1 Ephesus koisuok karoon marwaan tirton diang majiaro:

“Akut changtiang arsi sari kamahuum khat-um soonna meiserkeii sari ngai karra si hongnga kaom ama diangnga inphut chongpui kha hi-eii. 2 Kei'n ning-intho chuon ngaikha kajet; nangni chuon ningngar khat-um kadei ningraat tihi kajet. Nangni'n akathamak mi ngaikha zootmakchu halli tirton ka-emak takkha tirton kin-eii kati ngaikha nangni'n ning-ensuiya maleisei karil mi ngai in-eii tium ningmujei tikha kajet. 3 Nangni kadei ningraat, kei kasik bit-ah poongraalna ningdei, halli nangni'n tuunkatung ningngir. 4 Takkha nangni chungnga hiwahi kizootmak om: Inphutna-ah kei ningna minriang angnga tuunchu naminriang makchujei. 5 Hituk kalaak-ah nangni ningpurjei tihi ngaidonru! Ningmalung thuul inlang inphutna-ah chuon ningleitho angnga thoru. Nangni ningmalung ningthuul mak-inchu, kei'n nangnidiang juokata nangni meiserkeii kha omnamun makheiya kakhaisik eii. 6 Takkha nangni chungnga minpaakna inkhat khachu hi-eii: kei'n kimatir angnga nangni innum Nicolaitans ngai itho chuon ngaikha ningmatir.””

7 “Nangni ningkuor indou inchu, Ratha khan koisuok ngaidiang iti ngaikha rangairu.””

“Raal kamator ngaidiang Pathian Rahuonna kamoong ringna thingkuung makheiya akara baksik-ah kei'n kapesik eii.”” Inphut 2:9; Chonglar 22:2; Ezek 28:13; 31:8

8 Smyrna koisuok karoon marwaan tirton diang majiaro:

“Inphutna li Insuona ka-eii, akathijei halli karingnookjei ama diangnga inphut chongpui kha hiwa hi-eii.”” Isa 44:6; 48:12; Chonglar 1:17; 22:13

9 Kei'n nangni poongraal kha kajet; nangni sara ning-eii tikha kei'n kajet—takkha nangni ning-inchong! Jihudi ka-emak takkha Jihudi kin-eii kati ngai'n nangni chungnga kathamak inrilkha kei'n kajet; inmani rahooi ngaikha Seitan mi in-eii! 10 Nangni'n poongraal ningratong sikkha chimaru. Rangairu! Seitan in ningmalung ennasik tita nangni karra miring lekkhat kha mikhumna ah adasik eii, halli nangni poongraal nakha nisoom esik eii. Keidiang na-ngamnaru thina suok-innum, halli nangni raal matorna tumkha kei'n ringna lukhu kanapeii sik-eii.

11 Nangni ningkuor indou inchu, Ratha khan koisuok ngaidiang iti ngaikha rangairu!

“Raal kamator inmani ngaikha woini huuina kathi khan katook nuni.”” Chonglar 20:14; 21:8

12 Pergamum koisuok karoon marwaan tirton diang majiaro:

“Ariam inni indou aka-ngei chempui kachoi ama diangnga inphut chongpui kha hi-eii. 13 Kei'n hunme ning-om tikha kajet, khawa khan Seitan in-ongna mun om. Nangni'n keidiang kadik-ah ningom, halli ngamna kaom kei sakhi ka-eii Antipas kha Seitan omna nangni khuopui khan inthatlai khannum nangni'n ngamna kha mathaan makchu.

14 Takkha nangni chungnga kei'n kizootmak lekkhat om: nangni karra miring lekkhat Balaam minchuna kajui ningom, minchuna kachu Balak kha Israel mi ngaikha manu thonasik ah raikhuo ramil ngaidiang inpeii bu kha Israel mi ngaikha minbakli zool-inthai chuon minthonasik inminchu. Teelna 22:5,7; 31:16; Innidan 23:4; Isa 62:2; 65:15

15 Khale in-angrip ah nangni karra Nicolaitans ngai minchuna kajui ningom. 16 Tuun ningmalung thuultaru! Ningmalung ningthuul mak-inchu, kei'n, innot tak-ah nangnidiang juokata halli inmani ngai chungnga kamur makheiya kasuok chem khan raal kathosik eii.””

17 Nangni ningkuor indou inchu, Ratha khan koisuok ngaidiang iti ngaikha rangairu!

“Raal kamator inmani ngaidiang kei'n inphuumma kaom manna lekkhat ngaikha kapesik eii. Halli kei'n inmani rakip ngaidiang lungngoi kapesik eii, lungngoi chungnga raming kathar injia, raming kha tuteii innum jetmu, aka-ralaang ngai inbit injet.”” Suok 16:14,15; 16:33,34; Jn 6:48-50; Isa 62:2; 65:15

18 Thyatira koisuok karoon marwaan tirton diang majiaro:

“Pathian Sapa, amit meimachuon ka-ang, akeii kha meiya inrou thir-inling ka-ang ama diangnga inphut chongpui kha hi-eii. 19 Kei'n nangni itho kha kajet. Nangni minriang, nangni ngamna, nangni chuontho, halli nangni deiraatna kha kajet. Inphutna-ah ningleitho neek-ah tuundoom ningtho tikha kei'n kajet.

20 Takkha nangni chungnga kizootmak kha hi-eii: Apumtak in Pathian taangwa ka-eii inti khawa numeisa Jezebel kha nangni'n ningzoot. Ama minchuna khan kei kasuok ngaikha zool-inthai chuon ngaikha amintho halli raikhuo ramil ngaidiang inpeii saak ngaikha aminbak. 1 Reng 16:31; 2 Reng 9:22,30

21 Kei'n ama kha malung thuulnasik apha kha kapeii, takkha manu makheiya inphut amalung thuulzootmak. 22 Khawa jarra kei'n poongna zaalmun khan ama kha kadeengluutsik eii halli ama le zool-inthai chuon katho mi ngaikha ama dikmakna chuon makheiya inmalung inheithuul mak inchu inmani chungnga kheel doomma poongna kapesik eii.

23 Ama nukkajui mi ngaikha kathatsik eii, halli koisuok rakip ngai'n kei hi mi rakip malung khat-um inmanuom kajet wiakpa kha ka-eii tihi injetsik eii. Nangni itho itho dungjuiya kei'n ningthoman kanamaleiisik eii.”” Minpkla 7:9; Jer 17:10; Minpkla 62:12

24 “Thyatira ah kaom Jezebel kajuimak nangni chu hiwa kadikmak minchuna hi juimakchu,”” aleiilaak mi ngai'n; “inthuuk Seitan ta”” intia injetna ngaikha inchumakchu. Kei'n nangni diang kati, khachu, kei'n nangni chungnga aleiilaak phurrik ngaikha napenuning. 25 Takkha kei'n kajuo maklaiseng, nangni diangnga kaomjei ngaikha kacheet-ah mahuumru. 26 Raal kamator khat-um kei lungdou kha ahekna katung akatho amadiang kei'n phungli zaat ngai chungnga wai karoon kamin esik eii, 27 khawa miringpa khan thir kherol thota inmani chungnga wai roonsik halli inmani ngaikha neipilla inbool beel ngaikha izeemkhoi angta alek alek-ah zeemkhoisik eii. Kei'n Kapa diangnga inphut ranak kimu angnga, 28 kei innum khawa miring padiang ziingtiang Sorpa arsi kha kapesik eii.

29 Nangni ningkuor indou inchu, Ratha in koisuok ngaidiang iti ngaikha rangairu!

<- Chongmalar 1Chongmalar 3 ->