30
Agu-na Epe Agaa Medaloma (Sapta 30-31)
1 Go agaare Jakina si Agu-me Itele-para Ukal page lakesimi agaa remaa yade.
2 Agu-me Gote ni raapu an pirua niri aa-da dia yade sa.
Goa loa niri kone-daa waru na-isa.
Nina konere ora wae sa.
3 Ni epe kone nasu ora ni oto pare Gote nipu ora epe redepone aa yade.
Pare neme nipu na-ade.
4 So yaa-para aapi pua su-amaa wala ipisa pae?
Go page po-ripu aapina kimi ripinaa misa pae?
Go page so moae madaa aapimi ipa mapiraasa?
Goa pua laplap mada oyae sua aapimi keapunisa?
Abia go ia su luabu apimi puri mapalaawa robo ma-sasa?
Nipuna biri aapiya?
Nipuna si-ri aapi ya?
Go yaenuri nere makuae pae?
5 Oyae luaburi Gote nipuna saa rabu opesa. Gote-na Agaare ora ria yade.
Goa pua nipu piri peme onaare nipumi kepopu runane yawa surubea. Gore mo etane epa aalialo ralubi maditema-rupa mada nipuna agaa-me niaa rigitaniaawa.
6 Nena agaa meda loare gore Gote-na agaa yade pi nalape.
Gote-me orope ne koso lalia rabu go aa-re waea pi aa yade teme.
7-8 Gote nere oyae laapo agaa mulalo pi-ga neme go yae lapo giaina.
Oro yalo ni go su-amaa pirualua raburi yaa agaa-para makirae kone luabu gimanowa.
Neme niri amope-para aa naraa page namapirainalo-pi.
Dia nina nape eta robo-para giape.
9 Neme oyae ora adaapu salua rabu ne masaa rilawa.
Adaa Aa-nere aapi yapae toa?
Ni naraa piralua raburi neme paake pupitagi noa waenu pualua rabu nina Gote Adaa nena bi ma-oyaluada go aaene lalo.
10 Neme surube aa piri pua kogono naakina bi napua ma-oyaape.
Nipuna kogono aana bi ma-oyaali rabu Gote lorapalia rabu nipuna Gote-me ne talialo lalo.
11 Onaa medalome goa teme:
Gote-me nimina ama aapanu ma-bebolatina teme.
12-13 Onaa madalomame nimu waea meda napema teme pare nimu amulu papubaaya-pulu Gote-na ini agaa madaa nimuna pupitagi wae ia-daa adea.
Onaa medalomame nimu ora epe ta kone sua pa onaa meda otaa kone imi.
14 Onaa medalomame naraa onaanu-para waea agu pulalo peme.
Gore nimuna agaa abulu-para rai napi eke aae ayaa-pulu nimumi mo naraa onaana oya mulalo peme.
15 Yaapi nea paakana oge nogo laapo pia.
Nipuna biri gupa teme: Ni gi ni gi teme.
Oyae maala-me nimuna raana mada na-pora poalia.
16 Pandanere aba ome aanuna tapa-para aeme.
Laapore ore aani raapu patea pare naaki padaa napia.
Repore sumi ipa adaapu mea pare ipa waru name.
Maalare kone ia repena sulaame oyae luabu rea pare naare nona pea.
Go yaere ora luabu madaa naniminaata.
17 Gore aa medame orena ama page aaraa lapona agaa rasini omalia rabu go lapome nipu mada narogaalipi.
Go rabu yaa itaa-para yaa aroka roka ipua ini epa rasu nabalipi.
18 Oyae ipa maala ora rado pi aaene yae yapulu neme ora mada na-makuaato.
19 Pandanere yaa ita nipu so yaa madaa awaya.
Laapore paakare nipu aana madaa pamea.
Repore ipa sipi-ri adaa ipa solowara madaa pameade.
Maalare aa-me ona raname omemede-rupa pipi.
20 Oname nipuna aa gimoa rado raapu patia raburi nipumi ipa mea radepe rubua goa ta.
Neme yae meda napawade ta.
21 Go su-amaare yae maala wae kone ia-pulu go sumi go kone adoa gime waru omea pururu ora waru omea.
22 Go pemeare go-rupa:
Kogono naaki naara yapare wala king kogono pea.
Aa medame kone nasua eta ora adaapu nea.
23 Ona meda nipu aa nape pa piruaawa aba ripia aame gime ona yapare orope rumaeme.
Ona nipuna surube onana kogono nipumi mulalo oyo moyo ari piralipi.
24 Go su-amaa yae maala raa-para pia pare nimuna kone ora epeta:
25 Raguta puri na-ia pare eta dia yalia rabu nape eta waru amupu imi.
26 Yapa wamea page aana-para pimi pare nimu puri na-ia.
Goa peme pare nimuna adare aana rulalo peme.
27 Oboro nipuna aa muduri napia pare nimu uliri pua pameme.
28 Oge kaau niaame kimi ripinaawa mealimare ora yapare nimu aa mudu king-na adapara pimi.
29 Oyae malare padane-para wata tina pameme:
30 Kira mena me puri pabea-pulu pa kira anune yaenu medaloma rabuaaya.
Nimu pora pameme raburi oyae meda madaa paala meme.
31 Yaa kuta kosapeame nipuna aalu musaawa pora pamea.
Lione mena ora aari oyae meda madaa palame naomoa pare ora nipuna puri rado aaya.
Meme mena yadaapunu page king medame nimu mada natalimi.
32 Gore neme maeyae kone sua waeanu pulalo paliri nena bi naminaasape pare agaa gimoa yalame omape.
33 Gore neme mena gawana adu mua mea pereke pereke te rabu bata mada autea.
Aa medana ini kadu mataliri ratu yawalia.