୧ ନାନ୍ ପାଉଲ୍, ମିକିଂଙ୍କ୍ ନାୟାଦ୍ ଇଦ୍ ବ୍ୟାକ୍ତିଗତ ଦନ୍ୟବାଦ୍ ବେନ କେତିତଡ଼୍‍, “ନାନ୍ ମିଇ ପାକେ ମାନ୍ଦାନ୍ ୱେଲେ ଗାଟି ନମ୍ର ନୁ ଶାନ୍ତି, ବାତେଙ୍କ୍ ଇତ୍‍କେ ଯେକା ଆତ୍‍କେ ଅଦିକ୍‌ ସାହାସୀ ।” କ୍ରିଷ୍ଟନ୍ ନମ୍ରତା ନୁ କମଲ ନାନ୍ ମିକିଂଙ୍କ୍ ଦନ୍ୟବାଦ୍ ମାଡ଼ି କେତୁତାନ୍, ୨ ମିଇ ତଡ଼୍ କାଇଲ୍‍ତେ ୱେଲେ ନାକିଂଙ୍କ୍ ବେଲାନ୍ କାରାପ୍‌ ବ୍ୟବହାର୍ ମାଡ଼ାନଙ୍କ୍ ଆୟ୍‍ୟ । ବାତେଙ୍କ୍ ଇତ୍‍କେ ବେନଡ଼୍ ହେର୍କା ମାଡ଼ିତଡ଼୍ ଯେ, ମାମ୍‍ମେ ଜାଗତିକ ରୀତିନୀତି ଲେକାମ୍ ମାନ୍‍ନ୍ତମ୍, ଅଡ଼୍‌ ବିରୁଦ୍ଦ୍‌ତେ ଦୃଡ଼ ପଦକ୍ଷେପ ଆଦାନାଦ୍ ନାର୍‍ଗେ ସାହାସ ନାୟାଦ୍ ମିନ୍ଦେ । ୩ ମାମ୍‍ମେ ଇଦ୍ ଜଗତ୍‍ତାଗ୍ ବାଦ୍‍କୁତମ୍ ଇଦ୍ ସତ୍, ବାତେଙ୍କ୍ ଇତ୍‍କେ ବାତେବା ଜାଗତିକ୍ ଲେକାମ୍ ନେହେସ୍ ଯୁଦ୍‌ ମାଡ଼ମ୍, ୪ ମାତର୍ ଇଶ୍ୱର୍‌ତେ ଶକ୍ତିତାୱୁ ସୁରୀଟେଙ୍ଗା ବ୍ୟବହାର୍ ମାଡ଼ି ଶତ୍ରୁଡ଼ାୱୁ ଦୃଡ଼ ଦୁର୍ଗସାରେ ଦ୍ୱଂସ ମାଡ଼ିତମ୍, ବ୍ରାନ୍ତ ଯୁକ୍ତିସାରେ କଣ୍ଡନ୍‌ ମାଡ଼ିତମ୍ । ୫ ଇଶ୍ୱର୍‌ତେ ଜ୍ଞାନ୍‍ତିଙ୍କ୍ ବିରୁଦ୍ ମାଡ଼ମାନ୍ଦାନ୍ ସାରେତଡ଼୍ ଆଡାମ୍‍ ଆଦାନଡ଼୍‍କ୍ ମାମ୍‍ମେ ଉୱୁତିତମ୍ ନୁ ନାରୁଡ଼୍‍ତେ ସାରେ ଚିନ୍ତେ ଆୟତ୍ ମାଡ଼ି କ୍ରିଷ୍ଟନ୍ କାହିଲି ମାଡ଼ିକାଡ଼୍ । ୬ ମିଡ଼୍ ପୁରାପୁରି ଲେକାମ୍ କ୍ରିଷ୍ଟନ୍‍ ଅନୁଗତ ସ୍ୱିକାର୍ ମାଡ଼ାନ୍ ପେର୍‍କେ ମିଇ ଲୋପେ ମେଣ୍ଡେ ବାତେବା ଅବାଦ୍ୟତା ତଅନ୍‌ଦ୍‍କେ, ତାନାଦ୍ ପ୍ରତିକାର୍ ମାଡ଼ାନଙ୍କ୍ ମାମ୍‍ମେ ତିଆର୍ ।

୭ ମିଇ ସାରେପାକେ ବାତେଏ ସାରେ ଗଟେମ୍ ଆଦୁତ୍‍ତେ, ଉଡ଼ାଟ୍ । ମିଇୟାଗେ ବେନ କ୍ରିଷ୍ଟନ୍‍ ପେର୍‍କେ ଆଦାନଣ୍ଡ୍ ମିନ୍ଦେଣ୍ଡ୍ କି ? ଯଦି ମିନ୍ଦେନ୍, ଆଲେକେ ଅଣ୍ଡ୍‌ ମେଣ୍ଡନ୍‍ନ୍ଦାମ୍ ଇଦ୍ ଚିନ୍ତେ ମାଡ଼ୁଡ଼ିଣ୍ଡ୍ । ବାତେଙ୍କ୍ ଇତ୍‍କେ ଅନ୍‌ ଲେକାମ୍ ମାମ୍‍ମେ ମିକା କ୍ରିଷ୍ଟନ୍ ପେର୍‍କେ ଆଦାନମ୍ । ୮ ମିଇକିଙ୍କ୍ ଦ୍ୱଂସ ମାଡ଼ାନଙ୍କ୍ ଆୟ୍‍ୟ, ମାତର୍ ଗଠନ୍ ମାଡ଼ାନ୍ ସେଙ୍ଗେ ଇଶ୍ୱର୍ ମାନ୍‍ ବେନ୍ ଅଦିକାର୍‌ ଇତ୍‍ତନ୍, ଆଦିନ୍ ସେଙ୍ଗେ ଯଦି ନାନ୍ ନାର୍‍ଗେ ଦର୍ପ ମାଡ଼ିମାନ୍‍ତାନ୍, ଆଲେକେ ସିଗ୍ ଆୟନ୍ । ୯ ନାୟାଦ୍ ଚିଟି ତଡ଼୍ ମିକିଂଙ୍କ୍ ୱେର୍‍ସ୍ପାନଙ୍କ୍ ଆଲ୍‍ସି ମାଡ଼ାନାଦ୍ ନାୟାଦ୍ ଇଚ୍ଛା ଆୟ୍‍ୟ । ୧୦ ବେନ କେତିତଡ଼୍‍, “ପାଉଲ୍‍ତେ ଚିଟି କି ଗାଟି ବାଦେମ୍‍ ଆତ୍‍ତେ ଲେକାମ୍ ବା ୱାୟ୍‍ୟେ ମାନ୍ଦାନ୍ ଲେକାମ୍ ବାତେଙ୍କ୍ ଇତ୍‍କେ ମା ତଡ଼୍ ମାନ୍ଦାନ୍ ୱେଲେ ଅଣ୍ଡ୍‌ ଦୁର୍ବଲ ଲେକାମ୍ ତନ୍ଦାନଣ୍ଡ୍ ନୁ ଅନ୍‌ ଗଟି ମୁଲ୍ୟ ଆୟ୍‍ୱେ ଲେକାମ୍ ହେର୍କା ଆୟ୍‍ନୁ ।” ୧୧ ଆଦ୍ ନାରୁଡ଼୍ ବୁଜେମ୍ ଆଦାନାଦ୍ ଲେକାମ୍ ଯେ, ମାମ୍‍ମେ ଯେକାଙ୍କ୍ ଚିଟିତେ ବାତ୍ ଲେକିତମ୍, ସାକ୍ଷାତେ ଆଦିଙ୍କ୍ ପାଡ଼ିୟିଦାଗ୍ ସାୟେ ମାଡ଼ିତମ୍ ।

୧୨ ନିଜାମ୍ ନିଜେତିଙ୍ଗ୍ ଇଦ୍‍ଲେକାମ୍ ବେଡ଼ି ହେର୍କା ମାଡ଼ମାନ୍ଦାନ୍ ନାରୁଡ଼୍‍ତଡ଼୍ କାୟ୍‍ଲାନ୍‍ ସେଙ୍ଗେ ବା ଅଡ଼୍‌‍ତଡ଼୍ ନିଜେତିଙ୍କ୍ ସାମାନ୍ ମାଡ଼ାନାଦ୍ ସାହାସ୍ ମାୟାଦ୍‌ ଇଲ୍‍ଲେ । ଅଡ଼୍‌ ବେସର୍ ବକୁୱାଲଡ଼୍, ବାତେଙ୍କ୍ ଇତ୍‍କେ ଅଡ଼୍‌ ନିଜେତିଙ୍ଗ୍ ନିଜେ କଲ୍‍ସିତଡ଼୍, ନିଜେତ୍ ମାନଦଣ୍ଡତେ ନିଜେ ନିଜେତ୍ ବିଚାର୍ ମାଡ଼ିତଡ଼୍ । ୧୩ ବାତେଙ୍କ୍ ଇତ୍‍କେ ମାୟାଦ୍‌ ଦର୍ପ ସୀମିତ । ଇଶ୍ୱର୍‌ ମା ସେଙ୍ଗେ ବେନ୍ କାମ୍‍ୱାୟେ ତିଆର୍ ମାଡ଼୍‍ତଣ୍ଡ୍, ତାନ୍ ଲୋପେନେ ମାମ୍‍ମେ ଦର୍ପ ମାଡ଼ିତାଡ଼୍ । ଆଦ୍ ପାଡ଼୍‍ୟି ୱାୟେତାଗ୍ ୱେଲୁମ୍‍ ଲେକାମ୍ ମୀଇଡ଼୍ ମାନ୍‍ତିଡ଼୍‍ । ୧୪ ଆଦିନ୍ ସେଙ୍ଗେ ମାମ୍‍ମେ ମୁନେ କ୍ରିଷ୍ଟନ୍ ସୁସମାଚାର୍‌ ମିଇ ପାକେ ଆସ୍‍ମାନ୍ଦାନ୍ ସମୟ୍‍ତେ ବାତେବା ସୀମା ବାୟ୍‍ଦେତ୍‍ ପାଡ଼୍‍ୟି ମାଡ଼ମ୍ । ୧୫ ଇଶ୍ୱର୍ ମାଡ଼ିମାନ୍ଦାନ୍ ମା କାମ୍‍ୱାୟେତେ ପରିସର ବାଇଦେ ବାଗାତଡ଼୍ ପାଡ଼ିୟିଦେ ସୁଯଗ୍ ଆସ୍ ଦର୍ପ ମାଡ଼ମ୍ । ମାମ୍‍ମେ ଆଶେ ମାଡ଼ୁତମ୍ ଯେ, ମିଡ଼୍ ବିଶ୍ୱାସ୍‍ତେ ଉନ୍ନତି ମାଡ଼ାନ୍ ସାଙ୍ଗେ ସାଙ୍ଗେ ମିୟାଗାଙ୍କ୍ ମିକା ମାୟାଦ୍‌ ପାଡ଼୍‍ୟି ୱାୟେ ମେଣ୍ଡେ ପ୍ରସାରିତ୍ ଆଦ୍‍ତେ । ବାତେଙ୍କ୍ ଇତ୍‍କେ ଇଦ୍ ଇଶ୍ୱର୍ ମାଡ଼ିମାନ୍ଦାନ୍ ସୀମାତ୍‍ ବାୟିଦେ ଆଦାନାଦ୍ ଆୟ୍‍ୟ । ୧୬ ଆଲେକେ, ବାଗାତଡ଼୍ ପାଡ଼୍‍ୟି ୱାୟେତାଗ୍ ଆସ୍‍ମାନ୍ଦାନ୍ ପାଡ଼୍‍ୟି ସେଙ୍ଗେ ଗର୍ବ ମାଡ଼କଟ୍ ମିୟାଦ୍ ସୀମା ବାଇଦେ ମେଣ୍ଡନ୍ ଦେଶ୍‍ତାଗ୍ ମିକା ମାମ୍‍ମେ ସୁସମାଚାର୍ ପ୍ରଚାର୍ ମାଡ଼େ ପାର୍‍ଦ୍‍ତାଡ଼୍ ।

୧୭ ଦର୍ମଶାସ୍ତ୍ରତାଗ୍ ଲେକାମିନ୍ଦେ, “ବେନ ଗାଇ ମାଡ଼ାନଙ୍କ୍ ଇଚ୍ଛା ମାଡ଼ିତନ୍, ଅଣ୍ଡ୍‌ ପ୍ରବୁନ୍ ପାଡ଼୍‍ୟି ସେଙ୍ଗେ ଗର୍ବ ମାଡ଼ିଣ୍ଡ୍ ।” ୧୮ ନିଜେତ୍ ପ୍ରସଂଶା ତଡ଼୍ ବେନ ସ୍ୱୀକୃତି ଦର୍ସିକି ଆୟ୍‍ୟଣ୍ଡ୍, ବେନ ପ୍ରବୁନ୍ କଣ୍ଡେତେ ଲେକାମ୍, ଅଣ୍ଡେକେ ମାତର୍‍ ତାନ୍ ଗ୍ରହନ୍‍ଯୋଗ୍ୟ ।

<- ୨ କରନ୍ତିୟ 9୨ କରନ୍ତିୟ 11 ->