŋa, Yesu Kristo iriguc momacnec. 4 Waŋu kiwi yomi ségiséginina sécgémac niŋac oziŋ.

5 Ackuaʒéc iwarunec nimma ʒéau énécmiziŋ imi yomuhuc, Anutu imi asacmararaŋ, siŋi imi iwac muru komodia méŋ ménda hezac. 6 Neŋaŋ Anutuguc ala kekec kecʒiŋ imuhuc ʒéma siŋi qeriaiguc keŋha waŋanʒiŋiguc neŋaŋ imi ac ikora ʒéma ackuaʒéc héla ménda tohoanʒiŋ. 7 I eŋeyaoc asac mararaŋ qeriaiguc kecanʒac imuac séc neŋaŋ asac mararaŋ qeriaiguc kecanʒiŋiguc neŋaŋ imi neŋaocnec ala kekec waŋamuma kecni Naŋa Yesu Kristo iwac sacnéŋ képésicnina mocʒoŋ ʒuac nénécmimac. 8 Neŋaŋ képésicnina qahac ʒéziŋiguc neŋaocnec ikoc waŋamuziŋ, imuac niŋac ackuaʒéc héla imi ewa qerininaiguc ménda he nénécmizac. 9 Képésicnina ʒé auziŋiguc, Anutu, méŋʒé méŋʒéya qahac, solaŋa miŋinanéŋ képésicnina waima birianina mocʒoŋ ʒuac sorocgé nénécmimac. 10 Waŋu neŋaŋ képésic ménda waŋanʒiŋ ʒéziŋiguc, Anutuac ikora ʒémiziŋ. Waŋu iwac ackuaʒéc imi ewa qerininaiguc ménda hezac.

1 Yohane 2 ->