୯ ଆ ଦାଦାଲଡ଼ି ନୁ ଏଲାସ୍କ୍, ମିଡ଼୍ ବେଲା ବିଚାର୍ ଆୟ୍ୱିଡ଼୍, ଆଦିନ୍ ସେଙ୍ଗେ ନିଜେତ୍ ନିଜେତ୍ ଲୋପେ ପେର୍ଲ୍ମାଟ୍, ଉଡ଼ାଟ୍, ବିଚାର୍ କର୍ତ୍ତାଲ୍ ମାର୍ ଗାରେ ନିସ୍ ମିନ୍ଦେଣ୍ଡ୍ । ୧୦ ଆ ଦାଦାଲଡ଼ି ନୁ ଏଲାସ୍କ୍, ବେନ୍ ବାବବାଦିଡ଼୍ ପ୍ରବୁନ୍ ପେଦେର୍ତେ ଗଟି କେସ୍ ମାତ୍ତଡ଼୍, ଅଡ଼୍କିଂଙ୍କ୍ ଦୁଃକାମ୍ ନୁ ଦର୍ଯ୍ୟତାଦ୍ ୱେଷଡ଼୍ ଇନା ପୟ୍ମୁଟ୍ । ୧୧ ଉଡ଼ାଟ୍, ବେନଡ଼୍ ଗାଡ଼୍ସ୍ ଆସ୍ ମାତ୍ତଡ଼୍ ଅଡ଼୍କିଂଙ୍କ୍ ମାମ୍ମେ ଦନ୍ୟ ଇଞ୍ଜ କେତିତମ୍ । ମିଡ଼୍ ଆୟୁବନ୍ ଗାଡ଼୍ସ୍ ଗଟି କେଞ୍ଜି ମାତ୍ତିଡ଼୍, ମେଣ୍ଡେ ପ୍ରବୁନ୍ ତେରାନ୍ ପାଡ଼୍ୟି ଉଡ଼ି ପୁତ୍ତିଡ଼୍ ଯେ, ଅଣ୍ଡ୍ ଦୟାତଣ୍ଡ୍ ନୁ କୃପା ମାଡ଼ାନଣ୍ଡ୍ ।
୧୨ [b]ଆଦିଙ୍କ୍ ହୋ ନା ଦାଦାଲଡ଼ି ନୁ ଏଲାସ୍କ୍, ଶପତ୍ ମାଡ଼୍ମାଟ୍, ସ୍ୱର୍ଗତାଦ୍ ଆୟି ବା ପୃତିବିତାଦ୍ ଆୟି କି ମେଣ୍ଡେ ବାତ୍ ବିଷୟ ଅସ୍ ଶପତ୍ ମାଡ଼୍ମାଟ୍; ଆଦିଙ୍କ୍ ମିଇ ଗଟି ହଁ ତାଦ୍ ହଁ ଆୟି, ଇଲ୍ଲେ ତାଦ୍ ଇଲ୍ଲେ ଆୟି, ବେଲାକି ମିଡ଼୍ ବିଚାର୍ ମାଡ଼ାନାଗ୍ ଦଣ୍ଡ୍ ଆୟ୍ୱିଡ଼୍ ।
୧୩ ମିଇ ଲୋପେ ବାତ୍ ବେନ ଦୁଃକାମ୍ ପାଏମ୍ ଆଦୁତନ୍ ? ଅଣ୍ଡ୍ ପ୍ରାର୍ତନା ମାଡ଼ିଣ୍ଡ୍ । ବେନବା ୱେଡ଼୍କ୍ ମିନ୍ଦେଣ୍ଡ୍ ? ଅଣ୍ଡ୍ ପାଟା ପାରି ପ୍ରଶଂସା ମାଡ଼ିଣ୍ଡ୍ । ୧୪ [c]ମିଇ ଲୋପେ ବାତ୍ ବେନ ରୋଗି ମିନ୍ଦେଣ୍ଡ୍ ? ଅଣ୍ଡ୍ ମଣ୍ଡଲିତେ ନେତା ନଡ଼୍କିଂଙ୍କ୍ କାର୍ଙ୍ଗିଣ୍ଡ୍; ଅଡ଼୍ ପ୍ରବୁନ୍ ପେଦେର୍ତେ ନିୟ୍ ଉଃସି ଅନ୍ ସେଙ୍ଗେ ପ୍ରାର୍ତନା ମାଡ଼ିଣ୍ଡ୍ । ୧୫ ବିଶ୍ୱାସ୍ତାଦ୍ ପ୍ରାର୍ତନା ଆଦ୍ ରୋଗିଙ୍କ୍ ରକ୍ଷା ମାଡ଼ିତ୍, ମେଣ୍ଡେ ପ୍ରବୁ ଅଂକିଙ୍କ୍ ତେଏତିତଣ୍ଡ୍; ମେଣ୍ଡେ ଯଦି ଅଣ୍ଡ୍ ପାପ୍ ମାଡ଼ିମାନ୍ତଣ୍ଡ୍, ଆଲେକେ ଅଂକିଙ୍କ୍ କ୍ଷମା ହିଦ୍ତଣ୍ଡ୍ । ୧୬ ଆଦିଙ୍କ୍ ନିଜେତ୍ ନିଜେତ୍ ଲୋପେ ପାପ୍ ସ୍ୱୀକାର୍ ମାଡ଼ାଟ୍, ମେଣ୍ଡେ ସାୟେ ଆଦାନ୍ ସେଙ୍ଗେ ନିଜେତ୍ ନିଜେତ୍ ଲୋପେ ପ୍ରାର୍ତନା ମାଡ଼ାଟ୍ । ଦାର୍ମାମ୍ ନାରୁଣ୍ଡ୍ତେ ପ୍ରାର୍ତନା ନାର୍ଗେ ପାଡ଼୍ୟି ମାଡ଼ାନଙ୍କ୍ ପାର୍ଦ୍ତେ । ୧୭ ଏଲୀୟ ମାନ୍ ରକମ୍ ନାରୁନ୍ ମାତ୍ତଣ୍ଡ୍, ୱାର୍ସାମ୍ ୱାଡ଼୍ମାକି ଇଞ୍ଜ ଅଣ୍ଡ୍ ଅଣ୍ଡୟ୍ ମାନ୍ତେ ପ୍ରାର୍ତନା ମାଡ଼୍ତଣ୍ଡ୍, ମେଣ୍ଡେ ମୁଣ୍ଡ୍ ଏଣ୍ଡ୍କ୍ ନୁ ଆରୁ ନେଲ୍ଞ୍ଜ୍ ଯାକ ଦେଶ୍ତାଗ୍ ୱାର୍ସାମ୍ ୱାଡ଼; ୧୮ ଅଣ୍ଡ୍ ମେଣ୍ଡନ୍ନ୍ଦାମ୍ ପ୍ରାର୍ତନା ମାଡ଼୍ତାଙ୍କ୍ ମୟଲ୍ତାଗାଙ୍କ୍ ୱାର୍ସାମ୍ ୱାତ୍ତେ, ମେଣ୍ଡେ ବୁମ୍ତାଗା ପସଲ୍ ଆଦ୍ତା ।
୧୯ ଆ ନା ଦାଦାଲଡ଼ି ନୁ ଏଲାସ୍କ୍, ମିଇ ଲୋପେ ବେନ ଯଦି ସତ୍ ହାର୍ଦିଙ୍କ୍ ବୁଲ୍କା ଆଦ୍ତନ୍, ମେଣ୍ଡେ ବେନ୍ ଅଂକିଙ୍କ୍ ସତ୍ ହାର୍ଦାଗ୍ ମାଲ୍ପି ତାତିତଣ୍ଡ୍, ୨୦ [d]ଆଲେକେ ଅଣ୍ଡ୍ ପାପି ନାରୁଙ୍କ୍ ବୁଲ୍କା ହାର୍ଦାଗାଙ୍କ୍ ମାଲ୍ପି ତାତ୍ତଣ୍ଡ୍, ଅଣ୍ଡ୍ ଯେ ତାନ୍ ଆତ୍ମାତିଙ୍କ୍ ଡଲାନାଗାଙ୍କ୍ ରକ୍ଷା ମାଡ଼୍ତଣ୍ଡ୍ ନୁ ନାର୍ଗେ ପାପ୍ତିଙ୍କ୍ ୱିଡ଼୍ସିଦ୍ତଣ୍ଡ୍, ଇଦ୍ ପୁତ୍ତିଡ଼୍ ।
<- ଯାକୁବ 4